InfoHub Logo

Atyraý oblysy

Isataı aýdany

Isataı selosy

Isataı orta mektebiniń

10 synyp oqýshysy: Qaıyrjanova Asylaı Bekzatqyzy

Ustazy:  Ǵumarova Aǵzıa Zulharnaıqyzy

 

         Uly Dala tósinde erkin kóship, en jaılaǵan baıraqty babalarymyz toqymyna basar jalǵyz atyn el shetine jaý tıse, er basyna kún týsa dep saqtaıdy eken. O shetinen, bu shetine deıin qyran qanaty talatyn, syzyp qoıǵan shekarasy bolmasa da «atajurt», «atakúldik», «kindik qany tamǵan jer» degen ólshemmen kesip- peship, qyzǵyshtaı qorydy. «Qý tolaǵaı bastanyp, temir qazyq jastanyp júrip», «Biz – qazaq degen elmiz» dep keýdesin kerip, jaýynyń pysyn basty.

                   Qaısarlyǵy qara tasty úgitken,

                   Qaharynan qas dushpany úrikken.

                   Qaıyrymdylyǵy tas júrekti jibitken,

                   Arǵy tegi Alashtan taraǵan,

                   Keregesin aǵashtan quraǵan

                   Taǵdyrdyń tezine, qoldan jasaǵan tozaqtyń ózine shydaǵan elmiz,- dep jaýyna almastaı tilin bezep, bir qarys jerin de bermedi.

         Sol bir zamandardyń aýmaly- tókpeli oqıǵasyn Juban atamyz «Men- qazaqpyn, myń ólip, myń tirilgen» degen bir-aq aýyz sózge syıǵyzyp jibergenin qarashy.

         Iá, kúndiz tirshiliktiń qamymen saıyn Dalasynda qoı baqqan babalarymyz túnde kókke qarap oı baqty. Kórgeni men sezgenin, bilgeni men túıgenin tiliniń ushyna qondyryp, jyldar kóshimen keıingi urpaǵyna jetkizdi.

         Zamana daýylyna tótep berip, adamzat  balasy týdyrǵan sheksiz múmkindikter men damý zamanyna kóshten qalmaı, júgi jolda aýmaı HHİ ǵasyrdyń tabaldyryǵyn attady.

         Qazaqstan -  bul kúnderi kók baıraǵyn baılar shańyraǵy shalqyǵan, keregesin keń jaıyp talaı jurttyń balasyn baýryna tartyp, tynyshtyq pen berekeniń, tatýlyq pen merekeniń Otany bolǵan, óz úni, óz kebeti, óz sáýleti, en dáýleti bar irgeli el. Tórtkúl dúnıe bas qosqan Birikken Ulttar Uıymynyń tórinen sańqyldap Ana tilimizdiń estilýi: «Endi eshkim ózgerte almaıtyn bir aqıqat bar! Ana tilimiz Máńgilik elimizdiń Máńgilik tili bolady. Qazaq tilin daýdyń taqyryby emes, ulttyń uıytqysy ete bilgen jón» degen Elbasynyń sóziniń aqıqatqa aınalǵany emes pe?!

         Elbasy belgilep bergen «Qazaqstan-2050» strategıasy- ulttyń uly baǵdary, Qazaqstandy mekendegen barsha ulttyń armany boldy.

         Qazaqstan-kóp ultty memleket. Elbasy aıtqandaı, kóp ultty bolýymyz - bizdiń baılyǵymyz, maqtanyshymyz.

                   1937 jyl edi.

                   Poezd júıitkip keledi.

                   Terezeden turmyn qarap tańdana:

                   Dala, dala, keń dala.

                   Sodan keıin azaptan toryqqanym esimde,

                   Sodan keıin qazaqtarǵa jolyqqanym esimde.

                   Qushaq jaıyp qarsy alǵany esimde,

                   Qurmet qylyp án salǵany esimde.

                   Joq, umytpan,

                   Umyta alman jandardy ol,

                   Dostyqtyń otymen júregimdi jylytqan.

                   Qazaqstan! Gúlstan! Ǵajapstan! Kúnistan!

                                                                        En Sen Nen

         Iá, san ulttyń basyn osyndaı ǵajap ólkege zamannyń jeli, taǵdyrdyń tezi, tarıhtyń tolqyny, saıasattyń salqyny qosty.

         «Tili basqa,- tilegi bir, júzi basqa,- júregi bir» san ulttyń balasy «Biz Qazaqstandyqpyz!» dep maqtanyshpen aıtady.

          Men-Qazaqstandyqpyn! Analarymyzdyń kóz jasy, Arýlarymyzdyń Ary, erjúrek atalarymyzdyń qany tógilgen keń baıtaq Uly Dalanyń ıesimin. Sondyqtan meniń ıyǵyma artylǵan mindet júgi aýyr, paryz júgi aıqyn. Men ony júregimmen sezinemin.

         «Jaratqannyń meıirimi sheksiz, aldy keń» dep otyrýshy edi atam. Osyndaı en baılyqty, meıirimdi de jomart halyqty ıesiz qaldyrmady. Eli qalap, jurty qoldap Elbasyn saılady. Elbasynyń kóregendigi men sarabdal saıasaty arqasynda elimiz Eýrazıa kindigine aınaldy.

         Saryarqanyń tórinen boı kótergen jas qala bul kúnderi bas qala atanyp, aı saıyn emes kún saıyn kelbetine kórik qosyp keledi.

         «Baqyt, qaıda barasyń?» dep suraǵan eken degen támsil bar halqymyzda. Sonda: «yntymaǵy jarasqan, qýanysh pen qaıǵyda da qol ustasyp birge bel asqan, qaıyrymdy da meıirimdi, berekeli jerge baramyn!» degen eken deıdi.

         Men-baqytty urpaqpyn. Kóregen de dana, aýzy dýaly sheshen, túrtkúl dúnıeniń tynyshtyǵyn oılaǵan kósem Elbasymyz jastarǵa úlken mindet júktep, úmit artyp otyr.

         «Eldik pen Táýelsizdiktiń kıeli kók Týyn HHİ ǵasyrda asqaqtata jelbiretetinder-jastar, sender bolasyńdar!» degen Elbasynyń  senimin aqtaýǵa osy kúnnen tyrysyp kelemin.

         Kúni keshe Astana qalasy, Prezıdent ortalyǵynda ótken «Álemdi ózgertetin ıdeıalar» semınar-trenıngine qatysýym maǵan ózime degen senimdilik pen asqaq arman syılady. Elbasynyń tikeleı efırde jastarmen suhbattasýy, ǵarysh salasynda damyǵan elderdiń qataryna qosylýǵa tikeleı sebep bolǵan Aıdyn Aıymbetov aǵamyzben kezdesý, Eýrazıa ulttyq ýnıversıtetiniń ǵalymdarynan dáris alý, tarıh ǵylymdarynyń profesory Bolat Kómekovtyń qolynan Sertıfıkat alýym qıalymnyń shyndyqqa aınalǵandaı áser qaldyrdy. Jastyq jigerim men kúshimdi bilim alýǵa, izdenýge, álemdi tanı otyryp, óz Otanym- Táýelsiz Qazaqstandy damytýǵa jumsaımyn degen kulshynys kishkene júregime qýanysh syılady. Men elime, Prezıdentime senemin! Men ózime, bolashaǵyma senemin! Sebebi zamanaýı qoǵam – bilekke emes, bilimge senetin kezeń.

         Men-Qazaqstandyqpyn! Bul men úshin bilim alý quqyna ıe bolý degen sóz  ǵana emes, alǵan bilim-ónegemdi ózime, otbasyma jáne Otanym Táýelsiz Qazaqstannyń gúldenýi men órkendeýine jumsaımyn degen uly jaýapkershilikti júkteıdi.

                   Men - Qazaqpyn, órenimin elimniń,

                   Jamandyqtan, nadandyqtan jeridim.

                   Urpaǵymyn qasıetti qazaqtyń,

                   Ulylardyń arqalaǵan senimin.

        

Men - qazaqpyn, ıesi osy dalanyń,

                   Topyraqqa tamyr jaıǵan tabanym.

                   Til-dinimniń bıiktetip bedelin,

                   Qaı kezde de qazaq bolyp qalamyn.

---