InfoHub Logo

Qaraǵandy oblysynyń mektep dırektorlary búdjet qarjysy esebinen shetelge tájirıbe almasýǵa jiberiletin bolady. Bul týraly bilim qyzmetkerleriniń dástúrli tamyz konferensıasynda oblystyq bilim basqarmasynyń bastyǵy Asqat Aımaǵambetov aıtty.

Bilim berý salasynda josparlanǵan jańa jobalarǵa toqtalǵan A.Aımaǵambetov  basshylardyń biliktiligin kóterý kózdelip otyrǵanyn atap ótti. Atap aıtqanda, Qaraǵandynyń mektep dırektorlary búdjet qarjysy esebinen shetelge tájirıbe almasýǵa baratyn bolady.

«Shyndyǵynda, kóp estip, oqyǵannan, bárin óz kózimen kórý áldeqaıda artyq. Sondyqtan, mektep dırektorlary jumys nátıjeli bolýy úshin áriptesteriniń tájirıbesin úırenýi, bilýi qajet. Biz sizderdi bul máselede qoldaımyz. Elimizdiń, jaqyn jáne alys shetelderdiń úzdik mektepterine tájirıbe almasýǵa jiberý baǵdarlamasyn bir aıdyń ishinde jasaýdy tapsyramyn. Sonymen birge, pedagogtardy attestasıadan ótkizýdiń júıesin qaıta qarańyzdar. Bizge elektrondy úlgide rásimdeýge kóshý qajet», - dedi usynysty qoldaǵan Qaraǵandy oblysynyń ákimi Erlan Qoshanov.

Konferensıada aımaq basshysy qoǵamdaǵy ustazdyń róli men mańyzyn basa aıtty.

«Men ózim pedagogtar otbasynda óskendikten, muǵalimniń eńbegine zor qurmetpen qaraımyn. Pedagog bolý - jaýapkershilikti, kúrdeli ári qurmetti is. Muǵalim adamnyń qalyptasýyna jáne onyń taǵdyryna yqpal etedi. Ýınstona Cherchılldiń «Mektep muǵalimderi premer-mınıstr armandaıtyndaı bılikke ıe» degen sózi tegin emes. Elbasynyń bilimge, básekege qabilettilikke jáne ultymyzdyń bolashaǵyn tárbıeleýde alǵa qoıǵan tapsyrmasyn oryndaý tikeleı Sizderdiń eńbekterińizge baılanysty», - dedi ol.

İs-shara úzdik pedagogtarǵa QR Bilim jáne ǵylym mınıstrligi men oblys ákiminiń marapattaýlaryn tapsyrýmen aıaqtaldy. Al jas mamandarǵa noýtbýkter syıǵa berildi.

---