Muǵalimderdiń jalaqysy qanshaǵa artady - Bilim mınıstrliginiń jaýaby
QR Bilim jáne ǵylym vıse-mınıstri Bıbigúl Asylova orta bilim berý júıesiniń jańartylǵan baǵdarlamaǵa kóshirilýine oraı muǵalimderdiń jalaqysy qalaı ózgeretinin málim etti.
Vıse-mınıstrdiń aıtýynsha, muǵalimderdiń jalaqysyn kóterý bilim berýdiń jańa mazmunyna kóshýmen tikeleı baılanysty.
2018 jyldyń 1 qańtarynan bastap bilim berýdiń jańartylǵan mazmunyna kóshken 1-shi, 2-shi, 5-shi jáne 7-shi synyp ustazdarynyń laýazymdyq jalaqysy kóbeıedi. Al qyrkúıek aıynan bastap, 3-shi, 6-shy jáne 8-shi synyp muǵalimderiniń jalaqysy kóteriledi. Osylaısha, 2019 jyldyń qyrkúıeginde 4-shi, 9-shy jáne 10-shy synyp ustazdarynyń jalaqysy artsa, 2020 jyly 11-synyp muǵalimderiniń eńbekaqysy joǵarylaıdy.
"Ústemeaqy kólemi Memleket basshysy óz Joldaýynda aıtqandaı, 30 prosentti quraıdy. Mysal keltirer bolsaq, 15 jyldyq eńbek ótili bar 1-sanattaǵy qala muǵaliminiń jalaqysyna 24 myń teńge qosylady. Dál osyndaı eńbek ótili bar 1-sanattaǵy aýyl muǵaliminiń jalaqysyna 25 860 teńge qosylady", - dep atap ótti Bıbigúl Asylova Úkimet úıinde ótken baspasóz máslıhatynda.
Atap ótilgendeı, úsh jyldyq ótili bar, esh sanaty joq muǵalimderdiń laýazymdyq jalaqysy 56 myń teńgeni quraıdy. Oǵan dápter teksergeni jáne kabınetke jetekshilik etkeni úshin 22 myń teńge ústemeaqy qosylady. Iaǵnı, qazirgi ýaqytta olardyń jalaqysy 78 myń teńgeni quraıdy. Bilim berýdiń jańartylǵan mazmuny úshin ústemeaqy qala deńgeıinde - 16 myń, aýyl deńgeıinde 21 myń teńgeni quramaq. Iaǵnı, úsh jyldyq ótili bar, sanaty joq muǵalimderdiń jalaqysy qala deńgeıinde - 96 myń teńge, aýyl deńgeıinde 115 myń teńge bolmaq.
Eger 25 jyl eńbek etken joǵary sanatty muǵalimderdiń qazirgi jalaqysy 83 myń teńgeni quraıtyn bolsa, oǵan 25 myń teńge kóleminde ústemeaqy jáne jańartylǵan bilim berý baǵdarlamasy úshin taǵy 24 myń teńge qosylady. Osylaısha, eńbekaqynyń jalpy somasy 133 myń teńge bolmaq.
Sonymen birge, BǴM ókilderiniń aıtýynsha, bıyl muǵalimderdiń biliktilik deńgeıin anyqtaý arqyly qosymsha aqy taǵaıyndaıtyn jańa júıe engiziledi.
"Jańa júıege sáıkes, ulttyq biliktilik testin tapsyryp, óz deńgeılerin rastaý arqyly muǵalimder jalaqylaryn 20-50 prosentke deıin kótere alady. Máselen, bir saty joǵarylaǵan 15 jyldyq eńbek ótili bar 1-sanattaǵy qala muǵaliminiń eńbekaqysyna 28 myń teńge qosylsa, aýyl muǵaliminiń jalaqysyna 36 myń teńge qosylady", - dedi vıse-mınıstr.
Aıta keteıik, bıylǵy Joldaýda QR Prezıdenti Nursultan Nazarbaev muǵalimderdiń jalaqysyn kóterýdi tapsyrǵan edi.
"Jańartylǵan mazmun degenimiz - halyqaralyq standarttarǵa saı keletin jáne Nazarbaev zıatkerlik mektepterinde beıimdelýden ótken zamanaýı oqý baǵdarlamalary. Bular bizdiń balalarymyzǵa qajetti fýnksıonaldyq saýattylyq pen synı turǵydan oılaý qabiletin darytady.
Sonymen qatar 2018 jyly kategorıalar arasyndaǵy alshaqtyqty arttyryp, muǵalimder úshin biliktilik deńgeıin eskeretin sanattardyń jańa kestesin engizýdi tapsyramyn. Kategorıalardy búkil álemde qoldanylyp júrgen ulttyq biliktilik test arqyly berý kerek. Bul pedagogtardy ózderin udaıy jetildirýge yntalandyratyn bolady. Nátıjesinde, muǵalimderdiń jalaqysy biliktiliginiń rastalýyna baılanysty tutastaı alǵanda 30 prosentten 50 prosentke deıin ósedi. Bul úshin bıyl qosymsha 67 mıllıard teńge bólý qajet", - delingen Joldaýda.
QazAqparat
You Might Also Like
-
BǴM Mektepke deıingi jáne orta bilim berý deparatmentiniń dırektory Sholpan Qarınova qazaqstandyq oqýshylardyń oqý maqsatymen uıaly telefondy qoldanýy jóninde óz pikirin bildirdi.
