InfoHub Logo

Qyryqqa kelgende alǵashqy mahabbaty gúldenip, sheshek atyp, qaýyzynan jarylyp shyǵyp, baǵy janbaı otyrǵan bir sulýǵa qoly ázer jetken Esirkep degen bir eser adam bolypty. Eser demeı ne deýge bolady? Úıinde otyryp alyp oıymen baıyp kúpinse, qaýqıǵan boıyna maqtanyp, ospadarlanyp elge sóz bermeı lepirse, ózi ishegine shı júgirmeıtin aram jáne dúnıeqońyz adam bolsa?!

Sol Esirkep kókek aıynyń ishinde jármeńkege baryp, saýda-sattyq jumysymen shuǵyndanýdy oılap, shana jasaýǵa kirisedi. Shananyń bir tabanyn shaýyp bolyp, nasybaı atyp dem alýdy oılap, qasynda jatqan bez qaıyńǵa baryp otyrady. Janyna zaryǵyp kórgen bıkesi de erkeleı basyp kelip jaıǵasady.

— Otaǵasy qolyń netken sheber edi ózińniń. Shananyń tabanyn ústiriktegendeı qyp ádemilep shaýypsyz ǵoı, — dep maqtaıdy kúıeýin bıkesi.

— Seniń eldiń áıelinen kem qalmaı, kórnekti júrýińdi oılap áýre bolyp jatyrmyn ǵoı. Bıkem, kóp keshikpeı ekinshi tabanyn bitirip, shanany alshysynan turǵan qoı asyǵyndaı etip ádemilep jasasam, sóıtip, jármeńkege aparyp urǵashy qulyny bar bir qulyndy bıege aıyrbastasam. Ol qulyndy bıe ósip, kelesi jyly tórteý bolsa. Eki-úsh jylda aıǵyrly úıirli jylqy bolyp shyǵar edi de, el «myna jatqan qalyń mal Esirkep baıdyń jylqylary ǵoı» dep ishteri kúıip, kózderin súzip júrer edi, — deıdi Esirkep kúpinip, áıeliniń maqtaǵanyna mas bolyp.

— Onda ol aıǵyrdy men láshenkege jektirip, bulań jeldirip, tórkinime baryp-kelip turar edim, — depti esineı túsip bıkesi.

— Ákeńniń basy, baryp-kelip turasyń. Kúlli bıeni qysyr qaldyryp malǵa ıe bolyp júrgen aıǵyrdy saǵan jegip berip qoıamyn, á! — dep Esirkep áıeliniń mańdaıǵa sylq etkizip uryp jiberipti. Áıeli taramysyna ilikken ınelikteı qatqan bir názik adam bolsa kerek, murttaı ushyp qulap túsipti de, jan tásilimin jasapty. Áıeliniń sereıip qalǵanyn kórip:

— Qýarǵan qý Qudaı-aý, shananyń bir tabany bitpeı jatyp qyryq jyl kútip zaryǵyp ázer qolym jetken áıelimdi aldyń. Ekinshi tabany bitkende ne isteısiń maǵan, ózimdi alasyń ba? — dep jer baýyrlap qulaı zar eńirepti.

Qasynan ótken adamdar:

— Myna kisi ne istep jatyr? — dep surapty birinen-biri.

— Esbalaq — eliniń esersoǵynyń biri edi. Eserligi ustap jatyr, — dep jaýap beripti biletinderi. Esbalaqtyń esersoǵy degen áńgime osydan qalypty.

---