InfoHub Logo

Erte zamanda bir kópti kórgen kóne kóz qarttyń jeti uly bolypty. Jeteýi de elge qorǵan, jurtqa pana bolǵandaı atpal azamattar edi deıdi. ol bir, jaýgershiligi kóp, tynyshsyz zaman bolsa kerek. Kúnderdiń bir kúninde alaókpe bolyp jaýshy jetip, el shetine dushpan áskeriniń tuıaq iliktirgenin habarlaıdy. Sodan, kóne kóz qarttyń jeti uly muzdaı saýyt qursanyp, jaýdyń aldyn alýǵa attanady. 

Saılanyp kelgen jaýdyń jasaǵy myqty, jaraǵy berik bolatyn ádeti. Dushpan jasaǵymen arada qandy shaıqas bastalady. El ishinen qol jınap, jaýǵa qarsy shyqqan jeti jigit ıyqtasa júrip urys salyp, joıqyn erlikter kórsetedi. Jaýdyń betin qaıtarady. Biraq, shyǵynsyz soǵys bolǵan ba, osy shaıqasta aǵaıyndy jeti jigit te erlikpen qaza tabady. 

Qaraly habar qart ákege jetedi. Jeti bozdaǵynan birdeı aıyrylǵan qarttyń qaıǵysynda shek bolmaıdy. Esh jubanysh tappaı, jany mújile beredi. Arada kúnder, aılar ótse de, jeti ulynyń qylyq-qasıeti sanasynda jańǵyryp, janyn jegideı jeýmen bolady. Ábden sharasy taýsylyp, shydamy úzilgen qart kúnderdiń kúninde bir aspap jasaıdy da, jeti ulynyń rýhyna arnap jeti ishek taǵady. Sonsoń, ár balasynyń qylyq  qasıetin elestetip otyryp jeti kúı shyǵarady. Sol jeti kúıdi perzentindeı terbep, qalǵan ómirine jubanysh etip ótedi. 

Jetigen aspaby osylaısha dúnıege kelse kerek. Al, qarttyń jeti ulyna arnap shyǵarǵan jeti kúıi el ishine «Qaraǵym», «Qanat synar», «Ot sóner», «Baqyt kóshti», «Kún tutyldy», «Qusa», «Shamyrqan» degen atpen tarap edi deıdi.

---