InfoHub Logo

QR Bilim jáne ǵylym mınıstrligi jańa attestasıalaý júıesin engizýge baılanysty, muǵalimder jalaqysyna ústeme qosý tártibin túsindirip berdi.

Mınıstrliktiń habarlaýynsha, qazirgi ýaqytta biliktilikti rastaýdyń jańa júıesi ázirlenip jatyr. Jańa júıe eki kezeńnen quralady. Aldymen pedagogtar ulttyq biliktilik testin tapsyrady. Odan keıin pedagog qyzmetiniń qorytyndylaryn keshendi jalpylaý jumysy júrgiziledi. Osylaısha, óz biliktiligin dáleldegen qazaqstandyq muǵalimniń eńbekaqysy 20-50% aralyǵynda kóbeıedi.

Ótken jyly jáne aldyńǵy jyldary óz biliktilikterin rastaǵan mamandar úshin ústemeaqynyń eski júıesi saqtalatyn bolady.

«Qazirgi zańnamaǵa sáıkes, bul biliktilikter 5 jylǵa deıin jaramdy jáne zańdy eshkim ózgertpeıdi. Sondyqtan, barlyq eski sanattar men olarǵa taǵaıyndalǵan ústemeaqylar saqtalady», - dep túsindirdi QR Bilim jáne ǵylym vıse-mınıstri Ashat Aımaǵambetov.

Sondaı-aq, muǵalimder óz qalaýymen jańa júıege sáıkes biliktilikterin kóterip, jańa keste boıynsha ústeme aqy alýyna múmkindik bar.

Eske sala ketsek, QR Prezıdentiniń tapsyrmalaryna sáıkes, 2018 jyly ulttyq biliktilik testin engizý josparlanǵan.

QazAqparat

---