InfoHub Logo

Ótkende mektep dırektory bir jıynda oqýshylardy únemi maqtap turýymyzdy surady. Bul kóptegen máselelerdiń aldyn alatynyn jáne balanyń tilin tabý, mereıin ósirýdiń alǵysharty ekenin eskertti. Rasynda, osy biz maqtaýdy jaqsy kóremiz de, bireýdiń jetistigin asyryp maqtaý, lebiz bildirý, nıettes bolý degen sıaqty qasıetterden kem ekendigimizdi sezindim. Ózińiz oılańyzshy: Sizdi kópshiliktiń aldynda maqtaýyńyzdy asyryp, myqty áriptes, maman retinde baǵalasa, mereıińiz ósip, kóńilińizde qýanysh kerneıdi emes pe? Dál solaı balalarymyzdyń nemese oqýshylardyń kishkentaı bolsa da jetistikterin aýyzǵa alyp, kópshilikke jetkize bilsek, ol balanyń bolashaqtaǵy talpynysy men talabyna aıryqsha áser etetinin sózsiz.

Sonymen biz kúndelikti balaǵa qansha ret maqtaý aıtamyz. Jáne onyń jetistigi úshin nemen marapattap jatyrmyz?

1. Balańyz saıystan nemese olımpıadadan maqtaý qaǵazdarymen oralsa, jaı ǵana "jaraısyń!" dep aıtyp qoıa salý jetkiliksiz. "Sen meniń úmitimdi aqtadyń, senen myqty ǵalym, jýrnalıs, ádebıetshi shyǵady" degen sıaqty madaqtaý sózder aıtýymyzdy umytpaýymyz tıis.

2.  Kúndelikti alǵan baǵalarymen maqtaný balanyń ádeti. Ondaı sátterde "jaqsy oqý-seniń mindetiń!" dep balaǵa júk artpaı, "men de kezinde kúnde jaqsy baǵa alýshy edim, sen ózime tartqan ozatsyń, senimen maqtanamyn" degen sózdermen ózińizdiń artyńyzdan erip kele jatqan urpaǵyńyzben maqtanǵanyńyz durys. Ádette, balalar óz ata-anasyna eliktep, solarǵa uqsap baqqysy keledi.

3. Eshqashan balańyzdy kórshińizdiń nemese týystaryńyzdyń balalarymen salystyrmańyz. Salystyrý-balanyń jeke tulǵa retindegi "mendigin" óltirý degen sóz. "Jurttyń balasy" tirkesi qanshama balalardyń jaman kompleksterin týdyryp, ómir boıy onymen kúresýge ıtermelegen. Ol-sizdiń balańyz. Jáne ol basqalarǵa uqsaýǵa mindetti emes! Árqashan balaǵa: "Sen erekshesiń, óıtkeni sen meniń balamsyń, senen artqy bala maǵan kerek emes" degen sózder balanyń mereıin ósirip, ózine degen senimdiligin arttyrady.

4. Balanyń endi damyp kele jatqan shyǵarmashylyǵyn damytatyn da ata-ana. Óıtkeni alǵash ret qolyna qalam alyp sýret salý, óleń jazý, án salý, mýzykalyq aspaptardy meńgerýde alǵashqy pikir aıtýshy-ata-anasy bolady. Osy kezde jaqsy madaqtaýlar talantty balalardyń dúnıege kelýine septigin tıgizedi.

5. Balanyń birinshi qadamyna únemi qoldaý bildirińiz. Bala únemi qoldaý, madaqtaýǵa muqtaj. Óz qolyńyzben balańyzdyń bolashaǵyna balta shaýyp júrmeńiz. Siz qalaı maqtaý súıseńiz, óz perzentińiz de maqtaýdy, jyly lebiz bildirip, qoldaý kórsetińizdi shyn júrekten qalaıdy. Júregińiz balaǵa kelgende árdaıym taza bolǵaı!

---