InfoHub Logo

Atyraý oblysy Isataı aýdany Isataı selosy
Isataı orta mektebi Qaıyrly Dana 10-synyp oqýshysy

Qymbatty meniń anashym! Qaıda barsam da, qandaı kóńil kúıde bolsam da sen meniń janymdasyń. Senimen syrlasý, senimen aqyldasyp júrý meniń daǵdyma aınalǵaly qashan?! Jańa bir kıim kıip aınaǵa qaraǵan sátterimde nemese as ýıde jańa bir tátti taǵamdy ázirlegen kezde Siz meniń syrtymnan baqylap, súısine qarap turǵandaı sezinemin. Keıde ishteı sóılesip turǵanymda óz qýanyshymdy jasyra almaı bas ızep, qalaı kúlimsirep turǵanymdy óziim de baıqamaı qalamyn.

Qymbatty meniń anashym! Men Sizden qol úzip qalǵanymda oń-solyn tanymaǵan sábı edim. Biraq Sizdiń jarqyn beıneńiz ben ásem únińiz meniń júregimde keshegideı saqtaýly.

Áli esimde, kórshi úıdiń aýlasynan ádemi gúldi julyp alyp Sizge alyp kelgenim. Sonda Siz jaı ǵana únmen:

‒ Kúnim meniń, bul ádemi gúl ǵoı. Ony julýǵa bolmaıdy. Gúl ósip turǵanda ǵana qulpyrady, jan-jaǵyna qýanysh syılaıdy. Esińde bolsyn, barlyq dúnıedegi tirshilik ataýlyny julýǵa, qorlaýǵa bolmaıdy. Men seniń olardy aıalap, qorǵaǵanyńdy qalaımyn, -degeniń.

Sodan beri qanshama jaz, qansha kúz, kóktem ótti. Siz tutynǵan zattar men óz úıimniń árbir buryshynan Sizdi izdegen kezderim artta qalyp, erjetip, eseıdim. Siz syılaǵan ómirimdi mándi de sándi etý óz qolymda ekenin uǵyný maǵan ońaı soqpady.

Ómirdiń tek qýanysh pen saǵynyshtan turmaıtynyn uǵyndym. Bala kúnnen birge oınap, birge júrgen dostarymnyń teris aınalǵan tustaryn kórý men úshin ómirdiń úlken synaǵy bolǵany anyq. Tipti kúırektikke salynyp, bul dúnıede jalǵyz qalǵandaı kezderim de boldy. Sol sátterimdegi álsizdigimdi keshirip, meniń ishki muń-sherimdi tyńdaǵanyń úshin, myń alǵys aıtamyn, Anashym!

Ómir degen turmaıdy qap-qaradan

Ómir degen turady aq-qaradan

Aq-qara eki arasyn ashyp ótip,

Arymen óz baqytyn tapqan Adam,-degen sózdiń mánin endi túsinip kelemin.

Qazir ózime jańa dostar taptym, eski dosymmen de tabystym. Kóńilimdi qylaý shalsa kitap oqýdy, ǵalamtor arqyly óz oıymdy ózgelermen bólisýdi úırendim. Ómirde jaqsy adamdar kóp ekenin túsindim...( Poezıaǵa jıi qol sozamyn. İshinen ózimdi, seni izdeımin. Birde kúlemin, birde jylaımyn...)

Birde maǵan ustazymnyń bylaı degeni esimde: “Sizdiń úıdiń terezesi mamań barda erekshe jarqyrap turatyn, úıdiń qasynan ótkende erekshe kózge uryp, móldirep turýshy edi. Sen endi úlken qyz boldyń, sen de jarqyratyp súrtip qoı, ol terezede seniń mamańnyń qolynyń taby bar” degeni. Sodan beri Sizdi eske alǵanda birden terezege qaraımyn. Qaraımyn da qolyma súlgini alamyn...

Keıin eseıe kele bul sózdiń astarynda úlken syr jatqanyn, taǵlym men tárbıe baryn túsindim. Kóńilim qulazyp, rýhym júdep júrgen kezderimdi aıtpaı tanyp, eńse kóterýime kúsh bergen qaıyrymdy jandarǵa sheksiz rızamyn, anashym.

Anashym, men Sizdiń jalǵyz tal gúliń bolǵandyqtan ba meni erkeletip ósirdińiz. Meniń aqyldy da sulý bolyp er jetkenimdi qalaǵanyńdy bilemin.

Birde meniń qolyma sizdiń kúndeligińiz tústi. (Jalpy anam týraly maǵan kóp adam aıta bermeıtin) Sizdiń qasıetti meken Qyzylordada týylyp, arman qýyp Almatyǵa baryp, JenPI bitirgenińiz, dos qyzdaryńyzben bolashaqty armandap jospar qurǵanyńyzdy oqyǵanda, men Sizdi jańa qyryńyzdan tanydym. Siz ótkergen stýdenttik ómirdiń qyzyǵy men shyjyǵy, Siz josparlaǵan  bolashaq Armandar men murattar meniń ómirime jańa silkinis ákeldi. San saqqa  júgirgen balalyq qıalym men jastyq kóńilim jańa arnaǵa buryldy. Men aldyma maqsat qoıdym. Anam josparlaǵan bıikke shyǵyp, anam qol sozǵan armandy júzege asyrsam degen talap paıda boldy.

Anashym, men sizdi ómir boıy súıip ótemin!

Maǵan eń meıirimdi de qomqor áke syılaǵanyń úshin, meni eshqashan jalǵyz qaldyrmaǵanyń úshin, meni ómirge ákelgeniń úshin rızamyn!

Ómir degen turady tań men keshten

Ǵumyrly eki arany janmen keshken.

Qupıa, syrly jumbaq dúnıege

Adamdar Armen kelip, Armen ketken

Bul‒meniń endigi ómirdegi kredom bolmaq!

...Anashym, men sizge taǵy da til qatamyn.

‒ Siz meni osy jolda qorǵap, qoldaısyz ba?

‒ Árıne, jaryǵym! Sen qandaı mamandyqty tańdasań da seniń Adam bolǵanyńdy, bilikti maman bolǵanyńdy kórgim keledi. Eshqashan umytpa, men senimen birgemin!

‒ Anashym, siz maǵan ómir syıladyńyz, meıirim men mahabbat, úmit pen arman syıladyńyz. Men ol sezimderdi ómir boıy aıalap ótemin! Anashym...

---