InfoHub Logo

Semeı oblysy, Jarma aýdany, Syban degen elde Naýryzbaı degen kisiniń Aqbilek degen sulý qyzy Elqondyda Jańabaı deıtin baıdyń kelini eken.

Jazdyń kúni kelindi ákelýge on shaqty kisi barady. Qudalardyń ishinde basshy Aǵamel aqsaqal neshe kún oıynyn, toıyn istep, endi attanarda aýyldan eki júzdeı adam shyǵaryp bir jerge toqtatyp, qyz-qotandar kórisip, qoshtasyp qaıtty. Ekinshi jerge taǵy toqtatyp, bir top adam kórisip, qoshtasyp qaıtysty. Úshinshi jerge toqtaǵanda, Mataı qudalardyń bastyǵy Aǵamel aqsaqal:

— Eı, halaıyq, jol alys, keshigemiz. Qalatyndaryńyz osy arada qalyńyzdar. Erip baratyndaryń bolsa, birge júrińder. Endi esh jerge toqtamaımyz, — dep, kelinshektiń atyn jetektep jónele bergende, tory jorǵa mingen, ádemi kıingen, kúmis turman taǵynǵan bir myrza qudalardyń aldyn kes-kestep bógep:

— Toqtańdar, qaryndasqa qoshtasyp aıtar sózimiz bar, — dep turyp aldy.

— Al, aıta ǵoı, — degen Aǵamel myrzaǵa:

— Tentek Mataı alyp ketti-aý jarymyzdy,
Jas turǵaı qaıtarmaýshy ed kárimizdi.
Barǵan jerde báıbishe bolǵyrym-aı,
Bir-bir aldyń qoınyńa bárimizdi, — degen eken.

Sonda Aǵamel aqsaqal túsinip:

— Oı, myna myrzanyń bizdiń kelinde ókpesi bar eken ǵoı. Ekeýin de attan túsirińder. Tatýlastyryp attandyraıyq, — dep qyzdyń qolyndaǵy altyn saqınasyn eskertkish úshin jigitke berip, jigittiń torǵyn oramalyn qyzǵa berip, bir-birinen keshirim suratyp, tatýlastyryp, kóristirip, qoshtastyryp attandyrypty.

Áńgime bylaı bolǵan eken: myrza Aqbilekke sóz aıtypty. Aqbilek qabyldamaǵan. Myrza: «qap, sen qyzdy halyq aldynda, qaıyn jurtyńnyń aldynda bir masqara qylarmyn» dep, daıyndalyp kelip soqtyqqan eken. Ony Aǵamel aqsaqal túsinip, ekeýin tatýlastyryp, kelinniń de abyroıyn saqtap qalǵan.

Bul — sırek kezdesetin aqyldylyq.

---