InfoHub Logo

Shil ormandaǵy qustardyń eń usaǵynyń biri. Kishkentaı  ǵana qońyr jaǵal balapandaryn ertip, qalyń shóptiń arasynda kún uzaq shybyn qýýmen júredi. Balapandar shıqyldap, dymqyl kógalǵa súńgı júgirip, damyl kórmeıdi. Bytyrap bara jatsa, ana shil qońyr aıdaryn silkip, qoryldap dybys beredi. Onysy — baıqa, qaýip bar degeni.

Ie, qaýip degenińiz aıaq astynda. Óte kóp. Shildiń qońyr balapandaryna saýysqan da qumar. Shil qaıda jaıylsa, ol da sol mańaıda júredi. Orman urysy  ala qarǵa da árkez nazaryn salady. Qarshyǵa men qyrǵıy taǵy bar. Barlyǵynyń aınaldyratyny shil. Balapandarynyń beıqamdyǵy, baǵýsyz kezi. Qapylysta ilip ketse, arashalaýǵa shilde dármen joq. Saqtyq úshin ana shil balapandaryn qanattanǵansha orman arasyndaǵy kógal  ishinen shyǵarmaıdy.

Kógal — qanattylardan qorǵaǵanymen, aıaqtylardan qorǵaı almaıdy. Orman kezgen qý túlkiniń murny sezbeıtin ıis joq. Jaýynyń jaqyndap qalǵanyn mekıen shil birden sezedi de  balapandaryn jasyryp, ózi túlkiniń aldyna kóldeneńdeı qalady. Qanaty synǵan jaraly qus bolyp kórinedi de, túlkini sońynan ertip, aýlaqqa alyp ketedi. Mundaıda ol qaýipten qoryqpaı, jaýynyń aldynda taıaq tastam jerde jorǵalap bara jatady. Túlkini uzatyp salyp, shil usha jóneledi. Aldanyp qalǵan qý ańyryp az turady da,  jónine kete barady.

Shil balapandaryn ertip, daǵdyly tirligine kirisip edi. Qanat sýylyn estip, buǵa qoıdy. Semserdeı jarqyldaǵan sur qarshyǵa jaıqap ótti. Ekinshi ret zýlap ushty. Álginde josyp júrgen kóp balapan jer jutqandaı joq boldy. Qarshyǵa aınalyp kelip, kóldeneń butaqqa qonyp otyrdy. Eń qyraǵy degen jyrtqyshtyń ózi ańǵarar emes. Balapandar bolsa qol sozym jerde ǵana, shóp arasynda buǵyp jatqan. Qozǵalsa bas salýǵa ańdyp qarshyǵa otyr. Mekıen shil tarǵyl qaýyrsyndaryn kirpideı tikireıtip sonshalyq qaharly daýyspen shańq etti de  kózderi ot bolyp janǵan qaterli jaýyna atyldy. Atylǵan bette qarshyǵany topshymen soǵyp ótti. Ana shildiń qaıratyna shydamaı, sur jyrtqysh bıik qaıyńdardyń tóbesinen asyp joǵaldy. Shil baıǵus jerge qulap tústi de, topshylary qaltyrap kóp jatty. Sonan soń esin jıyp, balapandaryn shaqyra bastady.

Qam-qareketi kóp jaz da bitip, salqyn kúz keldi. Orman japyraqtary túsip, jutap qaldy. Jyl qustary jyly jaqqa qaıta bastady. Shil ǵana balapandarymen týǵan jerde qaldy.

---