InfoHub Logo

Tańatar sheshesiniń zeınetaqysymen kún kóredi. Keıde bul zeınetaqy da ony-munyǵa jete bermeıdi.

Búgin Tańatar aýlada zerigip otyr edi, shýlasyp oınap jatqan balalarǵa kózi túse ketti. Sonan soń balalardy janyna shaqyryp alyp:

- Jarysasyńdar ma? - dedi.

Balalardyń kózi jaınap ketti:

- Jarystyrasyz ba?!

- Ol úshin úılerińnen kámpıt alyp kelý kerek, - dedi Tańatar.

Keıbir balalar "mamam urysady" dep, barǵysy kelmep edi, Tańatar olarǵa:

- Onda jarysqa qatysý quqyǵynan aıyryldyńdar, - dedi.

Biraz balalar úılerine qaraı shapqylasyp ketip, ýysyn toltyryp kámpıt alyp shyqty da, Tańatardyń kúrekteı alaqanyna saldy. Tańatar alaqanyndaǵy kámpıtterdi janynda jatqan juqa taqtaıshanyń ústine úıip qoıdy. Sonan soń balalarǵa qarap:

- Áneeeý taldy kórip tursyńdar ma?! - dedi. - Men úshke deıin sanaǵanda, júgirip ketesińder de, sol taldy aınalyp júgirip kelesińder.

Sóıtti de, Tańatar balalardy jarysqa qosyp jiberdi. Sosyn ózi taqtaıshanyń ústindegi kámpıtterdiń birin alyp, qaǵazyn arshydy da, aýzyna jytyrdy. Osydan keıin taqtaıshanyń ústindegi kámpıtterdi ýystap alyp shalbarynyń qaltasyna tyqty. Taǵy da ýystap alyp kóıleginiń qaltasyna saldy. Osy kezde taqtaıshanyń ústinde úsh túıir kámpıt qalǵan edi. Tańatar olardy aldyńǵy bolyp júgirip kelgen úsh balaǵa júlde retinde usyna saldy. Sonan soń biraz-biraz maqtaý sózder aıtty. Sosyn shalbarynyń artqy qaltasyna qolyn salyp jiberip, kishkene, synyq qalamsap alyp shyqty da, álgi ózi jegen kámpıttiń qaǵazynyń aq jerine 3 degen jazýdy jazyp, úshinshi bolyp kelgen kishkene qara balanyń qolyna ustata saldy. Sosyn qaǵazy táýirleý-aý degen taǵy da eki kámpıtti arshyp, urtyna tyqty da, qaǵazyna jazyp jiberip, tıisinshe eki balaǵa ustatty.

- Aǵa! - dedi osy kezde kishkene qara bala Tańatarǵa jáýdireı qarap. - Myna qaǵaz birdeńege jaraıdy ma?

- Oı, ol bárine de jaraı beredi! - dedi Tańatar daýsyn qubylta sóılep.

Bala endi Tańatarǵa úmittene qarady:

- Oqýǵa túsýge de jaraıdy ma? Mamam óskende oqýǵa túsesiń dep aıtady.

- Oqýǵa túsýge de jaraıdy, - dedi Tańatar búlk etpesten. - Osy qaǵazben barasyń da, fızkýltýra fakúltetine túsip kete beresiń.

Bala osyǵan qýanyp qaldy.

- Eń bastysy, Tańatar aǵańnyń jarysynyń júldegeri degen sózdiń ózi nege turady! - dep, Tańatar balanyń basynan aýyrtpaı shertpek aldy. Osydan keıin basqa balalarǵa kózin alarta qarap:

- Qane, tarańdar! - dedi.

Sóıtti de, ózi úıine kirip, qaltasyndaǵy qalǵan kámpıtterimen shaı iship jatty.

---