InfoHub Logo

Aspan aınalyp jerge túskendeı ystyq. Eńseli úıdiń aldynan balalardyń aıqaı-shýy estiledi. Óńsheń bir jalańashtar. Teatr úıiniń qıyr betindegi sýy kókke atylǵan fontandardyń mańynda qaraqurym sýǵa shomylyp, endi bir toby úı baspaldaqtaryna keýdesin tosyp qyzdyrynyp jatyr. Balalardyń biri qaratory, biri sary, biri qyzyl sary. Orysy da, qazaǵy da, qyrǵyzy da, tatary da bar sıaqty. Biraq olardy tústep, túgendep jatqan eshkim kórinbeıdi. Qaıta sábı kúlkisi syńǵyrlap, daýystary anyq-anyq shyqqan ǵajap bir kórinis.

Gúl atyzynyń boıynan, oryndyqtardan eki-úsh eresek adamdy kórýge bolady. Biri gazet oqysa, endi biri áńgimeniń qyzyǵyna túsip ketken. Tek qana saqaly keýdesine túsken qart kisi álginde ǵana kep shetki oryndyqtan oryn tepken. Bul aýyldan kelgen Esirkegen qarıa edi. Eptegen densaýlyǵynyń jóni bolmaı, sonaý taýdaǵy «Túrksib» sanatorııynda demalyp, búgin-erteń aýylǵa qaıtpaqshy. Sýretten bolmasa, uly sýretker, ataqty jazýshynyń músinin kóre almaǵan. Birde demalyp jatqandar birigip teatrǵa kep, «Aıman-SHolpan» spektalin kórgen. Jolbasshy qoıarda-qoımaı júrip, «adasyp ketesińder» dep avtobýsqa otyrǵyzǵan. Sol joly da eskertkishti kórýge yńǵaıy kelmedi.                      Endi, mine, kóz aldynda záýlim eskertkish tur. Zamanymyzdyń ǵulamasy sonaý Alataý shyńdaryna qarap oılanyp qalǵan. Quddy tiri sýret dersiń. Ǵajap. Qart múıiz shaqshasyn qaǵyp eringe bir shymshyp nasybaı saldy. Sál demalǵan soń eskertkishke jetti de, órmeleı basyp, músinniń aldyna baryp jaıǵasa bastady.

— Áı, myna tentekter qaıtedi-eı, — dedi kúńk etip ornynan turǵan Esirkegen.

— Kúzetshisi qaıda bul eskertkishtiń? — Eki orta jıyrma qadamdaı jer. Taıaǵyna súıengen kúıi jaqyndap keldi.

— Áı, balalar-aý, bularyń ne? Typ-tynysh músinniń senderge qaı zalaly tıdi? — Daýsy qarlyǵyp shyqty. Balalar estimedi me, kim bilsin, óz-ózimen áńgimelesip, qartqa kóńil de qoımady.

— Mynalar qaıtedi, eı?! — dep kúńkildegen Esirkegen eki attap eskertkishtiń túbine jetti.

Alystan bilinbeıdi eken. Eskertkish óte bıik, qart basyn kótere qarady.

— Áı, tentekter, bularyń ne? Shirenip otyrystaryn, túge. Sender bul adamnyń kim ekenin biler me ekensińder? — dedi qart mysqyldaı daýystap. Sóıtkenshe uly adamnyń tizesine qonǵan silińgir qara bala ornynan atyp turdy.

— Assalaýmaǵaleıkým, ata! — dedi sálem berip.

— Zdravstvýıte! — dedi ekinshi bir úrpek bas sary bala.

— Álıkisalam, zdrastı. Al, aıta qoıyńdar, — dedi qart balalardyń sálemine rıza bop, kúlimsireı qýlana qarap.

— Bul — bizdiń atamyz, — dedi silińgir qara sańq etip.

— Da, eto — nash ded, — dedi úrpekbas sary.

— Biz atamyzdyń atyndaǵy kósheden keldik, — dedi úshinshi bir bala.

— Áı, osy sender bul adamnyń kim ekenin bilmeısińder-aý, osy... — dedi Esirkegen qart.

— Nege bilmeımiz? Bul kisi — Muhtar ata. Qazaqtyń uly jazýshysy, — dedi silińgir qara.

— Da, on velıkıı kazah, — dedi úrpek sary da qalmaı.

— Iá, ata, biz Muhtar atanyń balalarymyz. Qazir, mine, aldynda otyrmyz. Eshkimdi bul kisige tıistirmeımiz. Qoryqpańyz, ata, — dedi úshinshi biri.

— Durys, balalar. Jastaryń uzaq bolsyn. Iá, sender shynynda da Muhtar atalaryńnyń balasysyńdar, — dep Esirkegen qart kúbirleı berdi.

---