InfoHub Logo

Muǵalim degen at — qasıetti at. Muǵalim degen attan taza eńbekti súıetin mamandyq ıesi degen sózdi uǵynady. Eldiń nadandyǵymen alysatyn adam - muǵalim.

S. Muqanov

Ustazdyq etý – eń uly is. Al ustazdar – shyn baqyttylar. Ustaz aldynan ótpegen jan kemde-kem. Meıli ákim bol, meıli ǵalym bol, ustazyńnyń aldynda máńgilik qaryzdarsyń! Óıtkeni onyń tálim-tárbıesin, úıretken oqý-bilimin jyldar boıy sińirip, dúnıeniń bir kirpishi bop qalandyń.

Ustaz degen kim? Ol – mekteptiń júregi. Ahmet Baıtursynovtyń sózimen jetkizsek, ustaz - bilimdi, pedagogıka, metodıkadan habardar, jaqsy oqyta biletin muǵalim. Men «USTAZ» uǵymyn óz isiniń ustasy, sheberi dep túsinemin.

Ár musylmanǵa ilim úırenýdi paryz etken asyl dinimizde de ustazǵa degen qurmet sóz bolady. Súıikti paıǵambarymyz Muhammed (s.ǵ.s.) hadısterinde: «İlim úırenińizder, ilimge qajetti baıyptylyq pen baısaldylyqty da qosa úırenińizder. Sizderge ilim úıretken kisini qurmetteńizder, syılańyzdar»,- delingen. Halqymyzdyń: «Bir árip úıretkenge qyryq jyl sálem ber» degen danalyǵynan ustazdar qaýymynyń joǵary baǵasyn kóremin.

Aqyn Tólegen Aıbergenov:

Aq órkesh Alataýdaı asqar ustaz,

Mahabbat Syrdarıa saǵan degen

- dep tebirense, Ǵafý Qaıyrbekov:

Sol kúıi, ustaz kúıi úlgi bolyp,
Máńgilik kóz aldymda qaldy meniń!

-dep, ustazyn saǵynyshpen eske alady. Ulaǵatty  ustazdaryna jyr arnaǵan aqyndar tizbegi bunymen bitpek emes. Qalaı desek te, ómir saparynda jibergen qatelikterimizdi ustaz sekildi eshkim keshirgen emes. Ustaz esimi sonysymen de ystyq...

Qoǵamnyń tiregi – ustaz. Qoǵam tulǵany jetildiredi, al tulǵa qoǵamdy gúldendiredi. Sondyqtan qoǵamnyń damýy úshin bilim berý máselesi mańyzdy. Mundaı jaýapty mindet - aty altyn árippen qalatyn aıaýly ustazdyń enshisinde. Elbasy N.Á.Nazarbaev: «Búgingideı jahandaný jaǵdaıynda memleket pen adam ozyq, básekege saı bolýy úshin, eń birinshi bilim men ǵylym órkendeýi qajet» - degen edi. Bilim órkendeýi úshin pedagog – ınnovator mamanǵa, oqýshy – sapaly bilim men sanaly tárbıeni birdeı sińirgen ozatqa aınalýy tıis dep oılaımyn.

Muǵalimniń qoǵamdaǵy róli – shákirtine bilim berip qana qoımaı, alǵan bilimderin ómirde tıimdi qoldanyp, jarata alýyna jaǵdaı jasaý. Sondaı-aq, olardy básekege qabiletti tulǵa etip tárbıeleý. Jas urpaqtyń ata saltyn ardaqtar, ulttyq qundylyqty ulyqtar ozyq oıly bolyp qalyptasýyna yqpal etý.

Pedagog óz sheberligin udaıy shyńdaı otyryp, qoǵamǵa belsendi qyzmet etýi qajet. Únemi terbelis, izdeniste júretin ınnovator pedagog - sabaq barysynda jańa ádis-tásilderdi qoldanyp, jańashyldyqqa bet alsa, oqýshylardyń da pánge yntasy, belsendiligi artyp, izdenimpazdyq, derbes oılaý qabileti damıdy.

QR bilim berý isiniń úzdigi, ustaz Aıagúl Mırazova bir suhbatynda : «Kez kelgen muǵalim ár sabaqqa daıyndyqpen barý kerek. Ol 44 jyl berip júrgen sabaǵy bolsa da, útir-núktesine deıin mán berip, qalaı aıtamyn, qalaı túsindiremin, qalaı suraımyn, qalaı bilgizemin, qalaı qorytyndylaımyn dep barýy kerek. Al sabaqtan qaıtyp bara jatqanda esep berip, keıde kóńil kúıiń shalqyp bara jatasyń. Sabaqtyń bári jaqsy ótse, túsinse, bir jyly sóz estiseń, soǵan shalqısyń. Al birdeme durystaý bolmaı jatsa, isińniń nátıjesin kórmeseń sharshaısyń. Kórseń – sharshaǵanyńdy umytasyń»,- degen bolatyn. Akademıktiń bul sózi meniń de ishki oılarymmen egiz ispetti...

San jastyń qamyn shertesiń,
taǵdyryn oılap tolǵanyp.
Ár úıdiń bir-bir erkesin
úırettiń óziń qolǵa alyp.

Ustazsyz janda sónbek kún,
shákirtsiz ómir – sýsyz jer.
Kórinbes ǵajap eńbektiń
beınetin keship júrsizder.

Júrekte turar jalqy úniń,
janymnan jalyn jiger kút.
Ustazym, seniń ár kúniń,
ár sátiń turǵan bir erlik!

- degen sózderdi poezıa padıshasy F.Ońǵarsynova pash etti. Keshegi Alash arystarynyń jalǵasy retinde osyndaı kıeli mamandyqtyń tutqasynan ustaǵanym úshin  keýdemdi qýanysh kerneıdi. Áýeli Allaǵa arqa súıep, sonan soń Abaı atamyz aıtpaqshy, ózime senip bastaǵan muǵalim atty mártebeli mamandyqta júrgenime bıyl besinshi jyl. Men ózimdi bolashaqta ınnovator pedagog, maıtalman maman, ulaǵatty ustaz retinde kórgim keledi. Bulaq kórse kózin ashatyn, ter tógip eńbek etetin ustaz bolýdy jazsyn Allam!

Orazbekqyzy Gúljanat

Mańǵystaý oblysy, Mańǵystaý  aýdany, Shetpe selosy.

---