InfoHub Logo

Baıǵanı aýdanynyń Oımaýyt sovhozynda eńbegimen elengen, qurmetke bólengen Qıtyq baıda jalshylyqta júripti. Sovet ókimeti jyldarynda qyryq jyldaı kolhoz qoıyn baǵyp, Otan dáýletine mol úles qosyp, alpysynshy jyldary dúnıeden ótti.

Sol Qıtyq aqsaqal adal eńbegi nátıjesinde úkimet nagradasyna usynylyp, 1948 jyly sol nagradany tapsyratyn aýdan ortalyǵyndaǵy úlken jıynǵa shaqyrylypty.

Qıtekeń ómir boıy mal qamymen aýdan túgil, kolhoz ortalyǵyna da kelip turmaıdy eken. El basynan ótken qıynshylyq jaǵdaı ol kezdegi aýyl ómiriniń kıer kıim, isher astyń tapshylyǵy adamdardyń mádenı ósýine de bóget bolǵany belgili. Mine, osy saltanatty jıynǵa kıetin durys kıim tappaı, kórshiles shopannyń kónetoz beshpent-shalbaryn kıip kelipti. Aýdan ortalyǵynda ol kezde qonaq úı qaıdan bolsyn, Ábdiǵalı degen qyzmetker jıeniniń úıine túsip, qonyp shyǵady.

Erteńgisin beti-qolyn jýýǵa tysqa shyǵyp, jýynyp, úıge kirse, tór aldyndaǵy kórpeden tómenirek, shaǵyn órnekti mata jaıýly jatady. Qıtekeń ári oılap, beri oılap jaıýly mata ústine kelip otyryp alady. Shaı jasaýǵa kelgen kelin:

— Ata, shaı jasaıyn, joǵary kórpege otyryńyz, — depti sypaıylyqpen. Bir jaǵynan úlkendigi bar Qıtyq aqsaqal:

— Qaıdan bileıin, qaraǵym! Qonaǵyna jaıǵan tósenishi bolar dep otyra salyppyn, — dep ysyrylyp, kórpege otyrady.

Jınalys keshteý bastalatyn bolyp, Qıtekeń úıde ýaqytynda bararmyn dep otyryp qalady da, úı ıesi erteńgisin jumysqa ketip qalady. Jınalysqa barmaq bolyp Qıtekeń beshpent-shalbaryn kıeıin dep ilgishke kelse, eki beshpent-shalbar ilýli tur eken. Óziniń kıip kelgeni qaısysy, ony bile almaı (jaratylysynan uıań, kisiniń ala jibin attap, qıanat jasap kórmegen qart) úı ıeleri kelgenshe úıde otyryp qalyp, jınalysqa qatysa almaı qalypty dep ańyz etedi.

---