InfoHub Logo

Oblystyq ǵylymı joba jarysynan júldeli oryn alǵan oqýshynyń ǵylymı joba jumysy Astana qalasyndaǵy irikteý kezeńine joldanatyndyǵy, sol jumystyń kompúterde terilýi kerektigi jaıly habar kelgende, bular kompúterdiń joqtyǵyna baılanysty daǵdaryp qaldy. Sebebi aýylda kompúter joq edi. Aýdannyń ortalyǵynan da kompúter taba qoıý qıyn bolatyn. Endi kompúter izdep oblys ortalyǵyna barýy kerek edi.

Ǵylymı joba oblystyq jarysqa kompúterge basylmaǵan kúıi qatysqan bolatyn. Jarystyń aty oblystyq ǵylymı jobalar jarysy dep atalǵanymen, jarys ol kezde oblys ortalyǵyndaǵy qala mektepteriniń arasynda ótetin. Sebebi bul kezde oblystyń basqa aýdandary ǵylymı joba jumysyna áli atsalysa qoımaǵan edi. Tek bulardyń aýdany ǵana ekinshi jyl atsalysyp otyr. Al ol kezde oblysta ǵylymı jobamen eń myqty aınalysyp otyrǵan mektep sol kezdegi oblystyq gımnazıa edi.

Endi sol oblystan júlde alǵan jumystardy Astana qalasyndaǵy respýblıkalyq "Daryn" ǵylymı-praktıkalyq ortalyǵynyń mamandary irikteýden ótkizedi eken. Astanadaǵy mamandar tarapynan maquldansa, respýblıkalyq ǵylymı joba jarysyna qorǵaýǵa jiberedi, al maquldanbasa...

Oblysqa kelgen soń bilim departamentine soqty. Departament mamany buǵan: "Oblystan ár pánnen júldege ilikken barlyq ǵylymı joba jumystaryn Astana qalasyna tańerteń poıyzben alyp júremin", - dedi. Sonan soń úıiniń, páteriniń nómirin qaǵazǵa jazyp berip: "Tún deme. Mezgilsiz ýaqyt deme. Jumys qaı kezde kompúterge terilip bitedi, úıime ákelip bere ber", - degen edi.

Jumys qas qaraıǵanda baryp kompúterge terilip bitti. Bul kezde qala jarqyratyp shamdaryn jaqqan bolatyn. Departament qyzmetkeriniń úıine jumysty ákep tapsyrdy.

Osy jumys ár pánnen aýdandyq ǵylymı jobalar jarysy ótip jatqan sátte seıfte jatqan edi. Endi ol oblystan ótip, Astana qalasyna bara jatyr. Sonan soń  da osy "Halyq aqyny Baınazar Ótepov shyǵarmashylyǵyndaǵy el taǵdyry jáne aqyn óleńderiniń kórkemdik máni" atty ǵylymı joba jumysynyń Astanadaǵy irikteý kezeńinen de ótkendigi, respýblıkalyq ǵylymı jobalar jarysyna qorǵaýǵa jiberilgendigi, respýblıkalyq ǵylymı jobalar jarysynyń qaı kúni, qaı qalada ótetindigi, shákirttiń sonda jumysyn kelip qorǵaýy kerektigi jaıyndaǵy habar keldi. Bul Astanadaǵy "Daryn" ǵylymı-praktıkalyq ortalyǵy uıymdastyryp otyrǵan Respýblıkalyq III Ulttyq ǵylymı joba jarysy bolatyn.

Endi Aqanjan aǵaıǵa baryp qaıtqysy keldi. Bul taqyryppen jumys istegen adam Aqanjan aǵaıǵa osy jumysty qolǵa alǵan sátte-aq baryp qaıtsa, quba-qup bolatyn. Óıtkeni osy taqyryp jaıly birden-bir birdeńe aıta alatyn adamnyń biri Aqanjan aǵaı edi. Biraq bular qolda bar derektermen ǵana jumys istedi. Ol derekterdiń negizgi kózi burynǵy jergilikti gazet paraqtarynda jarıalanǵan aqynnyń óleńderi edi. Bularda keńes beretin adam nemese ǵylymı ataǵy bar jetekshisi joq boldy.

Endi qorǵaýǵa jiberilgen jobaǵa alyp-qosarlary joq edi. Biraq Aqanjan aǵaıdyń batasyn alyp, aldynan ótý - mańyzdy.

Aqanjan aǵaı oblys ortalyǵynda turatyn. Ózi ol kisini buryn kórgen emes.

Bul kelgende Aqanjan aǵaı azdap syrqattanyńqyrap otyr eken. Qys aıy edi. "Ne jazdyńdar? Oqyshy", - dedi Aqanjan aǵaı. Bul oqı bastaǵannan, Aqanjan aǵaı serpildi de qaldy: "Óı, durys qoı jobasy! Osylaı bolý kerek qoı!"

Aqanjan aǵaı muny sonan soń dastarqan basyna ertip keldi. Óziniń kishkene ǵana magnıtofony bar eken. Sony qosty. "Baınazar aqynnyń sózi. Tyńda", - dedi. Respýblıkaǵa belgili termeshi áıel oryndaıdy eken. Magnıtofon sóıledi:

Laıqat týymdy erdiń tulǵasyna,
Kók tıyn oılamasa bir basyna.
Júregi adal erdiń el dep soǵar,
Satpaıdy ar-namysyn paıdasyna.
Bireýler syrttan ósek sóz sóıleıdi,
Kemitip erdiń pásin bolmashyǵa.
Aıyby arqalaǵan qap bolsa da,
Bireýdiń kúler kórip dorbasyna.
Aıtatyn mundaılarǵa sózim mynaý,
Túzetsin ózin qarap aınasyna.
Pendeniń oılaǵany bola berse,
Shyqqysy kimniń kelmes shyń basyna.
Degeni adamzattyń bola bermes,
Keı kezde kelmeıdi isi yńǵasyna...

Baınazar aqyn osydan keıin jergilikti óńirde ótken belgili adamdardyń isi men olardyń da pende ekenin aıta kelip:

Osylar zamanynda kem týmaǵan,
Jaraıtyn adamdar edi qolbasyǵa.
Ketetin bir qalypta pende bolmaıdy,
Baq, shirkin, turaǵy joq, aýmasýda.
Netemiz pendelikpen bosqa nalyp,
Taǵdyrǵa jazylǵan is bolmasyn ba?
Aý, Shora, qaǵaz benen qalamdy ber,
Shektiniń Baınazardaı jorǵasyna, - deıdi.

Respýblıkalyq ǵylymı jobalar jarysynan kele jatyp, Aqanjan aǵaıǵa taǵy da soqty. Aqanjan aǵaı shákirttiń II oryn alyp kele jatqanyn estigende qatty qýanyp otyrdy.

Aýyl mektebi jańa ǵasyrdyń alǵashqy jylyn osylaı óziniń 54 jyldyq tarıhynda tuńǵysh ret respýblıkalyq bilim báıgesine shákirtin aparýdan bastaǵan edi. Sodan beri de onda zaman talabyna oraı, talaı-talaı ilkimdi jumystar atqarylyp keledi.

Sol oqıǵadan bir jyl ótken soń aýyl mektebine sý jańa kompúterler keldi. Ony oblys ortalyǵynan arnaıy mamandar kelip, qosyp, mekteptiń kompúter mamanyna tabystap ketti. Endi oqýshylar jaryqtyń shektelip berilýine baılanysty ymyrt úıirile ǵana kelip, kompúter sabaqtaryn oqıtyn.
 

---