InfoHub Logo

BAQ ókilderiniń suraqtaryna jaýap bergen vedomstva basshysy ótken jyly atqarylǵan jumystarǵa toqtalyp qana qoımaı, bıylǵy josparymen de bólisti. Onyń aıtýynsha, oblysta jalpy bilim berý boıynsha 146 mektep bar, onyń ishinde – 134 memlekettik, 5 - jekemenshik, 7 - keshki aýysymmen oqytady. Al shaǵyn jınaqty mektepter sany – 12. Ótken jyly oqýshylar kontıngenti – 127 168 qurady, al 2016 jyly bul kórsetkish 119590 bolatyn. Úsh aýysymmen jumys jasaıtyn mektepter sany – 8, onda bilim alyp jatqan oqýshylar sany 1939-ǵa jetken. Óńir ekonomıkasynyń damýyna qajetti mamandardy daıyndaý maqsatynda oblys ákiminiń 250 granty bólingen.Eń bastysyMańǵystaýda apatty jaǵdaıda turǵan birde-bir mektep joq.

3-6 jas aralyǵyndaǵy balalardy mektepke deıingi tárbıemen jáne oqytýmen qamtý -93% quraǵan. Oblysta 262 mektepke deıingi uıym bar, onyń 40% jekemenshik. Ótken jyly 26 mektepke deıingi uıym iske qosylsa, bıyl 28 balabaqsha paıdalanýǵa beriledi dep kútilýde.

 «Rýhanı jańǵyrý» baǵdarlamasy aıasynda ótken jyly alǵash ret oblystaǵy barlyq bilim berý uıymdarynda «Jasyl mektebim - jasyl mekenim» atty jobasy iske qosyldy. Joba aıasynda kezeń-kezeńimen barlyq mektepterde jylyjaılar salynyp, mektep aýlalaryn kógaldandyrý júrip jatyr. Aımaqtyń klımattyq ereksheligine baılanysty qolǵa alynyp otyrǵan bul joba mesenattar tarapynan qoldaý tapty. Buǵan qosa, aımaqta 9 mekteptiń qurylysy qarqyndy júrip jatyr», - dedi oblystyq bilim basqarmasynyń basshysy Zeınep Tastemirova.

Sonymen qatar, osy aıdan bastap oqýshylarǵa óz kásibin ashýdy úıretý maqsatynda oblystyń 30 mektebinde «kásipkerlik negizderi» jańa jobasy bastaldy. Jańa formattaǵy bul joba oqýshymen qatar onyń ata-anasyn da kásipkerlikke úıretýge baǵyttalǵan jáne oqýshylardy jas bıznes kóshbasshy bolýǵa tárbıeleıdi.

Jahandaný zamanynda aqparattyq saýattylyqpen qatar, kóptildi meńgerý máselesi tur. Osy oraıda, QR Bilim jáne ǵylym mınıstrligi tarapynan 600-den astam muǵalim aǵylshyn tili kýrstarynan ótken. Al jergilikti búdjet qarjysyna 300 aýyl muǵalimi aǵylshyn tilin meńgerýdi jalǵastyrýda.

Zeınep Tastemirova aǵymdaǵy jyly atqarylýy tıis jumys josparymen de bólisti. Onyń aıtýynsha, bıyl«Bilim úzdigi-2018» oblys ákiminiń premıasyn ótkizý josparda bar. Sondaı-aq, bilim berý uıymdary ǵımarattaryn aǵymdaǵy jáne kúrdeli jóndeýden ótkizý, materıaldyq-tehnıkalyq bazasyn nyǵaıtý, «Barshaǵa  arnalǵan tegin tehnıkalyq  jáne kásiptik bilim» jobasyn júzege asyrý, bilim berý mekemelerindegi robototehnıka laboratorıalarynyń sanyn arttyrý, dýaldi oqytýdy engizý boıynsha «jol kartasyn» iske asyrý, tehnıkalyq jáne kásiptik bilimberý uıymdarynda kredıttik-modýldik oqytý tehnologıalaryn kezeń-kezeńimen engizý sıaqty birqatar mindetter turǵanyn aıtty.

Kámshat İzbasarova