InfoHub Logo

Yqylym zamannan kele jatqan bostandyq pen azattyqqa degen qazaq jurtynyń umtylysy jáne soǵan qatysty kózqarasy ,mine búgin beıbit ómirde de óziniń mánin joıǵan joq,kerisinshe,halqymyzdyń bodan bolǵan jyldardy ara-tura eske alyp,ótkenge ókinip emes,maqtanysh,qurmet sezimderimen qarap,uly Táýelsizdigimizdi taǵy da bir qasterlep júrýine bastap kele jatqandaı. Táýelsizdik,shynynda kıeli uǵym. San ǵasyrdyń saǵymdy jyldarynda aty qalǵan batyr babalarymyz,odan beride keńestik zamannyń qylyshynan qan tamǵan alapat tusynda qurban bolǵan arys azamattarymyzdan keıin ashtyqqa qarsy ún kótergen qazaqtyń Rysqulovy,86-jylǵy qandy qyrǵynnyń qarlyǵashtary, teńdik ańsaǵan elimizdiń erkin oıly jastary osynaý qyzyqqa toly qýanyshty kúnderdi kórýge tıisti emes pe edi?!

Iá,osyndaı qıametpen kelgen asyl armannyń qunyn sózben aıtyp jetkizý múmkin be? Ómirimizdi shattyq pen jaqsylyqqa toltyryp,bolashaqtyń jarqyn bolatynyna sendirgen qaıran Táýelsizdik kózdi ashyp-jumǵansha jıyrma beske de kelip qalypty.Meniń Otanym Qazaqstan deıtin árbir azamattyń kókeıinde bul sharapatqa qalaı jetkenimiz týrasynda tolǵanystar júretini-osy mamyrajaı zamannyń nuryna shomylǵan sanamyzdyń ýaqytpen birge ósip-órkendegenindeı jańarýdyń basy,jabyǵýdyń aıaǵy eknin dáleldeıtin dúnıe. Jaqsy kúnderge qalaı jetsek,ony saqtap aıalaýǵa da sonshalyq mahabbat pen yqylas,senim men qoldaý kerektigi bizdi oılandyrýy kerek jáne árdaıym jasampaz elimizdiń jarqyn bolashaǵyn úlken kúsh-qýat,zor erik-jigermen qarsy alýǵa mindetti ekenimizdi umytpaýymyz kerek.

Keshegi Ahmet aǵalarymyz armandaǵan saýatty qazaq bul kúnde órkenıetke umtylǵan jańa mádenıet pen serpindi bilimge qol jetkizip, osy kúnge deıin jetken tabystarymyzdy bezbendeı otyryp,aldaǵy ýaqyttarda qandaı ıgiliktermen baıýǵa bolatynyna kóz jiberemiz. Táýelsizdik týy jelbiregen 25 jyl qazaq eli úshin kóptegen jaqsylyqtyń nyshany, jemisti jetistikterdiń tuǵyry, órkenıetke talpyný arqyly ǵajaıyptardyń júzege asatynyna sendirgen molshylyq,sheksiz múmkindikter kezeńi boldy degim keledi. Rasynda Qazaqstan álemdik bıikke umtylǵan tanymal memleket bolyp,tórtkúl dúnıeni ózine qaratyp otyrǵan damýshy memleket retinde jan-jaǵymyzdaǵy elderdi qyzyqtyryp,barynsha jańa zaman sahnasyna kóterilgen elge aınalyp úlgerdi.

Jańa ǵasyr-bilim ǵasyry sanalǵannan bastap,qazaq jastarynyń jahandyq bilim men mádenıetke sýsyndaýy qarqyndy damydy. Osylaısha orta deńgeıde órkendep kele jatqan Qazaqstan Táýelsizdikke táýbe etip,shýaqty kúnderdiń shapaǵatyn sezinip keledi.

Elbasymyz elimizdi áleýmettik-ekonomıkalyq turǵydan alǵa jeteleýdi erte qolǵa alyp,halyqtyń barlyq tustan ál-aýqatyn jaqsartýǵa orasan qajyr-qaırat jumsady. Ásirese,bilim kókjıegindegi jastardyń úlesine erekshe kóńil bólip,bilim-ǵylym júıesindegi oń ózgeristerdiń ornaýyna yqpal etti. Elin súıetin,halqyn ardaqtaıtyn,tarıhy men dinin,saltyn qadirleıtin qazaq qyzy retinde men osy aıtylǵan mazmundy úderisterdiń birde –birinen qalys qalǵym kelmeıdi. Men de uly Qazaqstannyń perzentimin,uly Táýelsizdiktiń zamandasymyn,endeshe,óz zamanymnyń ózekti ózgeristerine nemquraıdy qaraýǵa haqym joq dep esepteımin. Qazaqstandaı elimiz bolǵanyna júrekpen qýaný az shyǵar,onyń alasapyran jyldardan qalǵan jan jarasyn emdeıtin jańarýdyń jarshysy, izgiliktiń izbasary bola bilsem,jany jaqsylyqty qalap turatyn aqpeıil qazaqtyń,aqjarqyn ulttyń urpaǵy ekenimdi dálelder edim. Dál qazirgi ýaqytta kóz ilespes jyldam damýǵa ilesý de ońaı emes,degenmen, eldi bastap,kóshti túzeıtin tulǵalarymyzǵa senip,berik táýekelmen maqsatty baǵyt alyp kele jatqanymyz da kóńilge qýanysh uıalatady.

Rýhy bıik halyqtyń baılyǵy da,qundylyǵy da onyń ózindeı dana jáne máńgilik. Máńgilik bolatyny ǵasyrmen qurdas,tartymdy bolatyny tabıǵatqa jaqyndyǵynan shyǵar... Qalaı bolǵan da da halqymyz áli de  myń jasap,artqyǵa iz qaldyratyn kemeńger,danyshpandyǵynan  tanbaǵan «naǵyz qazaqtyǵyn» saqtap qalýy tıis. Aqyn Qadyr Myrzalıev óleńde maqtaǵan «Osy,mine,tanyp qoı!» deıtindeı qazaqtyń kelbeti men bolmysyn jan-tánimizben,oı-sanamyzben,áreket-nıetimizben bolashaqqa alyp barý,sóıtip ol amanatty keler urpaqqa tabystaý-bizge,barshamyzǵa mindet. Sebebi,bizge de aldyńǵy jaqsylar solaı jasaǵan,jaqsylyqty biz ǵana emes,bizdiń urpaqtarymyz da kórýi tıis.

Táýelsiz Qazaqstan-aýqymdy uǵym. Kólemdi aqparat.Sheksizdik sımvoly. Men sondaı baıtaq álemde  ózimniń kishkentaı núkte ekenimdi bilsem de,sol ulan ǵaıyr álemniń bir qajetine úles qosa alatynyma senimdimin. Meniń armanym-tynysh dúnıeniń tynymsyz qyzyǵyna toımaıtyn jaqsy talapty jastardyń sanasy ashyq bolsa eken jáne óz eline tilimen emes,jan júregimen jany ashıtyn adam bolyp qalyptassa deımin. Zaman zyrǵyǵanmen,ýaqyt kóshine erýge qashanda bizdiń alǵyr halqymyzdyń shamasy da,kúsh-qaıraty da jetken. Endigi bizdiń mindetimiz- ózimiz jaqsy kóretin,ózgeler qyzyǵatyn berekeli baqytymyz-Táýelsizdikke kózdiń qarashyǵyna qaraǵandaı qarap,eńbekpen baqytymyzdy odan ári baıandy etýge kúsh salý. Táýelsiz Qazaqstannyń táýelsiz oılaıtyn bilimge qushtar jasy bolǵandyqtan,elimizdiń ótkenin syılap,qýat alyp,búginine shúkirlik etip,bolashaǵyna súbeli úles qossam degen oılarym da bar. Sabaq barysynda alǵan keremet bilim kózi meni kún saıyn, saıyn dalanyń taýsylmas armandarymen arbap,alǵa jeteleıdi. Ne degen ushan-teńiz bilim men ǵylym! Osynyń bárin bizdiń alǵyr ata-babalarymyz meńgerip,keıinge qaldyrdy. Biz solardan qansha damyǵan dáýirde ómir súrip jatqandyqtan,olardan da kóp bilimdi bolýǵa tıisti ekenimizdi oılaımyn. Oılaımyn da,qaıran qalam. Qazaq degen týmysynan keńdikke qushtarlyǵymen, bilimdi ıgergishtigimen, ónerge beıimdigimen jat jurtty tańqaldyryp kelgen. Solaı eken, biz de jańalyqqa qoly barynsha jetip turǵan baqytty urpaq ekenimizge qýanyp,tereń ǵylymnyń tunyǵyna kóz tastap,óz bolashaǵymyzdy ózimiz burynǵydan da qýatty,qaıratty etýge qadam  basatyn ýaqyt jetti.

Elimizdiń baqyty-erkindiginde. Baılyǵy-tynyshtyǵynda. Qýaty-óneri men biliminde. Bolashaǵy- parasatty jastarynda. Sol parasatqa laıyq tulǵa bolý ár jastyń armany bolsa,qazaq eli kóregen babalar kóksegen,muraty aıqyn máńgilik el bolatyny anyq. Shet memleketterde bilim alyp jatqan qanshama jastyń bolashaqqa arnaǵan maqsat-múddesi el bolashaǵymen múddeles bolatyn bolsa,onda bizdiń ózimiz armandaǵan máńgilik baqytty elge aınalatynymyzǵa senýge bolady. Jaqsy oı,jaqsy úmit, asyl armandar ǵana adamdy alǵa jetelegen. Bizdiń táýelsiz, jas,jas ta bolsa jasampaz memleketimizge táýekelshil,bastamashyl qamqor qaıratkerlerimizdiń qoldaýy kerek. Jańalyqqa qaraı bar pármenimen jan salyp qadam basqan meniń Otanym Qazaqstandaı el basqa esh jerde joq. Men óz elimmen,onyń móldir aýasy,kórkem tabıǵaty,darhan dalasy,jomart peıili,keń júrekti bolmysymen bir ómir maqtanamyn jáne onyń ózim qoldaı alatyn árbir áreketine tamshydaı úlesimdi qosa júrip,sát saıyn baqyttyń ne ekenin sezinetinime qýanamyn. Mine,men óz elimdi,Táýelsiz Qazaqstanymdy osylaı súıemin!

---