InfoHub Logo

— Sálemetsiz be, ápendi?

— ..?

— Ápendi, sálemetsiz be?

— Qaıyrly kesh!

— Mazańyzdy almaımyn ba?

— Jo-ǵa... Tek... sizben qaıda jolyqqanym esime túspeı tur.

— Biz jolyqqan emespiz... Ha-ha! Búginge deıin...

— Á, solaı de...

— Qarasam: bir kisi shoshaıyp jalǵyz iship otyr, qoı, serik bolaıyn, tanysaıyn dep oıladym.

— Á-á-á...

— Qalaı, tanysqanymyz úshin ishemiz ǵoı?!

— İshpegende she?..

— Men jalǵyz otyryp ishkendi unatpaımyn. Joldas-joralaryńmen nemese dosyńmen birge ishý kerek.

— Al men yrdý-dyrdýdy unatpaımyn, jalǵyz otyrǵandy qalaımyn...

— Jalǵyzdyń qudaıǵa ǵana jarasady deıdi...

— Maǵan da jarasady. Tek: onyń jalǵyzdyǵy — bárimizge kerek, al meniń jalǵyzdyǵym — ózime ǵana kerek...

— Ádemi aıttyńyz! Kelińiz, sizdiń ózińizge ǵana kerek jalǵyzdyǵyńyz úshin ishelik!

— Raqmet sizge!

— Meniń janyma kelip otyrmaısyz ba?

— Raqmet, sizdi mazalaǵym kelmeıdi...

— Onda men sizdiń janyńyzǵa barsam she?

— Meılińiz!

— Qýana-qýana baramyn. Al, halińiz qalaı, ápendim?

— Halim be? Onyń nesin suraısyń?! Búıtip júrgenshe ólgen artyq.

— O ne degenińiz... Saryýaıymǵa salynbańyz! Qane, sizdiń densaýlyǵyńyz úshin!

— Sizdiń de!.. Al ózińizdiń halińiz qalaı?

— Meniń be? Tamasha! Óte jaqsy!

— Baqytty ekensiz... Árqashan osylaı shat-shadyman júrýińizge tilektespin!

— Endi osy úshin alyp qoıalyq! Men osy qabaqty unatamyn.

— Al maǵan múlde unamaıdy...

— Sizge kazıno, úlken restoran kerek qoı?

— Jo-ǵa.

— Sý jaǵasyndaǵy kafeler kerek pe?

— Qajeti besh-aq tıyn.

— Endeshe nege otyrsyz?

— Bilmeımin... İship qana shyǵaıyn dedim... Kelińiz, endi bir-bir rúmkadan!

— Sizdiń kóńil-kúıińiz kóterilýi úshin! Sizdiń óńińiz qashyp otyr... Qaıǵyly eshteńe bolǵan joq pa?

— Bolǵanda qandaı! Ómirim tolǵan qaıǵy-qasiret!.. Men sheshemnen aıyryldym...

— Qaıǵyńyzǵa ortaqpyn. Berik bolyńyz... Sol kisiniń ımandy bolýy úshin!.. Qashan qaıtys boldy?

— Qyryq bes jyl toldy... Men onda on úshte edim...

— Sabyrly bolyńyz' Jazylmaıtyn jara joq...

— Maǵan áli de keshe ǵana bolǵandaı...

— Iá, qolymyzdan keler joq... Kónbegende qaıtemiz! Meniń sheshem ólgeli de qyryq bes jyl boldy, men de on úsh jasymda qaldym. Kel, iship qoıaıyq!

— Shesheńniń ólgenine qaıǵyrmaıtyn sıaqtysyń ǵoı?

— Qoıyńyzshy!.. Men de zarlap qaldym... Biraq, amal ne? Ajal meıirimsiz. Qaıǵymdy umytýǵa tyrysamyn... Tiri tirligin isteýge tıis!

— Al men umytpaýǵa tyrysamyn!..

— Ómir súrý kerek qoı!

— Ómirde ne qyzyq bar?

— Al ólimde ne qyzyq bar? Árıne, bárimiz de ketemiz! Biraq asyǵýdyń qajeti ne?!

— Siz optımıs ekensiz!

— Árıne! Ómir qymbat!.. Al siz pesımıs ekensiz!

— Árıne... Tóńiregiń toly qoqys...

— Siz qoqysqa qaramańyz, baıqamaı júre berińiz.

— Men kereń de, soqyr da emespin ǵoı... Kelińiz, endi birden...

— Óte jaqsy! Sizdiń ýaıym-qaıǵydan arylýyńyz úshin!

— Sizge óte rızamyn... Kelińizshi, «sen» dep sóıleseıikshi, «sen» degen áldeqaıda jaqsy!

— Qýana quptaımyn!

— Ekeýimizdiń dostyǵymyz úshin!

— Kel!.. Tunjyraǵandy qoı, baýyrym! Kóńildenip otyr!

— Bolmaıdy... Kórgenim qaıǵy-qasiret qana... Ákem de óldi...

— Netken baqytsyzdyq... Ol qashan ketti?

— Osy jaqynda ǵana, eki-aı boldy... Raktan ketti.

— Jylama, baýyrym... Meniń de ákem óldi, oǵan da eki-aq aı boldy, ol da raktan ketti.

— Endeshe nege qaıǵyrmaısyń?

— Qaıǵyrǵanmen ne tabam? Ákemdi báribir tirilte almaımyn.

— Saǵan qaraımyn da, qaıran qalamyn...

— Nemenege tańdanasyń? Ol qyrshyn ketken joq, ekeýmizdiń jasymyzdy jasap, seksen beske kelip ketti...

— Ne deıdi-aý! Meniń ákem de seksen beske kelgen...

— Ákemde arman joq dep oılaımyn, ol barlyq taýqymetten qutylyp tynysh tapty... Sol kisiniń ımandy bolýy úshin!

— Kel ... Qalaı deseń de, ólim qorqynyshty... Ólimdi oılaǵanda dúnıe tarylyp ketkendeı bolady...

— Al men ólimdi oılasam, ómir qymbattaı túsedi!

— Meniń áıelim ketip qaldy... Áıelim... Ol qorlyqqa qalaı shydamaqpyn?

— İship qoıalyq, bári de umytylady... Ketse, barsyn, meniń de áıelim ketip qaldy...

— Onyń nesine qýanasyń? Sen ony súımegensiń ǵoı, al men onsyz ómir súre almaımyn...

— E, nege?.. Men de janymdaı súıgenmin, biraq kúshtep súıikti bola alasyń ba? Qashyp ketti,— joly bolsyn!

— Al men qaıtýim kerek?

— Táıir-aı! Onymen aıyrylys ta, taǵy úılen! Bitti! Kel, sol úshin alyp qoıalyq... Mahabbat úshin!

— Tura turshy... Meniń taǵy bir qasiretim bar: ashynam eki aptaǵa jol júrip ketti...

— Qasiretti tapqan ekensiń! Meniki de jol júrip ketti. Men de saǵynyp júrmin, taǵatsyz tosyp júrmin... Kel, seniń ashynań úshin!

— Saǵan qarap otyryp jyndanyp ketetin shyǵarmyn... Men syrqatpyn! Uqtyń ba? Syrqatpyn men...

— Shynymdy aıtsam, saǵan janym ashıdy. Kel, seniń densaýlyǵyń úshin! Tartyp jiberseń, aýrýyńdy da umytyp ketesiń...

— Umytyla qoısa...

— Seniki asqazan jarasy ma?

— Ony qaıdan bildiń?

— Meniń de aýrýym sol.

— Oıyńda dáneńe joq qoı?

— Otqa túsip óleıin be? Rak bolsa, qaıter ediń? Buǵan da shúkirshilik... Kel, rakpen aýyrmaǵanymyz úshin alyp qoıalyq!

— O, qudaı, meniń qyr sońymnan nege qalmaısyń sen?!

— Taǵy ne bop qaldy?

— Jumysta kóztúrtki ete beredi, jarty jyl boldy joǵarylatpaı júr... Bastyqtardyń ishinde jaqyn-jaqpaıym joq, meni eshkim súıemeıdi...

— Ha-ha-ha! Kúleıin-aı, baýyrym, kúleıin-aı! Kelshi, tartyp jibereıik!

— Sen kúletindeı ne aıttym?

— Jo-ǵa... Ha-ha-ha!.. Týra meniń jaǵdaıym! Meniń de qyzmetim ońyp turǵan joq...

— Endeshe nemenege máz bolasyń?

— Al jylaǵanda ne tabam? Qyzmetimdi durys istep júrmin, eshqandaı súıeý-qoldaýsyz-aq jan saqtaımyn! Kel, azdap alyp qoıaıyq!

— Toqtaı tur, bálem, páteraqyńdy tóleı almaı bir kúni úıshigińnen qýylarsyń, sonda kórermin qalaı júrgenińdi.

— Ah-ha-ha-ha!.. Túh, óńeshime ketip qaldy-aý!.. İshegim túıiletin boldy-aý!..

— Solaı de?!

— Meni úıden qýyp shyǵyp, dúnıe múlkimdi qattap jazyp tastaǵaly qashan!..

— Ras pa? Meni de sóıtti: radıoqabyldaǵyshymnan, kilemimnen aıryldym...

— Meniń eski-qusqymdy da esepke alyp qaryq boldy...

— Soǵan rıza ekensiń ǵoı?

— Qabyldaǵyshym qarań qalǵan birdeńe bolatyn, al kilemimniń qyzyǵyn qandala men qarakúıe kórip júrgen... E, meıli, aqsha tapqan soń jańalaryn alamyn!

— Seniń úmitiń bar eken, mende eshteńe joq...

— Sende nege joq?

— Áı, qoıshy endi... Osy aıtqanym da jetip jatyr...

— Soǵan sonshama kúırep... Quı, qane!

— Kúıremegende she... Saılaýdyń qorytyndysy da masqara boldy! Bizdiń aıaýly partıamyz qanshama daýystan aıyryldy...

— Oǵan sen de múshesiń be? Sol kerek bálemge!

— Nemene dep kókip otyrsyń?!

— Sezbeısiń, á? Omaqasyp bir qulaǵan soń ekinshide durystap oılanyp-tolǵanatyn bolady... Qazirgi qalpynda ókimet basyna kelse, masqaranyń kókesi sonda bolatyn edi.

— Qoıshy, kel, iship jiberelik...

— İshpegende she!

— Bir aınaldyrǵandy shyr aınaldyrady ǵoı...

— Taǵy da jylaýǵa kiristiń be?

— Endi qaıteıin... Keshe «Qoryldaqtar» taǵy utylyp qaldy... Biz bıyl chempıon bola almaımyz...

— Áı, onyń nesine kúıesiń? Bizdiń «Qoryldaqtar» uıqysynan endi oıanatyn bolady, onyń jattyqtyrýshysyn soıyldap qýyp tastaıtyn ýaqyt jetti! Toqtaı tur, olar kelesi jyly qatyrady áli!

— Kel, dostym, kel!

— Eger moınymda qaryz bolmasa...

— Taǵy bastadyń ba? Sonda qaryzyń qansha?

— Týra tórt myń lır...

— Sol-aq pa? Mende de sonshasy siresip tur...

— Oǵan nesine qýanasyń?

— Asylyp óleıin be?! Atty qamshy órge umtyldyrady, jigitti qaryz jumysqa qulshyndyrady...

— Aldymyzda apat tur!

— Taǵy ne dep kettiń? Ol ne apat?

— Sen gazet oqısyń ba?

— Oqymaǵanda she!

— Bizdiń planetaǵa qaýip tónip tur! Kometa men Jer soǵylysady...

— Zamanaqyr ǵoı? Qyzyq bolady deseńshi! Ha-ha-ha!

— Bárimiz de qurımyz!

— Sol kerek! Ha-ha-ha! Buıyrsa raqattanyp bir kúletin boldyq-aý! Al qaǵyp salaıyq!

— Ómir ábden toıdyrdy.

— Áı, sen nege osynsha myljyńdaı beresiń?

— Jaı...

— Jaı bolsa,— myljyńdama!

— E, men ishýge syltaý tabý úshin myljyńdaımyn ǵoı...

— Á, báse! Jaraısyń!.. Ha-ha-ha!

— Nemenege kúlesiń?

— Kóńildi bolsyn deımin... Kóńilsiz kúıde ishýge bolmaıdy!

— Oh-ho-ho!..

— Ha-ha-ha!..

Shaǵyn kabakta ıne shanshar jer joq edi. Satýshyǵa qarsy qabyrǵada úlken aına ilýli turǵan. Aına aldyndaǵy shaǵyn stol basynda kesh boıy bir kisi otyrǵan. Ol ózi men ózi sóılesip, birese jylady, birese kúldi...

Kenet shaldyr-gúldir etti! Álgi kisi aınany áýeli rúmkamen, sonsoń grafınmen perip jibergen-di. Aınanyń kúlparshasy shyqty, álgi kisiniń sóılesip otyrǵan serigi qazaǵa ushyrady.

Sonda qazaǵa ushyraǵan qaısysy: optımıs pe, pesımıs pe?

Orysshadan aýdarǵan Ǵabbas Qabyshev

---