InfoHub Logo

Keıin sol Horbatel basqarǵan «Iýnskıı» shahtasynda shanashy bolyp istedim. Qazirgi jas shahterlerge «shahtada shanashy bolyp istedim» degen sóz birtúrli jat estiledi. Biz ol kezde qara jerge kómir tıelgen shana tarttyq, eńbektiń eń aýyr zardabyn shektik.

Jumysta merzimdi ýaqyt bolmaıtyn. Shahtaǵa tań qarańǵysynan túsip, odan qas qaraıa shyǵatynbyz. «Iýnskıı» shahtasynyń bastyǵy Horbatel baıdyń qolynda qaıqy qaıyń taıaǵy bolatyn. Ol kóńiline jaqpaǵan jumysshyny osy taıaqpen uryp jiberetin.

Jumys kıimdi, qural-saımandy óz jalaqymyzǵa satyp alatynbyz. Onda kıim deıtin kıim de joq edi, aıaǵymyzǵa kıetinimiz shárke bolatyn. Jer astyndaǵy tizeden keletin sýda biraz júrgennen keıin shárke bylbyrap, onyń eshqandaı lypasy bolmaı qalatyn. Dertke shaldyqpaǵan jumysshy kemde kem-aq bolatyn.

Bir kúni jumysqa túseıin dep turǵanda, Horbatel meni shaqyryp alyp:

— Balamdy jegýli atpen serýenge shyǵaryp kelesiń, — dedi. Qarasholaq at jegilgen jeńil arbaǵa Horbateldiń kishkene balasy ekeýmiz otyryp alyp, tartyp berdik. Kórgeni jaman erke bala arba qatty shaıqap ketse bolǵany, aǵylshyn tilinde mińgirlep, meni balaǵattap qoıady. Aqór deıtin jerden tómen túsip zymyrap kele jatqanymyzda, arba aýdarylyp ketti. Bala da, men de anadaı jerge ushyp tústik.

Sol kúni úlken pálege qaldym. Horbatel balasyn jyǵyp alǵanym úshin meni taıaqtyń astyna aldy. Jáne aıyp salyp, eki aptalyq jalaqymdy ustap qaldy...

Bir kúni peshten stvolǵa qaraı vagonetka súırep kele jatqanymda, eki vagonetka soqtyǵysyp, qapylysta qolym synyp qaldy. Osy kezde Horbateldiń qaıdan kez bolǵanyn bilmeımin, «jyǵylǵan ústine judyryq» degendeı shekemnen taıaqpen salyp-salyp jiberdi. Talyp qalyppyn. Qasymda jan joq edi. Shyǵys shtrekte jumys isteıtin Elegenov Etekpaı degen jumysshy jumystan shyǵyp kele jatyp, meniń soqqyǵa jyǵylyp jatqanymdy kóripti. Álýetti jigit edi, meni arqalap qyr ústine shyǵardy...

Ol kezde tańnyń atysy, kúnniń battysy jumys istegende kúnine alatynymyz 20 tıyn ǵana. İshsek asqa, kısek kıimge jarymaıtyn edik. Biraq jumysshylar da olardyń qara quly bolyp otyra bergen joq. Tipti uıymdasqan túrde talaı ret ju- mysqa da shyqpaı qoıdyq. Tóbeles te, janjal da jasadyq...

---