InfoHub Logo

Memleketke adal qyzmet etý – óz elińniń patrıoty bolý Memleketke adal qyzmet etýdiń eń úlken dáleli – adamnyń óz elin súıetin patrıoty bolýynan kórinis tabady. Jalpy memleketke adal qyzmet pen patrıot bolý – ajyramas egiz uǵym. Eń aldymen, osy uǵymdardyń maǵynasyna toqtala ketsem. Memlekettik qyzmet degen ne? Memlekettik qyzmet – memleket qyzmetiniń bir salasy jáne memlekettik qyzmetshilerdiń memlekettik organdardaǵy bıliktiń mindetteri men fýnksıalaryn iske asyrýǵa baǵyttalǵan laýazymdyq ókilettiligin atqarý jónindegi qyzmeti bolyp tabylady. Sonymen qatar, bizdiń elimizde memlekettik qyzmettiń uıymdastyrylýy men atqarylýy kelesideı júzege asyrylatynyn bilemin. Olar: Qazaqstan Respýblıkasynyń barlyq zańdylyqtaryn bilý, týǵan jerine degen súıispenshilik, qazaqstandyq patrıottyq sezimi asa bıik bolyp, memlekettik qyzmet júıesiniń birtutastyǵy men azamattar quqyqtarynyń, bostandyqtarynyń jáne zańdy múddeleri aldyndaǵy basymdylyǵy. Al, patrıot degenimiz kim? Patrıot degenimiz – óz ultyn, tilin, dini men dilin súıetin, týǵan tarıhy men ata-babamyzdan jetken salt-dástúrin dáripteıtin, ózimen birge ómir súrip jatqan adamdarǵa mahabbaty sheksiz, óz ultynyń, eliniń damýyna barynsha úles qosatyn adam. Degenmen, zamanyń túlki bolsa, tazy bolǵa salyp, óziniń tilinde sóıleýge arlanyp, ataq men dáreje, baılyq úshin Otanyn satyp, ózge elderde sultan bolyp júrgender, nemese óziniń laýazymyn asyra qoldanyp, qalyqty qanap, memleketti tonap júrgender de az emes. Solarǵa qarap qynjylyp, júregim aýyrǵan kezde, Qazaq eline degen mahabbatym arta túsedi. Sol sebepten shyǵar, men óskende elbasymyz sıaqty halqyma adal qyzmetker bolamyn dep oılaımyn. Adal qyzmetker degen kim? Onyń is-áreketi, adaldyǵy neden kórinedi? Adal qyzmetker bolý – ár azamattyń Otanyna degen mahabbatynan bastaý alady. Al, Otanǵa degen mahabbat – kishi Otanǵa degen súıispenshilikten bastaý alady. Iaǵnı, ózińniń kindik qanyń tamyp, týyp ósken úıińe, alǵash topyraǵyn basyp, sýyn iship, qozy-laq qýyp, balalyq shaǵyń ótken aýylyńa, bir nan bolsa da bólisip jep, qulyn-taıdaı birge ósken dostaryńa, ońymyz ben solymyzdy kórsetip, qanattyǵy qaqtyrmaı, tumsyqtyǵa shoqtyrmaı ósirgen ata-anańa, alǵash qolyma qalam ustatyp, basymnan sıpap, bilim nárin bergen mekteptegi ustazdaryńa degen syılastyqtan, sheksiz alǵys bildirýden kórinis tabady. Meniń júregime adaldyqtyń dánin egip, qanymdy adaldyqtyń sýymen sýarǵan osylar. Adal qyzmetker bolý – ózińniń jeti atańdy bilý. Qazaqta «Jeti atasyn bilmegen – jetesiz», «Jeti atasyn bilmegen – jermen teń» degen sóz oramdary bar. Bul sóz oramdary tek qana jeti atasyn bilýdi meńzep turǵan joq, óziniń arǵy tarıhyn, ıaǵnı qazaqtyń ulan baıtaq jerin qasyq qany qalǵansha qorǵap, bizge amanat etip qaldyrǵan ata-babamyzdyń erligin bilý, solardyń erligin urpaqqa óleń-jyrlaryna arqaý etken aqyn-jazýshy, jyrshy, jyraýlarymyzdyń óleń, dastandaryn jattaý, keshegi repressıada qaza bolǵan qazaq zıalylary men jeltoqsanda tepkilenip, shashtan julynǵan aǵa-ápkelerimizdiń arýaǵyn bas ıý, keshegi ashtyqtan buratylyp, osy kúndi armandap ketkenderdiń armanyn jalǵastyrý. Iá, tarıh qoınaýyna bir sát kóz júgirtseń, bútin bir qazaq eliniń talaı-talaı belesterden ótip, sol belesten ótý jolynda neshe túrli qurbandyq bergenin kóresiń. Ótkenge kóz júgirtý arqyly – qazirgi beıbit ómirimizdiń, táýelsizdiktiń bal dámin sezinemiz. Búgingi tarıh – ótken tarıhtyń jalǵasy. Sondyqtan ótken tarıhymyzdy bilý – elin, jerin súıetin, tipti súımeıtin de ár azamattyń paryzy, boryshy, mindeti. Sol sebepti men mektepte «Qazaqstan tarıhy» sabaǵyn beske oqyp, «Jeti atamyzdy bilemiz be?» degen taqyrypta ǵylymı jumys jazyp júrmin. Bul meniń elimniń tarıhyna qosqan kishkentaı bolsa da úlesim ári memleketke qosyp jatqan adal eńbegimniń bastaýy dep bilemin. Tarıhqa kóz júgirte otyryp, óz eline, jerine adal qyzmet etken aǵalarymyzdan úlgi alamyz. Keshegi elin satyp, mahabbatty birinshi orynǵa qoıyp, Qalmaq qyzymen qashpaqshy bolǵan Noıandaı týǵan inisin óz qolymen óltirgen batyr Baıannyń is-áreketi - eline adal qyzmet ete almaı júrgen keıbir tulǵalar úshin óte úlken úlgi-ónege dep oılaımyn. Qazirgi keıbir memlekettik qyzmetkerler men batyr Baıandy salystyrýǵa da turmaıdy. Batyr Baıannyń maqsaty - eline adal qyzmet etý boldy. Ol osy jolda ózin de, jaqyn týystaryn da qurban etti. Osyndaı aǵalarymyzdyń erligi men halyq aldyndaǵy atqarǵan adal qyzmetteriniń arqasynda qazirgi Qazaq memleketi qurylyp otyr. «Bólingendi bóri jeıdi» degendeı, ózimiz «úı ishinen úı tigip» birimiz alǵa, birimiz artqa tartsaq kúırep qalarymyz anyq. Memleketke adal qyzmet etý – árkimniń óz otbasynan bastaý alady. Sebebi, ata-ana balalaryn adaldan tamaqtandyrsa, adal tamaqty jep ósken urpaqtan erteń memleketke adal qyzmet etetin tulǵalar tárbıelenip shyǵady. Burynǵa ata-babalarymyz eshqashan balalaryn ruqsat etilmegen (urlanǵan, bireýden zorlyqpen tartyp alynǵan, bısmılláhsiz soıylǵan, belgisiz jaqtan kelgen) tamaqpen tamaqtandyrmaǵan. Tipti qasıetti kitap Quran Kárimniń ózinde Allanyń ruqsat etkenderinen jeńder, tyıym salǵandarynan tyıylyńdar delingen. Iaǵnı únemi adaldan iship, adaldan kıiný kerektigi jaıly aıtylǵan. Onyń mánisi nede? Boıyndaǵy qany adal adamnan adal qyzmetker paıda bolady. Eger adamnyń jjúreginde aramdyq bolmasa, ol qazirgi adamdar jasap jatqan qıanatshyldyq, jemqorlyq, ósimqorlyq, sybaılastyq sáıqty áreketterden aýlaq bolady. Osy oraıda paıǵambarymyzdyń (s.a.s): «Adamnyń denesinde bir kesek et bar. Sol et taza bolsa, barlyq dene taza bolady, sol et lastansa, barlyq dene lastanady. Ol - júrek» degen sózderi esime kelip otyr. Iaǵnı, adamnyń adal bolýy, adal qyzmet etýi osy júrekten bastaý alady dep oılaımyn. Sondyqtan eline adal qyzmet etetin urpaq tárbıelegimiz kelse, eń aldymen, olardyń jegen tamaǵy men sol tamaqtyń áserinen júrekke tıgizgen paıdasyna nazar aýdarýmyz qajet sıaqty. Patrıottyq sezimge toly, halqyna adal qyzmet etýshi adam retinde búgingi bizge úlgi bolýshy – elbasymyz Nursultan Ábishuly Nazarbaev. Elbasymyz halqy úshin erinbeı eńbek etip, elimizdi damyǵan elý eldiń qataryna qosý úshin túrli srtategıalardy oılap taýyp, qarzirgi jaınaǵan jas qala Astanamyzdy búkil álemge tanytty. Táýelsizdik pen Elbasy – qazaq eliniń mańdaıyna bitken baqyty. Adal qyzmetker bolý – tek óz ultyńdy jaqsy kórip, solarǵa adal qyzmet kórsetý emes. Bizdiń elimiz kópultty memleket bolǵandyqtan, elimizdiń damýy úshin basqa ult ókilderi de aıanbaı eńbek etýde. Basqa ult ókilderiniń qazaq jerine kelip qonystanýyna, qazirgi urpaq kinály emes, ol ótken tarıhtyń izi. Biraq orys ta, uıǵyr da, nemis te qazaq elininiń qudyǵynan sý iship otyrǵandyqtan. İshken sýyna túkirmesi anyq. Sondyqtan barlyq adamzatty birdeı jaqsy kórýimiz kerek. Túptep kelgende barlyǵymyz bir Adam atanyń urpaǵymyz. Tek qana túrimiz ben, tilimiz basqa. Oıymdy qorytyndylaıtyn bolsam, adal qyzmetker bolý úshin soǵysqa baryp erlik jasaýdyń qajeti joq. Baýyrjan Momyshuly aǵamyzsha aıtsam: «Barlyq halyq pen ult - barlyq uly men tamasha nárselerdi jasaýǵa qabiletti, árbir azamat óz ultyn súıýge tıis jáne óz ultyna degen tereń súıispenshiligi men maqtanysh sezimi arqyly basqa ulttardy tanyp, qurmettep, olardy súıe bilýi tıis». Iaǵnı, elimizdegi ultaralyq dostastyq pen beıbitshilik pen kelisimniń kórinisi – óz elińdi, jerińdi, sol elde ómir súrip jatqan adamdar men jan-janýarlardy súıý. Ary qaraı tarıhymyzdy túgendep, elbasymyzdyń eren saıasatyna únemi qoldaý kórsetý. Aınalamyzdaǵy barlyq Allah jaratqan jaratylysty jaqsy kórsek, Allahtyń nazary da bizdiń elimizge túseri anyq. Bir-birimizdi jaı ǵana jaqsy kórsek, barlyq jaqsy istiń bastaýy sodan bastalmaq. Sondyqtan jaı ǵana bir-birimizdi jaqsy kóreıik, árbir qazaqstandyqtyń taǵdyry - bizdiń taǵdyrymyzben baılanysty dep qaraıyq. Taǵdyr jolymyzdy bir arnaǵa túıistirip, barlyq qıynshylyq pen kedergilerdi birge ótip, halqymyzǵa adal qyzmet etýge shaqyramyn.

Erkinbek İńkár

---