InfoHub Logo

Elordalyq kásipkerler palatasy bilim jáne eńbek pen áleýmettik qorǵaý basqarmalarymen birlesip, kolej túlekterin jumyspen qamtýdy josparlap otyr.

Osyǵan baılanysty, búgin «Atameken» jumyspen qamtý mobıldi ortalyǵynyń menejerleri tehnıkalyq jáne kásiptik bilim beretin uıymdarǵa kóshpeli jumysyn bastady. Nátıjesinde Nur-Sultan qalasynyń onǵa jýyq kolejiniń túlekterine oqýdan keıin birden jumysqa ornalasý múmkindigi berilip otyr.

«Biz túlekterdiń mamandyǵy boıynsha kolej qajettilikterin jınadyq jáne olarǵa myńnan astam bos jumys ornyn ázirledik. Aqpan aıynda 500-den astam kolej túlegi synaq tapsyryp, oqýyn aıaqtaıdy. Olardyń birden jumysqa ornalasýy úshin qaladaǵy 10 kolejde kóshpeli jumyspen qamtý ortalyqtary jumys isteıdi. Ortalyq mamandary olardy jumysqa qabyldaıdy jáne tirkeıdi», - dedi Nur-Sultan qalasy Kásipkerler palatasy dırektorynyń áleýmettik máseleler jónindegi orynbasary Aıbolat Esentemirov.

Atap aıtqanda Nur-Sultandaǵy Kópbeıindi kolej, Kólik jáne komýnıkasıalar koleji, Ekonomıka, tehnologıa, standarttaý jáne azyq óndirý koleji, Menejment jáne bıznes koleji, Qonaev ýnıversıtetiniń koleji, Basqarý koleji jáne Qazaq tehnologıa jáne bıznes ýnıversıteti kolejiniń túlekteri túrli mamandyq boıynsha jumys izdeı alady.

«Stýdentter dızaınerden bastap, dánekerleýshi qyzmetine deıin jumysqa ornalasa alady. Máselen, iri munaı kompanıalarynyń biri 20 bos jumys ornyn usynyp otyr. Oǵan oqýyn jaqsy aıaqtaǵan, ózin jaqsy qyrynan kórsete bilgen jastardy iriktep alamyz», - dedi A. Esentemirov.

Qazirgi ýaqytta kásipkerler palatasynda jumys berýshilerdiń ótinimderi boıynsha bos jumys oryndarynyń banki quryldy.

Sondaı-aq, bul bos oryndardy Instagram jelisińde @rabota.atameken paraqshasynan kórýge bolady.

---