InfoHub Logo

QR Bilim jáne ǵylym vıse-mınıstri Elmıra Sýhanberdıevanyń aıtýynsha, búginde tegin kásiptik-tehnıkalyq bilim berýdiń jańa mehanızmi ázirlendi. Sonyń aıasynda jastardy jumysshy mamandyqtarmen barynsha qamtyp, árbir stýdentke shákirtaqy, tipti tegin tamaq berý júıesin engizý kózdelip otyr, dep habarlaıdy QazAqparat tilshisi.

Búgingi tańda respýblıka boıynsha ornalasqan 807 kolejde 498 myń adam bilim alýda. Solardyń ishinde 97 myń adam jumysshy mamandyqtarynda oqıdy. Bul - barlyq stýdentterdiń tek 20 paıyzy ǵana. Olar tegin bilim alyp jatyr. Al qalǵan 80 paıyzy orta býyn mamandyqtaryn ıgerip júr. Endi, atalǵan arasalmaqty ózgertip, jumysshy mamandyqtarǵa basymdyq berý kózdelip otyr. Oǵan túsken jastar orta býyn mamandyqtaryn da tegin támamdaı alady. Sóıtip, eki birdeı mamandyqty alyp shyǵýǵa múmkindik bar.  

«Granttar aldymen jumysshy mamandyqtaryna bólinedi. Qalǵany basqa mamandyqtar arasynda taratylady. Máselen, bolashaqta jańa júıemen160 myń adam qamtylsa, 40 myń adam jumysshy mamandyqtaryna qabyldanady. Osy mehanımzge sáıkes, tehnıkalyq, tehnologıalyq jáne aýyl sharýashylyǵy mamandyqtarynyń barlyǵy tegin bolady. Máselen, buryn aspaz bolǵysy keletin bala aldymen osy mamandyqty aıaqtap, sodan keıin tehnolog bolatyn. Endigi kezekte, tehnolog bolý úshin ol eki birdeı mamandyqty alady. Aldymen tómengi satydan bastaıdy da, orta býyn mamandyqpen birge bitirip shyǵady», - dedi E. Suhanberdıeva búgin depýtattarǵa jańa jobany tanystyrý rásimi kezinde.

Onyń aıtýynsha, mınıstrliktiń negizgi maqsaty - jumysshy mamandyqtary boıynsha maman daıarlaýdy eki esege arttyrý. «Ol úshin ystyq tamaq, shákirtaqy, jol júrý aqysy, jataqhana túrinde áleýmettik qoldaýdy qarastyrý qajet. Biz jumysshy mamandyqtar bilim alatyn 90 myńdaı stýdentti ystyq tamaqpen qamtamasyz etýdi josparlap otyrmyz. Qazirgi kezde osy másele Úkimette qaralyp jatyr. Qazirgi ýaqytta memlekettik tapsyrys boıynsha úzdik oqıtyn stýdentter stıpendıa alatyn bolsa, jańa jobaǵa sáıkes, barlyq jumysshy mamandyqtar boıynsha oqıtyndar stıpendıamen qamtamasyz etiledi», - deıdi vıse-mınıstr. Atalǵan sharalarmen jumyssyz júrgen jastar, sondaı-aq oqýdan shyǵyp ketkender de qamtylady. 

Budan bólek, kolejderde oqıtyn jastardy jataqhanamen qamtý kórsetkishi tómen bolyp tur. Qazirgi suranys 13 myń oryndy qurap otyr. Barlyq stýdentterdi jataqhanamen qamtamasyz etý úshin 200 oryndy 69 jataqhana salý qajet. Atalǵan máselege jergilikti bılik orgyndaryna tapsyrylyp otyr.  

---