InfoHub Logo

Qazaqta «Aqyl-aýys, yrys-juǵys» degen ádemi sóz bar. Bul kórshi jatqan elderdiń bir-birine rýhanı yqpalynyń bolyp otyratynyn, qońsylyq qaıyrymdy meńzegen sóz.

Qazaq pen túrkimen japsar jatqan elder. Sondyqtan da, rýhanı ortalyq, óner jolyndaǵy ózara yqpal etýshilik qashannan ornyqqan dástúr. Bul dástúrden Dáýletkereı de shet qalmaǵan. Ol túrkimen taqyrybyna arnap «Nar ıgen», «Táshtıt», «Kóruǵly» sıaqty kúıler shyǵarǵan.

Dáýletkereıdiń «Kóruǵly» kúıiniń ańyz áńgimesi orta Azıa halyqtarynyń arasynda keńinen taraǵan áıgili «Kóruǵly» dastanynyń oqıǵasymen tamyrlas bolǵanymen, kúıdiń shyǵý sebebi kúıshi ómiriniń bir sátimen baılanystyrla aıtylady.

...Birde, aýyly aralas, qoıy qoralas jatqan, tósekte basy, tóskeıde maly qosylǵan túrikmen aǵaıynǵa Dáýletkereı qonaqtap baryp qaıtypty deıdi. Sonda aýyldastary aldynan shyǵyp, abyroıly el aǵasynyń oljasyn qyzyqtamaq nıet bildirse kerek. Buǵan oń shyraı tanytqan Dáýletkereı: «Ýa, aǵaıyn, sózime qulaq sal! — depti. — Túrkimen aǵaıynnyń kóńilinde kóleńke joq eken. Mal berip edi, «óledi» dep almadym, dúnıe berip edi, «tozady» dep almadym. Biraq qur qol qaıtqanym joq. Osy sapardyń bir belgisi bolsyn dep, ólmeıtin, tozbaıtyn kúı shyǵaryp qaıttym!» — degen eken.

Sondaǵysy, osy «Kóruǵly» kúıi edi deıdi.

---