InfoHub Logo

Ál-Farabı atyndaǵy Qazaq ulttyq ýnıversıteti – mol tarıhy bar, ǵylym men bilim ordasy bolyp tabylatyn elimizdiń maqtan tutarlyq joǵary oqý orny.  Ýnıversıtet Qazaqstan men Orta Azıa memleketteriniń arasyndaǵy 200 úzdik ýnıversıtet qataryna eńgen bilim ordasy. QazUÝ qazirgi ýaqytta QS jahandyq reıtıńinde 150-orynǵa kóterilip, ulttyq reıtıńterde kósh bastap keledi. Jyldan jylǵa QazUÝ bilim brendine aınalýda, sebebi ýnıversıtettiń túlekteriniń sany artyp, al mamandaryna degen suranys artyp keledi. Árıne  mundaı keremet jetistikterge QazUÝ bilim men ǵylymǵa qushtarlyǵy mol stýdentter men oqytýshylardyń arqasynda jetip otyr. Ýnıversıtet qabyrǵasynda sapaly ári yńǵaıly bilim berý maqsatynda kóptegen jaǵdaılar jasalyp otyr. Sonyń bir dáleli retinde «Keremet» stýdentterge qyzmet kórsetý ortalyǵyn aıta alamyn.

Keremet «bir tereze» qaǵıdatysyna negizdelgen: oqý-bilim berý, medısınalyq, zańgerlik, qarjylyq jáne mádenı oıyn-saýyq qyzmetterin usynatyn stýdentterge arnalǵan ortalyq. Munda stýdentter men profesorlyq-oqytýshylyq quramǵa kóptegen qyzmetter  kórsetiledi. Sonymen qatar QazUÝ stýdentteri men profesorlyq-oqytýshylyq quramyn medısınalyq tekseristen ótkizý úshin ál - Farabı Halyqaralyq Qazaqstan-Koreı dıagnostıkalyq ortalyǵyn ashqan.

QazUÝ múmkindikterge toly orta, munda ǵylymı ortalyq pen tehnopark, zamanaýı tehnıkamen jabdyqtalǵan zerthanalar, elimizde teńdesi joq kitaphana bar. Ǵylymı kitaphanada shamamen 2 mlnǵa jýyq  kitaptar bar. Ol jyl saıyn 40-45 myń danaǵa, jańa basylymdarmen tolyqtyrylyp otyrady.

Álemdegi 500-den asa iri halyqaralyq JOO-men áriptestik baılanys ornatqan. 86 qosdıplom baǵdarlamasy arqyly stýdentter álemniń úzdik ýnıversıtetterinde QazUÝ-men qatar bilim alyp, taǵylymdamadan óte alady. Jer sharynyń 50 elinen jastar bilim alýda. Oqý ornynda bakalavrıat, magıstratýra, doktorantýra boıynsha 225 bilim berý baǵdarlamalar toby bar. Ýnıversıtette álemniń úzdik oqytýshylary men ataqty profesorlar dáris beredi. 250-den astam túrli ǵylymı, sporttyq, shyǵarmashylyq, volonterlik stýdenttik klýbtar, sondaı-aq stýdenttik qurylys uıymdary bilimdi ári belsendi jastardyń basyn qosyp, jaqsy orta qalyptastyrýda.

QazUÝ-nen basqa Ortalyq Azıa men Qazaqstannyń birde-bir ýnıversıtetinde QS Stars bes juldyzy joq! Álemde barlyǵy 62 joǵary oqý ornynda QS Stars «5 juldyzy» bar, olardyń ishinde: Garvard, Oksford, Kembrıdj, Chıkago, Prınston, Kolýmbıa ýnıversıtetteri.

Elimizdegi eń iri ári bedeldi joǵary oqý oryndarynyń birinde oqyp júrgenimdi maqtan etemin be? Árıne, ıá! Qazirigi tańda men «mehanıka- matematıka» fakúltetiniń qosdıplomdyq «mehanıka jáne energetıka» mamandyǵynyń magıstrantymyn. Bul qosdıplomdyq baǵdarlamanyń stýdentterge berer múmkindigi kóp. Magıstratýra jalpy men úshin  jeke jáne kásibı damýdyń faktory bolyp tabylady. Bul sheshimdi qabyldaýda úlken ról atqarǵan ǵylymǵa degen súıispenshiligi mol, meniń ǵylymı jetekshim jáne elimizdegi múmkindikke toly ýnıversıtet.

Ýnıversıtettiń taǵy da maǵan unaıtyn bir tamasha ereksheligi ekologıalyq taza aımaqta ornalasqany. Almaty sıaqty megapolıste ornalasqan QazUÝ qalashyǵy qalanyń eń «jasyl» buryshtarynyń biri retinde keńinen tanymal. Aýasy qala ishi aýasynan kólik joldarynan alys, taýlarǵa jaqyn ornalasýyna baılanysty álde qaıda tazaryraq.Taý bókterine ashylatyn kórinisti sózben aıtyp jetkizý qıynǵa soǵar, al Keremetke barar jol bolsa raýshan gúlderimen, fontandarymen erekshelenedi. Sonymen qatar «Almatynyń ókpesi» dep atalynatyn botanıkalyq baqqa jaıaý barýyp kelýge de bolady.

Ýnıversıtet ár salanyń qas mamanyn daıyndaýǵa joǵaryda aıtyp ketkendeı barlyq múmkindikteri bar, yńǵaıly bilim alý úshin de jaǵdaılar jasalǵan. Osyndaı múmkindikter syılap otyrǵan ýnıversıtetke alǵysym sheksiz.

Kereıkýlova Aıym

QazUÝ Mehanıka- matematıka fakúltetiniń 1 kýrs magıstranty

Fılologıa fakúltetiniń aǵa oqytýshysy Ýrazgalıeva S.A jetekshiligimen

---