InfoHub Logo

Uıqy bezi aýrýlaryna soqtyratyn sebepter

Dertti damytatyn negizgi sebepter - alkogóldik ishimdikke úıirlik jáne óttasy aýrýy. İshimdikten bolǵan pankreatıt aýrýlardyń 25-60%-da, negizinen er adamdarda kezdesedi. Ót qaby aýrýlarynan týyndaǵan pankreatıtter 25-40% jaǵdaıda, kóbine áıelderde ushyrasady. Atalǵan eki topqa taǵy úshinshi top - ultabardyń aýrýlary qosylady, al tórtinshi topqa budan basqa ártúrli sebepter jatady. Sońǵy topqa jaraqattar, ýytty dári-dármekter qabyldaý, V jáne S gepatıtterin, parotıtti qosqanda túrli juqpalar, qanda maıdyń shamadan tys kóp bolýy jatady. Sozylmaly pankreatıt qantty dıabet kezinde paıda bolýy múmkin. Keı adamdarda pankreatıtke tektik beıimdik bolady.

Uıqy beziniń zaqymdanýy jáne jiti pankreatıttiń týyndaýy

Maıly jáne aqýyzy mol taǵamdy birshama alkogóldi ishimdikpen birge qabyldaý uıqy beziniń fermentterdi shamadan artyq óndirýine alyp keledi. Bul fermentter uıqy bezi joldary arqyly ishekke túsip, as qorytýǵa qatysýy tıis. Eger uıqy beziniń jumysy jetkiliksiz bolsa, onyń joldary aqýyz tyǵyndarymen bitelýi múmkin, osydan kele fermentter bez tinine enip, ony zaqymdaıdy da aǵzanyń qabynýyna alyp keledi. Bezge ishimdik, ásirese onyń ydyraýynan paıda bolǵan asetaldegıd, úlken nuqsan keltiredi. Osylaısha jiti alkogóldik pankreatıt damıdy.

Aýrý belgileri jáne naqtamalanýy

İshtiń joǵarǵy bóliginiń arqa jaqqa berile otyryp, údemeli aýyrýy, júrektiń aınýy, qusý, tábettiń joǵalýy, ishtiń kebýi. Qusý adamǵa esh jeńildik ákelmeıdi, odan keıin aýyrsyný toqtamaıdy. Jalpy álsizdik, júrektiń qaǵýy, deneniń ysýy múmkin.

Jiti pankreatıttiń qaýiptiligi

Aǵzanyń búliný oshaqtary - nekrozdar damýy nemese bezdiń kóp bóliginiń erýi (pankreanekroz) múmkin. Osylarmen birge jiti júrek-qan tamyr jetkiliksizdigi, tynys alý, búırek jetkiliksizdigi jıi damıdy. Bul atalǵan belgilerdiń saldarynan adam aýrýdyń alǵashqy kúnderinde ólip ketýi múmkin. Jiti pankreatıt bastalǵannan bir aptadan soń syrqattyń qaza bolýyna uıqy bezinde jáne ony qorshaǵan aǵzalarda juqpanyń damýy sebep. Bul aýrýdan bolatyn ólim-jitim 30%. Asqynǵan syrqatpen qatar asqazan men ishekte kóbine oıyq jaralar paıda bolyp, olardan qan ketedi.

Jiti pankreatıt belgileri baıqalsa, ne isteý kerek?

Shuǵyl dárigerge baryńyz. Sizdi mindetti túrde aýrýhanaǵa jatqyzý kerek. Ol jerde aýyrsyzdandyrý sharalary jasalyp, aǵzany tazartatyn qarqyndy em júrgiziledi. Eger uıqy bezinde búliný oshaqtary bolsa, otalaý qajet.

Eger jiti pankreatıtti bastan ótkerseńiz

Bul aýrýmen syrqattanǵan adamdar bir jyl boıy gastroenterologtyń baqylýynda bolýy tıis. Bul kezeńde ashshy, maıly, qýyrylǵan taǵamnan jáne spırtti ishimdikterden múlde bas tartý kerek. Bul jiti pankreatıt qaıtalanbaý úshin qajet.
Pankreatıtti emdeýde mindetti shart - dárigerdiń kásibı deńgeıiniń joǵarylyǵy jáne biliktiligi, sondaı-aq emdelýshimen birlese otyryp, nátıjeli jumys júrgizý.

G.J. Jatqanbaeva terapevt dáriger