Árdaıym qulshynyp turý qyıyn, óıtkeni bul sanaly túrde kúsh salýdy talap etedi. Ótkeniń men bolashaǵyń týraly oılar kele berip, naqty osy shaqqa kóńil bólýge jáne ózgertýge bolmaıtyn nárseler úshin alańdamaýǵa kedergi qylady. Onyń ústine ár adam erte me-kesh pe, áıteýir bir kúni psıhologıalyq orǵa túsedi. Mine osy ordan shyǵa alýdaǵy ıkemdilik orta adamdy uly adamnan ereksheleıdi. Eger siz ózińizdi jigerlendire alsańyz, aǵynnyń yńǵaıyna kónip júre beretin adamnan kóbirek jáne jaqsyraq nátıjege jetesiz.

Motıvasıany ıelený ony ustap turýdan áldeqaıda ońaı. Ózińdi belgili bir qam-qareketke kirisetindeı kúıge keltirý úshin, keıde, birneshe mınýttyń ózi jetip jatyr. Al sol motıvasıany uzaq ýaqyt boıy ustap turý qyıynnyń qıameti.

Motıvasıadan aıyrylyp qalýymyzdyń úsh sebebi bar:

1. Boıdaǵy senimdiliktiń jetispeýshiligi. Maqsatqa jetýge bolady degen senim bolmasa, tyrysýdyń qandaı máni bar? 

2. Fokýstyń jetkiliksizdigi. Ne nársege qol jetkizý kerek ekeni túsiniksiz bolsa, qajet nárseni istep jatqanyńdy qalaı bilýge bolady?  

3. Baǵyt-baǵdardyń jetispeýshiligi. Naqty ne isteý kerektigin bilmeseń, ózińdi belgili bir qam-qareketke qalaı motıvasıalaısyń? 

Endi jaǵdaıdy qalaı ózgertýge bolatynyn kóreıik.  

①

Ózińe degen senimdilikti qalaı arttyrýǵa bolady? 

Senimsizdik — motıvasıanyń eń basty dushpany bolýy múmkin. Bundaı jaǵdaı basyńyzǵa kelgen kezde ómirińizde qazirdiń ózinde ne bar ekenin túısine otyryp, neni shynymen-aq qalaıtynyńyzǵa kóńil bólińiz. Dál qazirgi sátte baspanańyz, ishetin sýyńyz, jeıtin tamaǵyńyz, jaqyn adamdaryńyz bar ekenin bilýdiń ózi — problemanyń jartysynyń sheshilýi. Endi, ótip ketken qatelikter men sátsizdikterge baılanyp qalmaı, qolda bardaǵydan kóbirekke qol jetkizý jaıynda oılaný kerek. Teginde, túnekte qalǵan ótken shaq týraly oılar ózińe degen senimdiliktiń astań-kesteńin shyǵarady.

Basqa kisiler men kompanıalardy kóre almaǵansha, olardyń jetistikterinen úlgi alyp, shabyttanyńyzdar. Kóre almaýshylyq paıda bola salysymen birge bireýdiń jemtigi bolý sındromy da damı bastaıdy. Basqalardyń jetistigin qabyldaýdyń ornyna, ózgelerden bir jerińiz kem dep oılaı bastaısyz. Uly adamdardyń tabysynan shabyttaný — motıvasıany somdap jáne durys oılanyp, ózińdi jetildirip otyrsań, bárine qol jetkizýge bolatynyn túsinetin tamasha tásil.

Birneshe tizim: ózińizdiń myqty jaqtaryńyzdyń, burynǵy tabysty isterińizdiń, qazirgi sáttegi naqty zattaryńyz ben bolǵan jaǵdaılardyń tizimderin jasap shyǵyńyz. Qolyńyzdan keletini anyq nárselerdi isteńiz. Bul sizdi pozıtıvti, proaktıvti oılaý kúıine túsirip, negatıv týraly oılatqyzbaıdy.  

②

Aýyz toltyryp aıtarlyqtaı fokýsty qalaı jasaý kerek? 

Ózińizdiń janyńyz qalaıtyn nárse týraly oılaýdyń ornyna kóńilińiz qalamaıtyn nársege kóńil bólýińiz jıi bolyp tura ma?  

Qalypty jaǵdaıda biz qorqynysh turǵysynan oılap turamyz. Kedeılikten, jalǵyzdyqtan, qadirimizdiń qashýynan qorqamyz. Bulaı oılanýdyń kemshiligi sol, ondaı kezde qareket etýge zaýqymyz soqpaı, tek qorǵanǵymyz kelip turady. Sáıkesinshe motıvasıa týrasynda aıtýdyń ózi artyq.

Eger siz qorqynysh prızmasy arqyly oılaıtyn bolsańyz, negizgi kúshti maqsatyńyzǵa salý alǵashqy qadamyńyz bolýy kerek. Naqty maqsatty aıqyndap alǵan soń qam-qareketti bastaý ońaı bolady.  

Kedeı bolyp qalý úreıi adamnyń eshqandaı áreket qylmaı qoıýyna aparyp soǵyp, qalyptasqan jaǵdaıǵa kóndigýińizge májbúrleıdi. Baı adam bolýdyń josparyn jasaý sizdi ondaı adam qylmaýy da múmkin, biraq úreı-qorqynyshqa emes, múmkindikterge nazar salýyńyzǵa májbúrleıdi. Bul ózdigińizden oqyp-bilý, qajetti daǵdylarǵa mashyqtaný jáne ózińizdi jetildirý týraly oılanýǵa múmkindik beredi. Kepildikti eshkim bermeıdi, biraq múmkindikterińiz eselep artady. Onyń ústine siz durys nárselermen aınalysa bastap, ýaqytyńyz ben kúsh-qaıratyńyzdy kereksiz ister men oılarǵa jumsamaıtyn bolasyz.  

③

Baǵyt-baǵdardy qalaı belgilep alýǵa bolady? 

Siz ózińiz júrip otyratyn baǵytty tańdap alasyz. Eger fokýs degenimiz túpki maqsatty bildirse, baǵyt — sol maqsatqa jetý úshin ár kúnge arnalǵan strategıany bildiredi.  

Belgilengen baǵyttyń joqtyǵy motıvasıany túp-tamyrymen qurtady, óıtkeni kelesi qadamnyń qandaı bolatynyn túsinbeýshilik prokrastınasıaǵa aparyp soǵady. Óziniń blogyn jazýmen aınalysýdy uıǵarǵan jáne ýaqytynyń kóbin basqa kisilerdiń blogtaryn oqýǵa jumsaıtyn adam úırenshikti mysal bola alady. Bul mańyzdy úderis, alaıda tek qana oqı berý esh paıda bermeı, tek jalqaýlyqtyń syltaýy da bolyp eseptelýi múmkin. 

Sondyqtan, eń áýeli, tabysqa keneltetin (nemese keneltpeı qoıatyn, eshkim bilip bolmaıdy) qam-qareket túrin aıqyndap alý qajet. Bul tusta bastysy — qandaı qadamdaryńyzdyń durys, qandaı kadamdaryńyz burys bolatynyn baıqap-baǵamdap otyrý.  

Blogger bolǵysy keletin adamǵa ol qadamdar mynalar bolýy múmkin:

1. Kontent jazý.

2. Ózekti bolyp turǵan taqyryptardy zerdeleý.

3. Ózge bloggerlermen tanysyp alý.

4. Saıtty ońtaıdandyrý jáne dızaınyn jasaý.

5. Jazylǵan kommentarılerge jaýap berip otyrý.

6. Basqa blogtardy oqyp otyrý.

Eger siz motıvasıańyz azaıyp bara jatqanyn sezseńiz, jalpy jaǵdaıǵa qaraı qam-qareket josparyn jasap, kelesi qadamyńyz qandaı bolmaǵyn bilip alýyńyz qajet. Ony naqty qalaı júzege asyrýdy bilýdiń de mańyzy zor.

Motıvasıasy «uryp» turǵan adamdar ne istep jáne ne úshin istep júrgenderin oıynan shyǵarmaı, ár isiniń úderisinen lázzat alady. Josparyńyz qansha qadamnan turmasyn, ár qadamyńyzdyń máni jaıly oılaı júrińiz. 

Keı kezderi motıvasıa joq bolyp ketip turatynyn esten shyǵarmańyz, bul qashyp qutylmas úderis. Biraq, tártip pen jigerińiz ony qaıtarýǵa kómektesedi.

Sáttilik joldas bolsyn!

Oqýǵa keńes beremiz: Jalqaýlyqty jeńýdiń eń jaqsy ádisi

---