InfoHub Logo

Bala kótergen anamen Býrabaı kóliniń shyǵys jaq jaǵasynda ekinshi ret ushyrasyp turmyz. Ótken joly da osy arada, óz úıiniń janynda, bóbekti áldılep, baıaý ǵana yńyldap otyr edi, búgin de sol ornynda. Biraq, bul joly únsiz otyr. Tek Oqjetpeske telmire qarap qalypty.

Kól jaǵalap, dem alyp júrgen bizder ananyń janyna kelip, sóz qozǵaı bastadyq.

Ana bizben solǵyn ǵana amandasty. Suraǵymyzǵa kelte jaýap qaıyryp, sheshilip sóıleı qoımady. Kókirek kerip, aýyr kúrsindi de:

— Men bir sherli janmyn, shyraqtarym! Áńgime surap ne qylasyńdar! — dedi muńdy pishinmen.

— Ol nendeı qaıǵy, anajan?

— Joq, joq, shyraqtarym, suramańdar ony. Balasy kórgen aýyr azapty aıt dep anasyna qolqa salmas bolar. Aıta almaıdy sumdyqty ana.

Anaǵa ótinish zoraıdy. Qaýmalaǵan bizge qarap kózine jas aldy ol.

— Jas edi-aý, ol da senderdeı!..

Ana úı jaǵyna moıyn burdy da:

— Nazymjan, qurbylaryń kelip otyr. Syrtqa, salqynǵa kórpe jaıshy! — dep daýystady.

Úıden taldyrmashtaý kelgen aqquba kelinshek kilem, kórpe alyp shyǵyp tósedi.

— Qurbylaryńa as ázirle, shyraǵym.

Kóksheniń ıýl aıyndaǵy ásem keshinde Oqjetpeske mańdaıymyzdy berip, jupar samaldy keýdege toltyra juta otyryp, ana áńgimesin tyńdaýǵa kiristik.

Ol úıge kirip shyqty da:

Jan balamnyń jaıyn, ananyń qaıǵysyn bilgileriń kelse, má, mynaý aıtady, óz qolymen jazylǵan,— dep bizge bir dápter usyndy.

Mine, meniń qolymda tozyǵy jetken eski dápter. Jıekteri jyrym-jyrym. Qara qaryndashpen jazylǵan jazýlardyń keıbir jerleri óship, kómeskilenip qalǵan. Biraq ón nusqasy túgel neler qoldy kórip, neler qoldan ótken júdeý dápterden syr tyńdadyq.

---