InfoHub Logo

Tyshqanbaıuly Tasym — áńgimeshil, estigenin umytpaıtyn, ár oqıǵany júıe-júıesimen, túsinikti de qyzyqty etip aıtatyn tilýar adam edi. Erterektegi eleýli oqıǵalar jaıyndaǵy estelikteriniń birinde ol Ótegen atty bir qarttyń qaıratyn, uzaq ómir súrýdegi qupıa syryn aıtyp berdi.

— Saryarqanyń sary belinde mekendegen elderdiń birinde bir ǵanı adamnyń Málıke atty qyzy bolypty, — dep bastady áńgimesin qart atam, — úlken jıyndarda at ústinde aıqasatyn aýdaryspaq, kókpar, saıys, qyz qýý sıaqty básekeli oıyndarda ol qyz neler álýetti jigitterge jeńdirmepti. Óz kúshine ábden sengen, jıyrma úsh jastaǵy Málıke:

— Kimde-kim meni at ústinen aýdaryp alsa, meıli ol qandaı adam bolsa da, soǵan tıemin, — dep elge jar salypty.

Dańqty arýdan kúshin asyryp, ony ózine baǵyndyrýdy, demek jar etýdi kózdegen qarýly jigitter básekede sátsizdikke ushyrap, jeńilip qala berdi. Osyny estigen, toqsan úsh jastaǵy Ótegen qart, neler álýetti jigitterdiń bir áıel qaıratyna tótep bere almaǵanyna namystanyp, Málıkemen básekege ózi tústi. Áıdemge de keltirgen joq, qyzdy at ústinen julyp alyp, beıne marqa qozydaı aldyna bókterip ala jóneldi. Málıke ýádesinde turdy, ǵasyrǵa jýyq jasaǵan, ózinen jetpis jas úlken qartqa qosylyp, semályq ómir súrdi.

Bir jyldan keıin ol júkti boldy. Er bala dúnıege keldi. Osy kezde el arasynda pysh-pyshtaǵan ósek taraı bastady. «Toqsan bestegi shaldan bala bolýshy ma edi. Málıke arý uıqysyrap ketken bolar...» desti. Bul ósekke Málıke ózi toıtarys berdi. Ótekeń sonshalyqty kóp jasasa da, onyń nápsilik qýaty kemimegenin yspattady:

— Keıde ǵana bolmasa, — dedi ol, — túndi bos ótkizbedi. Nápsi tilegi meniń tilegimnen de kúshti.

Sodan keıin ósek tıyldy, bala Ótegen qarttyń óz balasy degen qorytyndyǵa keldi jurt. Málıke zamandastarymen syrlasqanda, Ótekeńmen eń alǵash kezdeskende-aq onyń ózine ómirlik serik bola alatyndyǵyna sengendigin aıtady eken:

— At ústinen aýdaryp alyp, aldyna bókterip, eriniń basyna qysqanda, qabyrǵalarym túgel sógilgen shyǵar dep edim, — depti arý. Áńgimesin aıaqtaı kelip, Tasym atam Ótegen qarttyń kóp jasaýyna neler sebep bolǵanyn ózinshe topshylaǵan sózine toqtady.

«Kóp jasaýyma, osynsha jasqa kelgende denim saý bolyp, kúsh-qýatymnyń kemimeýine birneshe sebepter boldy, — depti Ótekeń, — atap aıtqanda, ómirimde ishimdik ishpedim, shylym tartpadym, nasybaı atpadym, jalańaıaq júrmedim, jaıdaq atqa minbedim, óz áıelimnen basqa birde-bir áıelge jaqyndasqanym joq. Qandaı jaǵdaıda bolsa da eshnársege renjimedim, ár daıym kóńildi, sergek boldym».

---