InfoHub Logo

- Ol kezde ýnıversıtettiń birinshi kýrsynda oqyp júrgen kezim, - deıdi ol. - Qaladaǵy mektepti bitire salyp, osy oqýǵa túskenmin.

Topta starostanyń kómekshisi edim. Starosta - bir topta oqıtyn qyz. Kýratorymyz bar. Kýratorymyz - apaı. Áli tájirıbesi kóp emes jas maman. Solardyń tapsyrmasymen arly-berli júgiremin de júremin.

Bir kúni solaı júgirip kele jatyr edim, aldymnan kýratorym shyǵa keldi. "Topty jına, - dedi kýratorym. - Qalamyzǵa músin jasaıtyn sheberlerdiń kórmesi kelipti. Soǵan baramyz".

Birinshi kýrstyqtarǵa bári qyzyq. Jınalyp aldyq ta, álgi músinder qoıylǵan ǵımaratqa tartyp berdik.

Ǵımarattyń esiginiń aýzyna kelgende-aq, kúlkige keneldik te qaldyq. Dál esiktiń aýzynda bılet tekserýshi adam tur eken dep oılaǵanbyz. Sóıtsek, músin qoıyp qoıypty.

Tańdanysymyz ishke barǵan soń ulǵaıa tústi. Músinder tiri adam sekildi.

Bul jerge tamashalaýǵa kelgen jalǵyz biz emes eken. Basqa mamandyqtardyń da stýdentteri júr.

Kishkentaıymnan bir ádetim bir nárseni kózben kórip, qolmen ustap kórmesem, tynshymaıtyn edim. Myna músinderdi de bul ne zattan jasalǵan nárse dep ustap kórgim kelip júr. Biraq músinderdiń ber jaǵyna jip kerip qoıypty. Qolmen ustaýǵa bolmaıdy deıdi.

Jolym bolǵysh qoı biraq. Negizi, jolym bolǵysh jigitpin! Bir músin jiptiń ber jaǵyna shyǵyp qalypty. Ózderi de baıqamaı qalǵan-aý deımin. Álde ádeıi qoıyp qoıdy ma?

Músin er adamnyń beınesinde jasalǵan eken. Aıaǵyn aıaǵynyń ústine salyp, shyntaǵyn oryndyqtyń arqalyǵyna qoıǵan kúıi otyrǵan er adam. Quddy tiri adam dersiń!

Elden buryn ustap qalaıyn dedim de, músinniń janyna jetip keldim.

Bul ne zattan jasalǵan nárse dep kostúminiń jeńinen ustaı bergenim sol edi, aınalam jańǵyryqqan kúlkige tolsyn da ketsin. Oǵan qosa músinim de qozǵalyp ketti.

Sóıtsem, bul otyrǵan bizdegi bir fakúltettiń zamdekan aǵaıy eken ǵoı. Ol da stýdentterin alyp kelgen. Sharshaǵan soń otyra turaıyn dep sheshken. Men ony músin eken dep... Ózi de músin qusap qozǵalmaǵan kúıi otyra qalǵan eken... Aıaǵynda tiri adamy qaısysy, músini qaısysy, ajyratýdan qaldyq qoı...
 

---