InfoHub Logo

El aýzyndaǵy ańyzdarda «Kók tóbet» kúıiniń shyǵýy ártúrli aıtylady. Sonyń biri, Altaıdy mekendegen Zýqa batyrdyń aýyl mańyna bóten adam bastyrmaıtyn, atty adamnyń dybysyn kúnshilik jerden sezetin, qunan ógizdeı kók tóbeti bar eken. Zýqaǵa qatty óshtesken úkimet Zýqanyń myqty jigitteriniń alysqa, jortýylǵa attanyp ketkenin, jaqyn mezgilde qaıtyp oralmaıtynyn bilgen soń Zýqany ustaýǵa sherik attandyrǵan. Osy kezde onyń kók tóbeti úsh kún jatpaı úrgen. Itte til joq, bolmasa ol bir qaýiptiń bolatynyn sezgen. Udaıy úsh kún, úsh tún úrgen ıt, úshinshi kún tańǵa jaqyn daýysy qarylyp, jaǵy talyp, úni óshken eken. Dál osy kezde Zýqa tań namazyn oqýǵa qamdanady. Kúndiz qaraýyldap, qarańǵy túse aýyldy qorshap alǵan sherikter dál osy sátte onyń úıine basyp kiredi. Zýqa ne myltyq alyp atysýǵa, ne qashyp shyǵýǵa úlgirmeı qalady da, tek qolyna túsken kerege basynda ilýli turǵan kisenmen myqtysynyp aldymen kirgen eki sherikti uryp óltiredi. Biraq muzdaı qarýlanǵan kóp sherik ony osy arada atyp jiberedi. Daıyn turǵandar jalma-jan basyn alyp, zyta jóneledi. Osy oqıǵadan buryn da talaı ret Zýqany ustaýǵa kelgen áskerlerdi kók tóbet aldyn ala bilip úrgennen keıin, adamdar daıyndyq kórip, jaýdyń sazaıyn tarttyryp, ózderi aman qalǵan. Bul retki kók tóbettiń úsh kún úrgenin eskermegen Zýqa aýyly armanda qalypty, osyny el esine salǵan bir kúıshi «Kók tóbet» kúıin shertken eken.

 

---