InfoHub Logo

Túrkıa prezıdenti Redjep Taıyp Erdoǵannyń aıtýynsha, búginde musylman memleketteri bilim men ǵylymǵa kóp kóńil bólmeıdi. Sonyń saldarynan ozyq oıly ǵalymdar Batysqa ketip jatyr. Al aqparattyq tehnologıalar salasyndaǵy saýatsyzdyq barsha musylman álemine qaýip tóndirip otyr, dep QazAqparat habarlaıdy.

«Kezinde Islam álemi bilim, ǵylym men ınovasıalardyń ortalyǵy boldy. Artynan sonyń barlyǵy ekinshi orynǵa túsip ketti. Sol kezde toqyraý zamany bastaldy. Qazirgi kezde álemdegi musylman halqynyń 55 paıyzy saýatsyz. Ekonomıkalyq damý jáne yntymaqtastyq uıymyna múshe memleketterde bilim berý salasyna jalpy ishki ónimniń 5,2 paıyzyn jumsalady. Al musylman elderinde atalǵan kórsetkish 1 paıyzǵa da jetpeıdi. Bizdiń mańdaı aldy ǵalymdarymyz bolsa, Batysqa ketip, sol jaqta qyzmet etip júr», - dep atap kórsetti Erdoǵan búgin Islam yntymaqtastyǵy uıymnyń ǵylym jáne tehnologıalar jónindegi samıtinde.

Onyń aıtýynsha, qazirgi kezde musylman elderi aqparattyq tehnologıalardy shyǵarmaıdy. Alaıda árbir memleket ulttyq qaýipsizdigine basa nazar aýdarýy qajet.

Astanadaǵy samıtke Ózbekstan, Pákistan, Ázerbaıjan, Aýǵanstan, Iran, Túrkıa, Venesýela, Kamor araldary, Mavrıtanıa,  jáne basqa da musylaman memleketteriniń prezıdentteri men úkimet basshylary keldi.

Aıta keteıik, Islam yntymaqtastyǵy uıymy - 1969 jyly 25 qyrkúıekte musylman memleketteri basshylarynyń   Rabatta ótken konferensıasynda negizi qalanǵan eń iri jáne yqpaldy úkimettik ári halyqaralyq musylman uıymy. Qazirgi ýaqytta ol jalpy sany shamamen 1,5 mıllıard adamdy qamtıtyn 57 eldiń basyn biriktirip otyr.

IYU-nyń negizgi qaǵıdattary mynalar: tolyq teńdik; ár halyqtyń óz taǵdyryn ózi sheshý quqyǵyna degen qurmet; ishki isterine aralaspaý; memleketterdiń egemendigin, táýelsizdigin jáne aýmaqtyq tutastyǵyn qurmetteý; IYU-ǵa múshe memleketter arasyndaǵy daýly máselelerdi kelissóz, araaǵaıyndyq nemese arbıtraj arqyly beıbit jolmen sheshý; uıymǵa múshe memleketter aýmaqtarynyń tutastyǵyna, sonymen birge saıası táýelsizdigine de qarsy kúsh qoldanbaý nemese qoqan-loqqy kórsetpeý.

Qazaqstan 1995 jyly Islam yntymaqtastyǵy uıymynyń tolyq quqyly múshesine aınaldy. 

---