InfoHub Logo

Aısáýle ARDAQQYZY

Jýrnalısıka mamandyǵynyń 3 kýrs stýdenti

Men ony kósheden kezdeısoq keziktirdim. Úsh uıyqtasam da túsime engen jan emes edi. Tek sanamdaǵy sansyz suraqtardyń ıesi bolatuǵyn.

Jan dúnıem alaı-dúleı. Bir nárseniń bolatynyn sezetindeı kúımen sabaqqa shyqtym. Kenet jaıaý júrginshiler jolynan ótip kele jatyrǵan júzi tanys jandy kórdim... Ol...

Pendelerdiń peshenesine ajyrasý jazylǵan bolsa, Allanyń buıryǵynan asyp qaıda barasyń?! Sonda súıip qosylǵan eki adam nege túsinistik tappaıdy eken? Ómirdiń óz aqıqatyna júginseńiz, jaqsy menen jaqsynyń, jaman menen jamannyń, tipti bir jaqsy men bir jamannyń da tútinderin tútetip, bir otbasynda kún keship jatqanyn kóz kóredi. Olar baqytty ma? Bálkim, múlde baqytsyz bolar?! Biraq, ajyraspaǵan. Osyny kórgende, az ǵana aılardyń aıasynda qushtarlyqpen qosylyp, kóp uzamaı-aq ajyrasa salǵan óz aǵam men jeńgeme degen ókpem qaıtadan qara qazandaı bolyp shyǵa keledi.

«Eger mende jeńge bolǵanda...» degen tátti qıalymnyń shegi joq mende. Uzaq kútken jeńge men qaıyn sińiliniń arasyndaǵy baılanystyń ǵumyry qysqa bolatyn bilgenimde osynshama qıalyǵa erik bermes edimǵoı. Ár adam óz ómiriniń qojaıyny. Alla Taǵala olardy osylaı jaratsa kerek. Al biraq meni nege oǵan búgin keziktirdi eken... Onyń jaǵdaıy bolmaı júrgenin, burynǵy men biletin jeńgem emes ekendigin estigem uzynqulaqtardan. Búgin oǵan kózim jetkendeı. Men biletin jeńgem bolsa ol sán qýǵan, bet kútimine erekshe nazar aýdaratyn jan bolatyn. Al bul jolǵy jeńgem men estigen adamnan áldeqaıda sýyqtaý.

Ekeýmiz bir aıaldamada turmyz. Onymen tildeseıin degem biraq, ash qasqyrdaı oǵan jalp berýdi ábestik dep tanydym da uıaly telefonymnan kóz almaı turyp qaldym. Alaıda, tamaǵymdy kernep, ózegimdi órtegen ashshy ýdy qalaı shyǵararymdy bilmeı dalmyn. Sóıtti de meniń áljýastyǵym aıaldamaǵa kelgen avtobýstyń sanyna qaramastan mingizip áketti. Men tek onyń janarynda tuńǵan muńdy kórip, ishteı syrlasyp kettim. Biraq, keıin ol isime qatty ókindim. Aq Jaıyqtyń aq dıdarly arýynyń júrek úni men háli osy aıaldamada qalyp qoıdy. Tátti kúnderden bastalyp, kezdeısoq kezdesýlermen jeńge men qaıynsińililik ómir támamdaldy. Tátti ómir – bir shynaıy kezdesýlerge sep boldy. Sol shynaıy kezdesýlerdiń belgisi bolyp, aq júregimdi muńǵa toly saǵynysh qaldy.

---