InfoHub Logo

Mashka jáne jańa jol

Kishkentaı bir garajda Mashka esimdi aq kólik turypty. Bul garaj ormanǵa jaqyn jerde ornalasqan edi. Sondyqtan Mashka ormanǵa jıi baryp turatyn. Ádette ol garajdan tup-týra bulaqqa alyp baratyn soqpaqpen serýendeıtin. Jańbyr kóp jaýyp, oı-shuqyrly bolyp ketken soqpaq keń bolsa da óte yńǵaısyz edi. Keıde shuńqyrlar sýǵa tolyp qalǵanda Mashka qansha tyrysyp aqyryn júrse de ústi-basy batpaq bolyp qalatyn. Endi qalasa da, qalamasa da Mashka úıine batpaq-batpaq dóńgelekterin áreń súırep jetetin. 

Kóktem kelip, shalshyq sýdyń barlyǵy kepken kez. Mashka soqpaqtyń oı-shuqyryn ańdap basyp, serýendep kele jatqan. Kenet ol aldynan kóp beıtanys úlken kólikterdi kórdi. Mashka jaqynyraq kelip, uzaq qarap turdy. Munda júk kólikteri de, traktorlar men ekskavatorlar, úlken júk tasyǵysh kólikter, tipti aldynda úlken biligi bar jol tegistegish kólik te bar eken. Olardyń bári daryldap, gýildep, býdaqtatyp tútin shyǵaryp qyzý iske kirisip ketipti. Tipti kishkentaı Mashkany úlken aryqqa qulatyp jibere jazdady.

— Keshirińiz, – dedi Mashka júk kóligine, - siz maǵan munda ne bolyp jatqanyn aıta alasyz ba?

— Jumys istep jatyrmyz, - dedi júk kóligi.

— Sonda, qandaı jumys istep jatyrsyzdar?

— Jol jasap jatyrmyz.

— Biraq, munda jol bar ǵoı, - dep tań qaldy Mashka.

Biraq, júk kóligin jaýap berip úlgermesten jumysqa shaqyryp, ol ketip qaldy.

Mashka shetke shyǵyp turdy. Óıtkeni jolmen úlken-úlken kólikter ári beri birnárseler tasyp ótip jatty. Mashka bul suraqty úlken júk tasyǵysh kólikke de qoıǵysy kelgen. Biraq onyń qatty gúrildep, tarsyldaǵany sonsha, kishkentaı Mashkanyń onyń janyna barýǵa batyly jetpedi. Kenet ol sary jolaqtary bar kók traktordy kórip qaldy. Traktor kóńildenip, ojaýymen ala dopty terbetip tur eken. Ózine qyzyǵa qarap turǵan Mashkany birden baıqady.

— Sálem! – dep aıqaılady ol. – Qane, beri kel. Birge oınaıyq!

— Sálem. Seniń esimiń kim?

— Kotka.

— Al meniki – Mashka kólik. Kotka, sen munda ne bolyp jatqanyn bilesiń be?

— Árıne, bilemin! Munda jańadan jol salady. Anaaaý eń úlken ekskavator meniń ákem. Ol meni osynda ózimen birge ertip ákeldi. Biraq, onyń jumys isteýi kerek. Sondyqtan, jalǵyz oınap júrmin.

— Al jańa joldyń ne qajeti bar?- dep surady Mashka.

— Endi...júrgenge jaıly bolsyn dep. Qane, menimen júr. Jaqyn baryp, tamashalaıyq.

Mashka men Kotka aınalany jaqsy kórý úshin kishkene tóbeshiktiń ústine shyqty da, kók shópke jaıǵasty..

— Áne, kórdiń be, –dedi Kotka, – áýeli traktorlar eski joldy tegisteıdi. Áne, qarashy, olar ojaýlarymen joldaǵy tastardy alyp, onyń ornyn qummen toltyryp jatyr.

Rasymen de úsh traktor júk kóligi alyp kelgen qumdy jol boıyna tógip jatyr eken. Bir kezde shuńqyrdyń bári kómilip, jol tep-tegiske boldy.

— Endi ne isteıdi? – dep surady Mashka. – Jol onsyz da tep-tegis boldy ǵoı.

— Bul tek basy ǵana, – dedi Kotka.

Bir kezde úlken júk tasyǵysh kólik keldi de joldyń shetine  bir tirkeme toly shaǵyl tastardy tógip ketti. Sol sátte-aq traktorlar álgi shaǵyl tastardy ojaýlarymen jol boıyna tasyp, tóge bastady. Olardyń jumysy óte kóp. Shaǵyl tas qum sıaqty emes, salmaqty eken. Biraq, kóp uzamaı búkil joldyń boıyna tas tóselip shyqty.

— Mine, keremet! – dep aıqaılap jiberdi Mashka. – Boldy, endi osylaı qala berse bolady. Qarashy, qandaı tegis boldy jol!

— Áli budan da jaqsy bolady! – dep mańǵazdana jaýap qatty Kotka. – Kimniń kele jatqanyn qarashy!

Rasymen de biriniń artynan biri úsh júk kóligi keldi de, joldyń qaq ortasyna qap-qara tútindegen bir qoımaljyń qorytpany tóge saldy.

— Oıbaı, mynasy nesi? Batpaq pa? Mynaý degen... – dep aıqaılap jiberdi Mashka.

— Bul asfált.

— Kim?

— Kim emes, ne. Asfált.

— Al onyń ne qajeti bar?

— Bul jol tep-tegis, túzý jáne myqty bolý úshin kerek. Muny tósegen jolda shuńqyr bolmaıdy..

Shaǵyl tastardy tasyp sharshaǵan traktorlar taǵy da damyl tappaı ojaýlarymen asfáltty tası bastady. Al olardyń artynan jol tegistegish kólik asyqpaı júrip kele jatty. Ol óte baıaý júrip, óziniń úlken, ári salmaqty biligimen asfáltty tegistep keledi. Kóp uzamaı joldyń ón boıy tep-tegis, qap-qara asfáltpen jabyldy. Asfált býlanyp, asyqpaı kebe bastady. Bastapqy qap-qara túsi súr túske aınaldy.

— Mine, endi boldy. – dedi Kotka. – Endi jol tep-tegis boldy. Budan bylaı shalshyq sýlar turmaıdy. Endi sen qalaǵan jaǵyńa jeldeı zýlap jetip alatyn boldyń.

Kesh bata bastady. Kún orman asyp, kókjıekke jasyryndy. Kún salqyn tartqandaı. Mashka da jaýrap qaldy. Kotkany ákesi kelip, úıine ertip ketti. Kotka traktor erteń de osy jerge kelip, Mashkamen birge bulaq basyna barýǵa ýáde berdi.

Aqyryndap júk kólikteri de, traktorlar da úılerine tarasty. Olar jańa, tep-tegis jolmen júrdi.  Báriniń artynda ketip bara jatqan Mashka endi bulaqqa deıin tez jetetinin kórip, qatty qýanyp keledi. Tipti qatty sirkirep jaýyn jaýsa da, endi onyń dóńgelekteri qup-qurǵaq bolyp qalatyn boldy.

 

Mashka men gúlzar

Bir kúni tańerteń Mashka dosy Olejkanyń temir kúrekpen jer qazyp jatqanyn kórdi.

— Sálem, Olejka! – dep aıqaılady anadaı jerden Mashka. – Sen qummen oınaǵyń kelip pe edi? Biraq qum ana jaqta, balalar alańynda ǵoı.

— Maǵan qumnyń keregi joq, - dep mańǵazdana jaýap qatty Olejka. – Men gúlzar jasap jatyrmyn.

— Gúlzar degen ne?

— Gúlzar ma...gúlzarǵa gúl otyrǵyzady.

— Qarashy, aınalamyzda gúl kóp qoı, - tep tańyrqaı qarady Mashka. – Qara, ógeıshóp bar munda. Kóp uzamaı baqbaq ta gúl ashady. Sodan keıin túımedaq.

— Al men munda nárkesgúl otyrǵyzamyn. Óte ádemi gúl. Ol ózdiginen óspeıdi. 

— Al qazir ne isteısiń?

— Áýeli, jerdi qazamyn. Sodan keıin sý quıyp, gúldiń uryǵyn egemin, - dep jaýap qatty Olejka.

— Men saǵan kómektessem bola ma?

— Árıne.

Olejka kishkentaı kúregimen jer qazýyn jalǵastyra berdi. Ábden sharshaǵan kezde baryp, gúlzar úshin osy da jeter dep sheshti. Sodan keıin jumyr tastarmen gúlzaryn qorshap, Mashkany shaqyrdy.

— Al gúlder qaıda?- dep tańyrqaı surady Mashka.

— Gúlder qazir óspeıdi. Sen onan da myna sý quıǵyshty al da, maǵan sý ákelip ber, -  dep Olejka Mashkany paıdaly iske jumsap jiberdi

Mashka tez baryp, ydysyn toltyryp turyp sý ákeldi. Olejka sýdy jerge quıdy da, qaltasynan kishkentaı búktelgen qaǵazdy alyp shyqty. .

— Onyń ishinde ne bar – dep qyzyǵýshylyq tanytty Mashka.

— Bul uryqtar.

— Oı, qandaı kishkentaı! Osydan shynymen de gúl ósip shyǵa ma?

— Óskende qandaı! Eń ádemi gúl ósip shyǵady.

Olejka uryqty topyraqqa tastap, betin tyrmaǵymen jaýyp, gúlzaryn ádemi etip tegistep qoıdy. Endi kúnde tańerteń Mashka men Olejka gúl ósip kele jatyr ma dep, gúlzarǵa qarap otyratyn boldy. Tek bir aptadan keıin ǵana jerden kip-kishkentaı, jap-jasyl órken kórindi. Ózi sondaı názik. Bir kúnnen keıin ol kádimgideı ósip qalypty. Al úshinshi kúni Mashka ár sabaqtan eki jińishke japyraqsha baıqady. 

— Endi kóp uzamaı gúl ashady, - dep qýandy ol.

Sabaqtary kún sanap ósti, japyraqtary da úlkeıdi. Masha sý tasıdy, Olejka ony gúlge quıady. Bir kúni...

— Olejka, Olejka, qarashy! – dep qýana aıqaılady Mashka. – Gúldiń qaýyzy!

Rasymen de bir sabaqta tompıǵan tompaq gúl qaýyzy paıda bolypty. Kelesi kúni olardyń san úshke, sodan keıin jetige, tipti biraz kúnnen keıin sabaqtyń ón boıy gúl qaýyzyna tolyp ketti.  Endi dostar gúlzarda kúni boıy otyryp, álemdegi eń ádemi gúliń ashylýyn taǵatsyzdana kútetin boldy.

— Nege sonsha uzaq kúttirdi eken, a? – dep kúrsindi Mashka.

— Esesine, bizdiń gúlimiz bir aı boıy jaıqalyp turatyn bolady! – dedi Olejka ony jubatyp. 

Rasymen de, bir kúni tań shapaǵymen birge Mashka bir gúl qaýyzynyń ashylǵanyn kórdi. Onyń ishinen kishkentaı ǵana kúlteler shyǵyp, kóp uzamaı sary nárkes gúl jaınap shyǵa keldi. Nárkes dese degendeı-aq, kúlteleri sondaı názik, jup-juqa. Eki ara sol sátte-aq osyndaı ádemi gúlge talasyp qaldy. Mashka gúlzardyń janynda jarty kún boıy otyrdy. Kútken eńbegi bosqa ketpeı, sol kúni taǵy bir gúl qaýyzyn ashyp, ádemi gúl jardy.

Al kelesi kúni… gúlzardyń ishi nárkes gúlmen jaınap turdy. Olejka Mashka ekeýi gúlderin abaılap sýardy. Olar qýanyshtan gúlzarlaryn aınalyp, bıleı jóneldi.

 

Mashka men Folksvagen

Bir kúni tańerteń Mashka atasy Folksvagenniń qal-jaǵdaıyn surap barmaq boldy. Atasy Mashkanyń garajynan alys emes jerdegi úlken garajda turatyn. Ol jańa asfolt jolymen atasyna jetkenshe sharshap ta qaldy. Atasy Mashkany qýana qarsy aldy. Dastarhanyn jaıyp jiberip, ystyq-ystyq shaı quıyp, tańqýraıdyń tosabyn aldyna tosty. Mashkadan sońǵy jańalyqtardy surastyrdy. Mashka oǵan gúlzar týraly, jańa jol týraly aıtyp berdi. Bir kezde ol atasynan:

— Ata, aıtyńyzshy, men dúnıege kelmeı turyp qandaı kólikter bolǵan edi?- dep surady.

— Ee qaraǵym, eń alǵashqy kólikter býmen júretin. Onyń ústine sý quıatyn úlken qazandyǵy bolatyn. Ydystyń astyna ot jaǵatyn pesh ornalastyrǵan. Sol peshken ot jaqqan kezde, sýy qaınap bý shyǵatyn. Al bý qozǵaltqyshty qozǵaltatyn. Biraq, mundaı kólikter óte aqyryn júretin. Onyń ústine ózimen birge úlken sý quıatyn qazandy, kirpishten jasalǵan peshti, aǵashtar men sýdy alyp júrýine týra keldi.

— Al ondaı kólikpen qansha adamdy tasymaldaıtyn? – dep surady Mashka.

— Júrgizýshi men bir jolaýshy.

— Sodan keıin siz tasymaldadyńyz ba?

— Joq. Odan keıin janarmaıly qozǵaltqyshty oılap tapty. Muny ishten janý qozǵaltqyshy dep te ataıdy.

— Sonda, onyń ishinde birnárse jana ma?

— Árıne. Janarmaı janady. Ol ot alyp, motordaǵy mikbasty aınaldyrady. Al ol dóńgelekterdi aınaldyrady.

— Men de solaı júremin be?

— Sen de, men de...Basqa kólikter de solaı júredi, - dedi Folksvagen ataı. – biraq, alǵashqy kóliktiń motory óte shaǵyn boldy. Sondyqtan aqyryn júretin. Onyń ústine, dóńgelekteri de basqasha bolatyn. Aǵashtan jasalǵan. Shınasy da joq.

— Mássaǵan! Ol qatty tarsyldap júrgen shyǵar! – dep qatty tańqaldy Mashka.

— Jolaýshylar onymen júrgende selkildep, kóp ábigerge túsetin,- dep jaýap berdi atasy.

— Al shınalardy qashan oılap tapqan?

— Ee, qaraǵym, ony men dúnıege kelmeı turyp oılap tapqan. Sodan keıin synbaıtyn áınek jasaldy. Burynǵy kólikterdiń áınekteri týra terezeniń áınekteri sekildi edi. Apat bolǵan jaǵdaıda jolaýshylar synǵan áınekterden kóp zardap shegetin.

— Rasymen de. Qazirgi áınekter synyp ketpeıdi, úgitilip túsedi. Alǵash júrip úırengen kezimde, aǵashqa soǵylyp...

— Ee, ol jaǵdaı esimde!- dep kúldi atasy. – Bir kezderi kólik óte qymbat bolǵan. Ony tek qoly jetkender ǵana alatyn. Olardyń shamdar hrýstaldan jasalǵan. Biraq, ýaqyt óte kele qýatty qozǵaltqyshtar paıda bolyp, kólikter edáýir arzanǵa tústi. Burynǵyǵa qaraǵanda ádemi, qaýipsiz bolyp, jyldamdyǵy da arta tústi.

— Qaýipsizdik beldigi osy úshin kerek eken ǵoı! – dep aıqaılap jiberdi Mashka. – Apat kezinde qatty soqqy almaý úshin úrlemeli jastyqsha da ornatyp qoıypty. 

— Iá, sen áli kishkentaısyń. Sondyqtan sende áli qaýipsizdik beldigi joq. Al men kári bolǵandyqtan úrlemeli jastyqsham da joq... – dedi Folksvagen qarıa.

Mashka shaıyn tez-tez ishe salyp, atasymen qoshtasty da, búgingi motor, shına, qaýipsizdik beldigi týraly jańalyqtaryn Olejka dosyna jetkizý úshin júgire jóneldi.

 

Mashka aılaqta

Bir kúni Mashka Olejkamen birge aılaqqa keldi.

— Kórdiń be, qandaı úlken keme. Týra úı sıaqty! – dep aıqaılap jiberdi ol qýanǵannan. – Kóp qabatty. Terezesi de kóp eken. Qarashy, ústinde tipti adamdar júr. Bul ózi qandaı keme?

— Bul teplohod. Jolaýshylar kemesi, - dep mańǵazdana jaýap qatty Olejka. – Ol jerde jolaýshylarǵa arnalǵan kaıýta, haýyz, kitaphana, emhana tipti meıramhana da bar. Keme teńizde, muhıtta júzedi. Kórdiń be, ol túp-túzý ári uzyn, aldy súıir. Bul onyń jyldamdyq alýy úshin kerek.

— Áne, qarashy. Ana jaqta taǵy bir keme. Ózi keń, alasa, úlken qubyry da bar eken. Ústinde bóreneler jatyr.

— Al bul aǵash tasıtyn kemek. Onyń keń, ári alasa etip ádeıi jasaǵan. Sýda júzgende aýdarylyp ketpeı, myǵym bolýy úshin. Óıtkeni onymen aýyr júkterdi tasymaldaıdy, - dedi Olejka.  Mashka ekeýi jaǵalaýda júrip, kemelerdi tamashalady. Kún ashyq, jyly bolatyn. Sondyqtan olar qýana qydyrdy. 

— Qarashy, Mashka. Áne, taǵy bir júk kemesi. Ol da júk tasyǵysh keme. Onyń júk tasıtyn trúmy óte úlken. Al joǵarǵy jaǵyndaǵy úlken kran júkterdi kemege salý úshin kerek. 

— Sonda, onymen ne tasymaldaıdy?

— Qalaǵanyńnyń bárin tasıdy. Qum deısiń be, kómir deısiń be, bári-bári osymen tasymaldanady. Munymen tipti úlken bóshkeler men jáshikter de tasymaldanady, - dedi Olejka.

— Al sen munyń bárin qaıdan bilesiń?- dep tańyrqaı, ári qyzyǵa surady Mashka.

— Maǵan ájem aıtqan. Ol keme jasaıtyn zaýytta jumys isteıdi, - dep maqtana jaýap berdi Olejka. Ol kemelerdi anyǵyraq kórý úshin sákiniń ústine shyqty.

— Qarashy, Mashka, mynaý tanker! Ústindegi úlken sısternany kórdiń be? onymen munaı men janarmaı tasymaldaıdy, - dep aıqaılady Olejka. Mashka tankerge dy qyzyǵa qarady. Sodan keıin jaǵalaýdyń shetindegi kemeni kórip qaldy da, Olejkaǵa aıqaılady:

— Qarashy, qarashy, ana motorly qaıyq kip-kishkentaı bolyp alyp ózinen úlken kemeni súırep júr! Ne degen kúshti edi ózi!

— Bul súıreýshi ǵoı! Onyń motory óte qýatty. Súıreýshi kemelerdi aılaqqa súırep keledi. Eger keme buzylyp qalsa, súıreýshi ony jóndeýge súırep aparady.

— Eh, eger men de keme bolǵanymda, osyndaı súıreýshi qaıyq bolar edim, - dep armandady Mashka.

Olejka onyń sózine kúldi.

— Sen kishkentaı kóliksiń. Qalaısha keme bolmaqsyń?

— Rasymen de. Kún sýyqta sýyq sýda júzgen qıyn shyǵar, ıá?

— Al sen muzjarǵysh keme týraly bilesiń be? Olar jyl on eki aı  sýyqta, soltústikte jumys isteıdi. Basqa kemelerdiń jolyn ashyp, teńiz ben muhıttaǵy alyp muzdardy jarady.

— Odan basqa taǵy qandaı kemeler bolady? – dep surady Mashka.

— Jaqyn jerge adamdardy tasymaldaıtyn saldar bar. Jáne travý..tralevý...tra...tra-ý-le-r bar. Olar úlken torlarmen balyq aýlaıdy. Buryn kemeler jelkender arqyly qozǵalǵan. Ol kezde motor bolmaǵan.

— Olejka, júr, baryp shomylaıyq. Kún ysyp ketti! – dedi ábden sharshaǵan, biraq kúnin qyzyqty ótkizgen Mashka.

 

Mashka adasyp qaldy

Bir kúni Mashka adasyp qaldy. Oqıǵa bylaı boldy. Tańerteń Mashka kólik pen Olejka balaqaı ózen basyna serýendeýge bardy. Olar uzaq oınady, bulaq jaǵalaı júgirdi, sýdy sholpyldatyp shashty, baqa ustady. Ábden sharshaǵan eki batyr alańqaıda demalyp otyrǵan.

— Olejka, qarashy, ana jerde kópir bar eken, - dedi kenet Mashka.

— Rasymen de! Men buryn munda kópir baryn bilmeppin, - dep tańqaldy

— Kópirge barsaq, qalaı qaraısyń? – dedi Mashka.

Olejka kelisip, basyn ızedi.

— Biraq, kópirdiń janynan baryp, tek qana kóremiz. Kópirden ary ótpeımiz.

Olejka men Mashka kópirge keldi. Ol óte tar, tómen salbyrap turǵan kópir eken. Tipti sýǵa tıeıin dep tur. Sýdyń osy tusy keń eken. Sondyqtan kópir ormanǵa deıin sozylyp jatyr. Kópirdiń ústinde shegirtke shyryldap otyr, astynda baqa sekirip júr. 

— Qandaı keremet! – dep qýanǵannan aıqaılap jiberdi Mashka. – Kelesi jaǵalaýǵa shyǵaıyq.

— Menińshe, olaı etpegenimiz durys, - dedi saqtyqpen Olejka. – Biz buryn ol jaqta bolǵan joqpyz ǵoı. Eń durysy, janymyzǵa Folksvagen atańdy ertip alaıyq.

— Aıtady ekensiń-aý! Áýeli atama barý kerek, ony kóndirip, qaıtadan osynda kelý kerek...Bulaı júre bersek, kesh batyp ketedi. Onan da ózimiz baryp, kishkene oınaımyz da, tez qatyp keleıik, - dep boı bermeı qoıdy Mashka.

— Biraq, biz úıden alystap ketemiz ǵoı. Meni apam izdep qalyp júrer. Apama túski asta úıge kelemin dep ýáde bergenmin, - dedi Olejka.

— Túski asqa deıin kelemiz ǵoı. Biz bar bolǵany arǵy jaǵalaýda kishkene qydyramyz da, tez kelemiz. Muny tipti eshkim bilmeı de qalady.

— Joq, Mashka, bolmaıdy. Úlkenderden urys estip qalamyz ǵoı.

— Eshkim bilmese, qalaı ursady eken?- dep aıtqanynan qaıtpaı qoıdy Mashka.

Búgin Mashka qyrsyǵyp tur. Qandaı oıyn oınaý keregin únemi Olejka aıtady. Endi búgin óziniń kezegi.

Olejkanyń qoı degenine qaramaı, Mashka kópirge shyqty. Kópir óte tar eken. Olejka Mashkanyń artynan birden júgirip ketýge batyly jetpedi. Kópir synyp ketip, sýǵa qulaıtyndaı kórindi.

Mashka alǵan betinen qaıtpaı, arǵy jaǵalaýǵa biraq shyqty. Biraq, dóńgelegi jerge tıgeni sol edi...kópir synyp ketti. Mashka men Olejka eki jaǵalaýda qaldy.

— Olejka, – dep aıqaılady Mashka, - endi men ne isteımin? Meni tezirek qutqar!

— Kópir synyp ketti ǵoı! Saǵan jete almaımyn! – dep aıqaılady myna jaǵalaýdan Olejka. Ol Mashka úshin qatty qorqyp ketti. Ol bóten jaǵalaýda jalǵyz ózi qaldy ǵoı!

— Onda, tez baryp, meniń atamdy shaqyryp kel. Ol birnárse oılap tabady! – dep aıqaılady Mashka.

— Seniń atań alysta turady ǵoı. Onan da apamdy shaqyraıyn.

— Jo-joq. Ol bizge ormanǵa kelýge ruhsat bermeı qoıady.

— Onda, ne isteımiz? – dep jylarman boldy Olejka. Mashka búgin nege sonsha qyrsyǵyp qaldy eken?!

— Onda, bylaı isteıik. Men ózendi jaǵalap tómen túse bereıin. Sonda ormanǵa kirgen jerden shyǵamyn.

Mashka motoryn otaldyryp, ózen boıymen tómen jol tartty. Olejka Mashkanyń sonsha qyrsyǵyp, óziniń tilin almaı qoıǵanyna qatty renjidi. Ol bárin apasyna aıtý úshin, úıine ketti. Múmkin, apasy birnárse oılap tabar.

Al Mashka bolsa bul kezde orman súrleýimen jan-jaǵyna qaramastan tómen júre berdi. Ózin ózen boıymen júrip kele jatyrmyn dep oılady. Mashka toqtaǵan kezde esh jerden sý kóre almaı, tańqaldy. Aınalasy tek aǵashtar. Shyrshalar men kókterekter ǵana. Tipti, qaıyń da joq.

Mashqa qatty qorqyp ketti. Ol adasyp qaldy!

Áýeli Mashka jylap almaq boldy. Sýyna aldyńǵy áınegine shashyratyp, biraz jylap alǵannan keıin ol ári qaraı ne isteý keregin oılana bastady. 

— Ormanda qasqyr bar shyǵar. Olar meniń dóńgelegimniń jelin shyǵaryp, motorymdy shashyp tastaıtyn shyǵar.

Mashka jan-jaǵyna qarady. Qasqyrdyń qarasy kórinbeıdi. Tek saıraǵan qustar bolmasa. Mashka kók shalǵynǵa otyryp, jaqsylap oılanbaq boldy. Bir kezde jańbyr tamshylaı bastady. Tek sol kezde ǵana Mashkaǵa jaqsy bir oı keldi. Kelgen jolymen keri júrý kerek. Sonda ózenge barady. Ol uzaq júrdi. Baǵanaǵy soqpaq ony ormannyń tereń túkpirine aparyp tastaǵandaı. Kenet sýdyń syldyryn estip, qatty qýanyp ketti. Ol jyldamdyǵyn burynǵydan da arttyra tústi. Kóp uzamaı ol kópir turǵan jaǵalaýǵa da jetti. Ol jaǵalaýǵa otyryp, eshqaıda barmastan tapjylmaı Olejkany kútti.

Bir kezde Mashka Folksvagen atasyn kórip, qýanyp ketti. Ol Olejka men anasyn alyp kelipti. Atasy úlken úrlenbeli qaıyqty úrlep, Mashkaǵa júzip bardy.  Mashka atasy ursady eken dep, qatty qorqyp ketti. Biraq ol bar bolǵany:

— Sen óz qyrsyqtyǵyńnan sabaq alǵan bolarsyń dep oılaımyn. Qane, tez otyr. Olejkanyń apasy bizdi bálish pisirip, shaıǵa shaqyrdy.

Mashka ómirinde osylaı qýanbas. Ol bas salyp, atasyn qatty qushaqtap aldy.

Olga Ryndına

Orys tilinen aýdarǵan: Mıra Sembaıqyzy

---