InfoHub Logo

Búgin, 14 jeltoqsan kúni túnde qazaqstandyq KazSTSat mıkrojerseriginen ǵaryshta túsirilgen alǵashqy sýret alyndy, dep «Qazaqstan ǵarysh sapary» UK» AQ-nyń baspasóz qyzmeti habarlaıdy.

Eske sala keteıik, 2018 jyldyń 4 jeltoqsanynda Astana ýaqytymen 00 saǵat 32 mınýtta Kalıfornıadaǵy Vandenberg bazasynan Falcon 9 Block 5 zymyran-tasyǵyshy ushyryldy. Ol zymyran-tasyǵysh orbıtaǵa shaǵyn spýtnıkter men kýbsattardy alyp shyqty.

Ushyrylǵan qazaqstandyq eki ǵarysh apparatynyń bireýi - KazSTSAT - salmaǵy 100 kelilik tehnologıalyq mańyzdy spýtnık. Shaǵyn spýtnık SSTL-X50 alańynda qurastyrylǵan. Orbıtanyń bıiktigi - 542 shaqyrym. Spýtnıkti 2015 jyldan bastap SSTL (Surrey Satellite Technology Ltd) aǵylshyn kompanıasynyń bazasynda «Ǵalam» birlesken kompanıasyndaǵy qazaqstandyq mamandar qurastyrǵan.

Qazaqstannyń ekinshi ǵarysh apparaty - salmaǵy 5 kelilik KazSciSat 1 kýbsaty. Ony «Ǵalam» birlesken kompanıasy (LLP Ghalam) qurastyrǵan. Ǵylymı nanospýtnık Jerdiń magnıttik aýmaǵyn ólsheýge arnalǵan.

Ońtústik Amerıka aýmaǵynyń ústimen ushyp ótken KazSTSat Argentınanyń ońtústigindegi iri kemejaı - Rıo-Grande qalasyn sýretke túsirip alǵan. 

---