InfoHub Logo

Tory bıeniń kóziniń bireýi sonanyń kózindeı appaq, ekinshisi móldiregen qońyr. Jurt ony shaǵyr bıe deıdi. Shaǵyr bıeniń bir jaman minezi – únemi aýa jaıylyp, dara júredi.

Qazir de púlishteı jyltyr saýyryna qonǵan shirkeıdi quıryǵymen qaǵyp, jaıylymǵa bettedi. Janynda jas qulyny júr. Qulynshaqtyń jibek jalyn jel úrleıdi. Úlpildegen kishkene quıryǵyn sermeleıdi. Oınaqtap, aınala shabady.

Shaǵyr bıe daǵdysynsha toǵaıǵa qaraı tartty. Sońynan Maılyaıaq ere ketti. Maılyaıaq – shyqshytty, keýdeli, úlken aq tóbet. Ótkir sary kózderin qulyndy bıeden aıyrmaıdy. Kezdesken taı-saıaqty qýyp tastaıdy da, tilin salaqtatyp jata ketedi. Aspan ashyq, suıyq aq bulttar ǵana qozǵalmaı tur. Qulyndy jaqsy kórip, jarysyp oınamaq edi, shaǵyr bıe qulaqtaryn jymıtyp tap bergen soń alystap ketti. Taqym júnin tistelep, ótkir azýlaryn saq-saq etkizdi. Jyltyr tumsyǵyn kóterip, alystaǵy aýylǵa qarady. Nurjandy saǵynǵan, keýdesine sekirip erkelegisi keledi. Ol bar­da kóńilsiz bolmaıdy. Shaǵyrdy kóz jazbaı kúzetýge úıretken sol. Biraq tapal sary balanyń pıoner lagerine ketkenin qaıdan bilsin. Qarny ashqan soń aýylǵa jorta jóneldi.

Shaǵyr bıe toǵaı arasyna kirdi. Syldyrap bulaq aǵyp jatyr. İńir bolypty. Aı sáýlesi sý betinde oınaıdy. Aınala typ-tynysh. Tómende jar astynda qatty aǵynnyń saryny estiledi. Kári úıeńkiniń túbine kelip, uzaq úıkelendi de, qulamadan qanyp sý iship, qaıta jaıyldy. Qulyn kósilip uıyqtaýǵa jatty. Ústinde boz shirkeıler yzyńdaıdy. Enesi de kózinen sorasy aǵyp qalǵyp ketti.

Bıe basyn kóterip alǵanda, aldynda úlken kók ıt tur edi. Osqyrynyp qarady, qulaqtaryn qaıshylap, jer tarpydy. Kók ıt bir jatyp, bir turyp erkeleıdi. Betegeden bıik, jýsannan alasa bolyp jaqyndaı tústi. Bıe tynyshtalyp, jerge bas qoıdy. Qulynshaq kerilip ıtke qaraı birer attaǵanda tura atylyp, iliktire almady. Qulynshaq enesiniń baýyryna tyǵyldy. Bıe tarpyp jiberdi.

Bul – kádimgi qasqyr edi. Shaǵyr aınala qýalady, qara terge tústi. Qasqyr ash eken. Qalaıda qulyndy jep ketkisi keldi. Aı bultqa jasyrynyp, aınala qarańǵylanyp ketti. Qasqyr tilegine jetetin boldy. Osy kezde aǵash arasynan shyǵa kelgen Maılyaıaq qasqyrǵa tura umtyldy. Jyrtqysh bassaýǵalap qasha jóneldi. Maılyaıaqtyń yzaly úni toǵaı arasynda uzap bara jatty. Shaǵyr bıe qulynyn emizip, ıiskelep tur. Kópten soń ústi-basy qan-qan bolyp, qulaǵy jyrylǵan Maılyaıaq keldi. Quıryǵyn bulǵap, qyńsylaı berdi. Ketip qalǵanyna keshirim suraǵany edi. Bıe pysqyrynyp qoıyp alańsyz jaıylymǵa kiristi.

Maılyaıaq jarasyn jalap alyp, aınala shapty, sekirdi.

---