InfoHub Logo

Mektep qabyrǵasynan túlep ushqannan keıingi alǵashqy eresek ómirge qadam "joǵarǵy oqý oryny" atty baspaldaqty attaǵannnan keıin jasalady deýge ábden bolady. Sebebi, ómir atty úlken joldyń burynǵydan da kúrdelirek bir tarmaǵyna aıaq basasyń jáne de sol jolda qaı baǵytta júretinińdi óziń tańdaısyń ári sol tańdaýyńa óziń jaýapty bolasyń. Mańyzdysy, osy jolda qandaı jandar saǵan serik bolady, aldaǵy alys ta, keri qaıtara almaıtyn joldy ózińe de, ózgege dep paıdaly ári este qalarlyq sátterge toly etip ótkizýiń sol jandarǵa tikeleı baılanysty. Osy sátte men Qazaq Ulttyq ýnıversıtetinde mehanıka-matematıka fakúltetinde óz ortamdy taýyp, jolym boldy dep aıta alamyn. Otanymyzdaǵy bilim ordalarynyń qara shańyraǵy ál-Farabı atyndaǵy Qazaq Ulttyq ýnıversıteti naǵyz múmkindikter mekeni. Osylaı senimmen aıta alýyma tolyqtaı negiz bar, sebebi alǵash stýdenttik ómirge qadam jasaǵannan sátten-aq men kóptegen aqyldy, tárbıeli jandardy jolyqtyrdym, árqaısysynyń tálim-tárbıesi men berer bilimi bir tóbe bolatyn ulaǵatty ustazdardan sabaq alý múmkindigine ıe boldym. Qoǵamdaǵy ózekti máselelermen aınalysatyn meıirimdi jandardan quralǵan "Kómek" atty stýdenttik uıymnyń múshesi boldym. Sonyń arqasynda joǵarǵy oqý oryny tek bilikti maman ıesin ǵana emes, sonymen qatar elimizdegi bolyp jatqan jaǵdaılarǵa beı-jaı qaramaıtyn tulǵalardy tárbıelep shyǵa alatyndyǵyna kózim jetti.

Mehanıka mamandyǵy boıynsha qorshaǵan ortadaǵy mańyzdy ekologıalyq máseleni qozǵaıtyn munaımen lastaný taqyrybynda ǵylymı jetekshimmen birge dıplomdyq jumys jazyp, "jaratylystaný ǵylymdarynyń bakalavry" dárejesine ıe boldym. Ári qaraı   osy jumysymdy jan-jaqty ári tolyqtaı zerttep shyǵý maqsatymen, mehanıka-matematıka fakúltetinde magıstratýraǵa túsemin degen sheshimge keldim. Tańdaýym "Mehanıka-energetıka"  mamandyǵyna tústi. Sebebi, atalǵan mamandyq stýdentterge birqatar múmkindikter beredi. Atap ótetin bolsam, fakúltet Fransıadaǵy Nansı qalasyndaǵy Lotarıngıa ýnıversıtetimen baılanys ornatqan, sonyń arqasynda stýdentter magıstratýra kezinde Lotarıngıa ýnıversıtetinde bilim ala alady. Onymen qosa, baǵdarlama aıasynda "Abaı-Vern" shákirtaqysy qarastyrylǵan. Ýnıversıtet qabyrǵasynda alǵan bilimin paıdalana otyryp jáne de sheteldik muǵalimderdiń kómegimen bilimin tolyqtyra otyryp, otanymyzǵa qos-dıplomdy maman ıesi bolyp oralýǵa jaǵdaılar jasalǵan. Birneshe jyldar boıy qalyptasyp qalǵan júıeniń arqasynda, kóptegen mehanık-ınjenerler ár jyl saıyn Lotarıngıa ýnıversıtetine barýda. Meniń de maqsatym, fakúltetimizdiń osy bilim berý baǵdarlamasyn paıdalana otyryp, qos-dıplomdy mehanık-ınjener mamandyǵynyń ıesi bolý.

Bolashaqta ýnıversıtet qabyrǵasynda alǵan bilimim men tájirıbemdi paıdalana otyryp, elimizdiń damýyna úles qosatyn maman ıesi bolamyn dep oılaımyn jáne de osyndaı múmkindikke jol ashqan Qazaq Ulttyq ýnıversıtetine jáne mehanıka-matematıka fakúltetiniń ulaǵatty ustazdaryna alǵysym sheksiz.

Aıthoja Jansaıa

QazUÝ Mehanıka-matematıka fakúltetiniń 1 kýrs magıstranty

Fılologıa fakúltetiniń aǵa oqytýshysy Ýrazgalıeva S.A jetekshiligimen

---