InfoHub Logo

- Aınurdy aıtamyn-aý, - deıdi apasy. - Aınurdy aıtyp otyrmyn! - deıdi sonan soń, "kimdi aıtyp otyrǵanymdy óziń bilip otyrsyń ba?" degendeı. Bul - apasynyń úlken aǵasyna qarap dastarqan basynda sóılep otyrǵandaǵy keıpi.

- Aý, bilip otyrmyn ǵoı, - deıdi aǵasy. - Aınur degen ózimizben qaraılas
oqyǵan jigitter emes pe?

- Sol bala mektepti altyn medalmen bitirdi ǵoı, - deıdi apasy.

- Aý, Aınurlar degen myqty oqyǵan jigitter ǵoı! - deıdi aǵasy. - Aınurlar degen mektepte myqty oqydy emes pe?!

- Áne! Oqysań, sol baladaı bolyp oqy! - deıdi apasy. - Aýyldyń qarapaıym uly. Mektepti óziniń bilimimen altyn medalǵa bitirip shyqty.

Apasy sońǵy sózdi aıtqanda bular otyrǵan jaqqa qarap otyryp aıtady. "Osyny sender úshin aıtyp otyrmyn, ózderiń birdeńe túsinip otyrsyńdar ma?" degendeı.

- Sol bala qaı ǵylymnyń sońyna tústi? - deıdi sonan soń taǵy da aǵasyna qarap.

Apasy osyny ózi bilip otyryp ádeıi suraıdy. Bul - apasynyń bularǵa tárbıe berýdegi metodıkasy.

- Tehnıka ǵylymy, - deıdi aǵasy. - Aınur tehnıka ǵylymynan qorǵady ǵoı.

- Áne! - deıdi apasy taǵy da bular otyrǵan jaqqa qarap. - Tehnıka ǵylymy!

"Tehnıka" degen sózdi aıtqanda apasy bir túrli salmaq túsirip aıtady.

- Toqbolat ta osy mektepti bitirdi ǵoı? - deıdi sonan soń taǵy da aǵasyna qarap. - Toqbolatty aıtyp otyrmyn?

- Iá, osy mekteptiń túlegi ǵoı, - deıdi aǵasy. - Osy mektepti bitirdi.

- "Órkendiniń" balasy ǵoı, - deıdi apasy "Órkendeý" degen aýyl jaqty bir nusqap kórsetip qoıyp. - Osy mektepti bitirdi. Qaıbir jyly sol bala ákeńe keldi. Oıpyrm-aı, ózin úlken adamdarsha ustaıdy. Eldiń tarıhyn surady ma, jerdiń tarıhyn surady ma, aýyldyń tarıhyn surady ma? Áne, bolatyn balanyń ózi sóıtip eski sózdi kerek etip júredi ǵoı. Bolmaıtyn bala tek búgingisimen ómir súredi. Kádimgi júrekteri ablyǵyp, ablyǵyp. Ushyp-qonyp. Tek kóziniń aldynda turǵandy ǵana kóredi.

"Sonyń biri sender ǵoı" degendeı apasy bular otyrǵan jaqqa shúılige qaraıdy. Sonan soń:

- Sol bala qazir qaıda? - deıdi óziniń kánigi ádisine kóship, suraǵynyń jaýabyn ózi bilip otyrsa da.

- Qyzylordada ǵoı, - deıdi aǵasy.

- Ne qyzmet isteıdi?

- Oblystyq gazette. Ádebıet bólimin meńgeredi. Ol kisi fılologıa ǵylymynyń kandıdaty ǵoı.

- Áne! - deıdi apasy taǵy da bularǵa qarap. - Ádebıet bólimin meńgeredi!

"Ádebıet" degen sózdi aıtqanda apasy tehnıka degen sózdi aıtqandaǵydaı, taǵy da salmaq túsire aıtady. Sirá, adamǵa tehnıka da kerek, ádebıet te kerek degendeı.

"Sol bala osy mektepti bitirdi", - deıdi sonan soń taǵy da bularǵa qarap otyryp. "Álde maǵan senbeı otyrsyńdar ma?" degendeı qarar edi.

Osylaı mekteptiń ilgeridegi túlekterimen birge mekteptiń burynǵy dırektorlary da, mekteptiń burynǵy ustazdary da qatarlasa aıtylyp jatar edi.

Arada birshama ýaqyt ótti. Bir kúni ózi de sol mektepke ádebıetten sabaq beretin muǵalim bolyp bardy. Birde pedsovettiń ústinde mekteptiń dırektory: "Kelesi jyly mektebimizge 50 jyl tolǵaly otyr", - dedi. Bul áńgime sodan keıin qozǵala qoımaǵan edi. Kelesi jyly oıyna tústi. "Sol áńgime byltyr aıtylmap pa edi? Onda mektepke 50 jyl tolyp otyrǵany bıyl ǵoı". Mektep jaıly birdeńe jazǵysy kelgeni sol edi, kóz
aldyna dastarqan basynda otyrǵan aq jaýlyqty apasy elestep ketkeni:

"Aınurdy aıtamyn-aý. Sol bala mektepti altyn medalmen bitirdi ǵoı".

"Bolatyn balanyń ózi eski sózdi kerek etip júredi ǵoı. Bolmaıtyn bala tek búgingisimen ómir súredi. Kádimgi, júrekteri ablyǵyp, ablyǵyp..."

Bul jazylǵan dúnıe maqamǵa salyp oryndalatyn mekteptiń burynǵy túlekteri men ilgeridegi ustazdarynyń aty atalatyn mektep tarıhyna baılanysty jazylǵan jyr edi.

Arada bir jyl ótti. Osy jyl mekteptiń óziniń 50-túlekterin ushyratyn jyly bolatyn.

Birde mádenıet qyzmetkeri bolyp isteıtin sazger jigitke: "Mektepke 50 jyl toldy. Bıyl mektep óziniń 50-túlekterin ushyrǵaly jatyr.
Osylardyń qurmetine bir án jazsaıshy", - dedi. "Óleńin jazyp alyp kelseıshi", - dedi sazger jigit.

Bul áńgime aqpan aıynda aıtylǵan edi. Arada úsh aı ótkende mamyr aıy bastalysymen-aq, kóktemniń jaıma-shýaq kúnimen birge ashyq turǵan synyp esikterinen ár úzilis saıyn mekteptiń bitirýshi 50-túlekteri óz mektepteriniń ánin shyrqap jatty. Ana mektep 50-ge keldi. Ana mektep óziniń 50-túlekterin ushyrǵaly turdy. "Qojabaqy mektebiniń válsi" ániniń sazynyń avtory - bul kúnde Qazaly aýdandyq mádenıet Ortalyǵynyń dırektory bolyp qyzmet atqaratyn Kemeńger Ótep. Túlekter ándi qaıta-qaıta shyrqady. Sonan soń ózderiniń sońǵy qońyraýlaryna arnalǵan saltanatty jıyndaryna alyp shyqty. Mektep bitirý keshinde áýeletti.

Jazylǵan dúnıelerdiń ar jaǵyn oılasa, sol bir dastarqan basynda anda-sanda jaýlyǵyn bir túzep qoıyp úlken aǵasyna qarap sóılep otyrǵan apasy kóz aldyna keledi. Al keıde tipti sona-a-ý jyly soǵystan oralyp, 20 jasynda mekteptiń meńgerýshisi bolyp, odan keıin basqa qyzmetke aýysqansha, sol qyzmetti 2 jyldaı atqarǵan, ol kezeńde Qazaly qalasynda ornalasqan oqý bólimi men aýyl arasyn atpen jol qylyp júrgen, áli apasyna qosyla qoımaǵan shaqtaǵy ákesi kóz aldyna elestep ketetini de bar.

---