InfoHub Logo

Dúkennen kelgen Asan anasyna esep berip,​ alǵan zattary men artylǵan aqshanyń qaıtarymyn stolǵa qoıdy. Biraq oń qolynyń kishkene saýsaqtary jumylyp,​ alaqany áldeneni jasyryp tur edi.

— Ash qolyńdy — dedi anasy suraýly júzben. Qolyn artyna jasyrǵan Asan,​ qıpaqtap asha qoımady.​ Anasynyń qastary túıilip,​ kózi tesile qarap tur. Amalsyz alaqanyndaǵy 85 teńgeni kórsetti.

— Mynaý ne? Sende artyq aqsha bolmady.​ Qaıdan aldyń?

— Jańa satýshy apaı..​ baıqamaı...​ shatasyp...

— Artyq berip qoıdy ma..?!

— Iá..

— Nege birden qaıtaryp bermediń?

— Basynda qýanyp kettim...​ Sosyn..​ Siz ursatyn shyǵar dep...

— Álbette,​ oılamaǵan jerden artyq tıyn alǵanǵa basynda qatty qýanyp kettiń.​ Sosyn ujdanyń mazalaı bastaǵan ǵoı?! Balam,​ kel,​ otyr.​

Jas kezimde maǵan da anashym osyndaı aram aqshadan aýlaq bolýdy jıi aıtatyn. Birde bazar mańyndaǵy satýshydan banan almaq boldym.​ Adam qaptap, shatasqan satýshy,​ maǵan baıqamaı bir banandy artyǵymen berip jiberdi.​ Dál sol sátte qatty qýanyp kettim.​ Úndemeı banandardy alyp, uzaı berdim. Biraq,​ úıge taıaǵan saıyn álgi banan maǵan jemis emes,​ jylan sekildi kórinip,​ ókine bastadym.​ Qaıta aparyp berýge​ erinip,​ ári uıalyp,​ ertesi kúni qaıtsem de aqshasyn aparyp beremin — dep sheshtim.​ Sol túni uıyqtamaı shyqtym desem bolady. Eger alda-jalda ne men,​ ne álgi satýshy ólip ketse,​ qabirde osy 50 teńge turatyn banan aıdaharǵa aınalyp tosyp turardaı,​ qatty shoshydym..

Bazar ashylyp,​ saýdagerler shyǵatyn ýaqytqa deıin ázer shydap,​ qolyma 50 teńgemdi qysa ustap, bazarǵa qaraı qustaı ushtym.​ Keshe satýshynyń túrine durystap qaramaǵan ekenmin. Al tapsamshy. Kóp izdep,​ árkimnen surap,​ esh taba almadym.​ Sosyn sol satýshyǵa uqsas bir áıelge aqshamdy ustattym da:

— Keshe osynda bir kelinshekten bir banan artyq alyp ketippin.​ Kim ekenin taba almadym. Tym bolmasa siz alyńyzshy!- dep, jaýabyn kútpesten jyldam ketip qaldym.

Balam,​ qazaq eshqashan úıine qulyp salmaǵan,​ kisi zatyna tımegen.​ Kerisinshe qoly ashyq jomart, kómekke ázir, aramnan saqtanǵysh, amanatqa adal halyq bolǵan.​ Buryn ózge ulttar bireýge sálemdeme bergisi kelse,​ qazaqtardy izdeıdi eken.​ «Qazaq — amanatqa qıanat jasamaıtyn halyq» — dep, bizdiń ulttyń adaldyǵy túrki tildes ulttar arasynda ańyz bolǵan eken..

Al,​ qazir she?!​ Amanatqa adalmyz ba? Qolymyz ben arymyz taza ma?​ Ne deısiń?

—​ Anashym,​ keshirińizshi..!​ Men barlyǵyn túsindim - degen Asan,​ dúkenge qaraı júgire shyqty.​ «Endi myna tıyndardy álgi apaıǵa qalaı qaıtaramyn?» — dep,​ ýaıymnan terlep te ketti. Dúken syrtynda taǵy biraz aıaldaǵan Asan,​ bir kisimen qabattasa kirip,​ birneshe tıyndy satýshynyń aldyna tastaı sala,​ atyp shyqty.

— Áı,​ bala!​ Mynaý ne aqsha?​ Ne kerek?- dep aıqaılaǵan satýshy,​ ıyǵyn qıqań etkizip,​ syńǵyrlaǵan tıyndardy sýyrmaǵa sala bastady.

Gúlmeken Qasenbaı
26.06.2022

---