InfoHub Logo

Myń toǵyz júz onynshy jyldary gýbernator Semeı halqyna mynadaı jarlyq habarlaǵan:

— Semeıdiń baılary, saýdagerleri, myrzalar jáne qymyz, pıvo satýshy áıelder, ártúrli aspapta oınaıtyn mýzykanttar! Aldaǵy demalysta aralǵa shyǵyńdar, óte qyzyqty jańalyq, tamasha bolady. Tamashadan qalmańdar, kedeıler barmasa da bolady, — depti.

Halyq demalys bolǵansha shydaı almaı asyǵyp, ne bolar eken dep loblyp, jaıaý saýdagerler qaltasyna bes-on somnan salyp, daıyndala bastaıdy. Qaıyqpen ótetin aralǵa kópir salynypty. Eldiń kútken demalys kúnderi de jetti. El aǵylyp aralǵa qaraı kete bastady. Elmen ilesip, men de aralǵa bardym. Halyq jınalypty. Syra satýshy bir jerge, qymyzshy bir jerge, mýzykanttar bir jerge bir top bolyp olar tur. Bıik tórt stoldy bir jerge qoıyp, ústine kilem jaıyp, onyń ústine sháıi kórpeler tósep qoıǵan.

Er-áıelder qurmettep qazaqtyń kelinshegin ákeldi. Stol qasyna kelip turyp, halyqpen sálemdesti, suńǵaq boıly, músindi, aqquba, qyzyl shyraıly, kelbetti, úlbiregen jas kelinshek. Ústinde torǵyn kóılek, shetine oqa, qundyz ustalǵan qara kemzal, basynda aq jibek shálisi bar. Aıaǵynda kóksaýyrlap kúmistelgen kebis-mási, kebisin sheship, stol ústine shyǵyp, kórpeniń ústine otyrǵyzdy. Janynda eki ishekti bir dombyrasy bar jáne jeti ishekti bir dombyrasy bar. Shálisin basyna tógilte búrkenip kelinshek otyr. Gýbernator keldi. Qasynda tórt palıseıi bar. Halyq dúrlige kóterilip, taǵzym qyldy.

Saǵat onnyń shamasy. Gýbernator ornynan turyp, halyqqa kelinshekti tanystyrdy.

— Bul kisi bizge kelgen qonaq. Jetisýdan kelgen qazaqtyń daryndy mýzykanty. Bizdiń Semeı mýzykanttarymen synǵa túsýge ádeıi kelipti. Sizder qazir osy jarysty kóresizder, — dedi de kelinshekten surady, — bul kúı tartysýdyń tártibi qalaı ótpek? — dedi.

Kelinshek:

— Bylaı bolady: áýeli sizdiń bir mýzykantyńyz eki-úsh kúı oınasyn, odan keıin onyń kúıin men oryndaımyn. Sodan keıin men úsh kúı oınaımyn, ony sizdiń mýzykantyńyz oryndaý kerek. Eger bir-birimizdiń tartqan kúıimizdi birimiz oryndaı almasaq, ol jeńilgenimiz.

Gýbernator mýzykanttaryna uǵyndyrdy. Sodan jarysqa kiristi. Birinshi bolyp bir orys mýzykanty baıan oınady. Keremet oınady. Úsh kúı tartty. Odan keıin kelinshek eki ishekti, jeti ishekti dombyramen álgi mýzykanttyń kúıin buljytpaı tartyp berdi. Ózi úsh kúı tartty, ony baıanıst birin de tarta almady. Ony jeńildiń dep bylaı shyǵaryp qoıdy. Qazaq jigitteri qany qyzyp, ishterinen árýaqqa sıynyp tur «O, Qudaılap». Gıtar oınaýshy, mandalshy, balalaıka, pıanına oınaýshylar bári jeńilip shyqty. Sodan keıin skrıpkashymen jarysty. Skrıpkaǵa tórt kúı oınady. Ony da kelinshek tartyp berdi. Sodan kelinshek tórt kúı oınap edi, skrıpkashy onyń ekeýin oınady, ekeýin oınaı almady.

Sonymen Semeı mýzykanttary jeńildi. «Báıge jetisýlyq mýzykanttiki» dep aldyna dastarqan jaıdyryp, gýbernator júz som saldy.

— Al, myrzalar, báıge syı qonaqtiki boldy. Bes somnan kem tastamańdar, — dedi, — myrzalar múmkin artyq tastar, ol ózd eriniń myrzalyǵyna baılanysty, — dedi. Qazaqtar razy bolǵandyqtan, qaltalaryndaǵy baryn tastaǵandar boldy. Kelinshektiń aldynda aqsha tóbe bolyp úıilip qaldy.

Osynyń ishinde bolǵan orta jastaǵy Maqanjan aıtty:

— Bul aty, dańqy shyqpaǵan qandaı kúıshi! Kelinshektiń eki qolynda perchatka, saýsaǵynyń ushy jezden, — dedi.

---