InfoHub Logo

Bul maqalany jazǵan kezde ishimde túrli emosıalardyń arpalysy boldy desem ótirik aıtpaǵanym bolar. Sebebi, mektepte ótken ýaqyttaryńdy, túrli qyzyqtarǵa toly sátterdi jazý ońaı emes. Alaıda, ózimniń mektepke degen saǵynyshymdy tek qaǵaz betine túsirý arqyly ǵana basa alamyn.

Mektep... Bir sózdiń ózi qanshama qýanyshty sátterge toly deseńizshi! Oıyn qýyp júrip, 11 jyldyń qalaı ótkenin bilmeı de qalyppyn. Artqa kóz salsam osy jyldardyń beınesinen balalyq shaǵymnyń baldaı tátti kezderin kóremin.

Alǵash qolyma gúl shoqtaryn alyp, mektep tabaldyryǵyn attaǵanym, maǵan kúlimsirep qaraǵan ustazymnyń aqjarqyn kelbeti áli de esimde. Basynda barlyq zatqa tańyrqaýmen bastalǵan mektep ómiri keıinnen janyńa jaqyn dos tabýmen ushtasty.

Árıne, alǵashqy árip tanýyń, alǵashqy alǵan bestik baǵalaryń, mektep týraly, onyń ne ekenin, maǵynasyn túsingen ýaqyttar – munyń bári de adamnyń jadynan óshirilmeıtin estelikter. Maǵan bilim berip, qanatymnyń keńistikte jaıylýyna  múmkindik bergen alǵashqy mektebime alǵysym sheksiz!!!

Umytylmas esimiń,

Armandardyń ashtyń esigin

Máńgi óshpes iz qaldyrǵan lıseı...

Iá, men 11 jyldyń ishinde bir ǵana mekteptiń oqýshysy bolǵan joqpyn. Armandaǵan armandaryma jetý jolynda men qazaq-túrik mektep-ınternatynyń  (“BİLİM-INNOVASIA” lıseıi) jas shákirti atandym. Ómirimniń eń qyzyqty, eń maǵynaly bes jyly osy lıseı qabyrǵasynda ótti desem qatelespegenim bolar...

Lıseı – bul óziniń aıryqsha tárbıesimen, joǵary bilimimen, bilikti muǵalimderimen kózge túsetin Qazaqstandaǵy birden-bir bilim ordasy. Alǵash jataqhanada turyp ata-anamdy saǵynǵan kezderim, sabaqtarymnyń qıyndap, olardy oqýǵa úlgermegen shaqtarym áli esimde. Alaıda, dál osy kezde maǵan jan-jaqtan kelgen, biraq, bir úıdiń balasyndaı bolyp ketken qurbylarym qoldaý kórsetti. Biz bir-birimizben bir nandy bólisip jedik, qıyndyqty bárimiz birge kórdik, urystyq, keristik, biraq báribir de sońynda tatýlasýdy umytqan joqpyz. Shynymdy aıtsam, osy sátterdi esime túsirgende kózime saǵynyshtyń jastary keledi. Meniń júregimde ár synyptasymnyń orny bar. Sebebi, árqaısysy óziniń maǵan jasaǵan jaqsylyǵymen erekshe.

Lıseıim jaıly áńgime qozǵaǵanda maqsatymdy aldyma aıqyn qoıýdy, ómirdiń kishkene bóligin bolsa da tanyp-bilýdi úıretken ustazdarym men tárbıeshilerimdi aıtyp ótpesem bolmas. Lıseı bizge janyńa jaqyn jandarmen qoshtasýdy, alaıda, olardy umytpaýdy úıretti. Muny aıtqan sebebim, osy 5 jyl ishinde biz talaı muǵalimderdiń aqyl-keńesterin aldyq, tárbıeshilerdiń tálim-tárbıesin boıymyzǵa sińirdik. Janymyzda júrgen ár tálimger, ár tárbıeshi bizdiń máńgilik jadymyzda. Qasymyzda anamyz bolmaǵanda, bizdiń qýanyshty sátterimizge kýá bolǵan osy jandar ekenin senimmen aıta alamyn.

Búginde biz – mektep bitirgen túlektermiz. Ár qyryq bes mınýttyq sabaqtardy, úzilisterdi, aqkóńil muǵalimderimiz ben ápkemizdeı bolyp ketken tárbıeshilerimizdi, alǵashqy qońyraý úni  men sońǵy qońyraýdy saǵynatyn túlektermiz. Jáne de birge týǵan baýyrdaı bolyp ketken jan dostarymyzdy saǵynamyz. Biz – ishine qýanysh pen túrli estelikterdi saqtap qalǵan mektep atty kemeden tústik, balalyqtyń esigin japtyq. Alda bizdi baǵyndyrar talaı belester tur.

Qorytyndylaı kele, boıyma bilimniń nárin sepken mektepterime tek alǵa qaraı órkendeýdi jáne maǵan bilim bergen ár ustazǵa  aldaǵy ýaqytta tek sáttilik tilegim keledi. Al qıyn qystaý zamanda birge bolǵan dostaryma bolashaqta bilimniń bıik shyńyna shyǵýyna shyn júrekten tilektespin.Men senderdiń jetken ár jetistikterińe qýanamyn, maqtan tutamyn.  Keleshekte árqaısysymyz eldiń betke ustar azamatshasy bolyp, álemniń jarqyraǵan 27 jaryq juldyzyna aınalatynymyzǵa kámil senemin!!!   

---