InfoHub Logo

Qyryq kún úlken júrek toqtaǵaly,
Biz ony kóp aıtarmyz joqtap áli,-dep bir kezderi Ábdilda aqyn jyrlaǵandaı Allanyń bergen sanaly ǵumyryn asqan parasattylyqpen paıymdap, tynymsyz tirlikpen terlep, eleýli eńbekpen kógerip, jan-jaǵyn qaýmalaǵan qaýymǵa syılastyqpen sán túzep, ózinen keıin óshpesteı iz qaldyrýǵa bekinip, jaı otyndaı jarq etip, mynaý fánıden mezgilsiz mızam bop ushyp ketetin, sanada qaqqan qazyqtaı qattalyp qalatyn erekshe jandardy tańdy tańǵa uryp jyrlap bite almaısyń... Sondaı jannyń biri ári biregeıi Sarysý aýdanynyń  sary dalasynda Jańa-aryq degen ónegeli ólkesinde 1965 jyly shyr etip dúnıe esigin ashqan, es bilgen shaǵynan ortasynda ozyq oıymen ońashalanǵan, zerektigimen zerdelengen, qabaq shytyp kórmegen, ómirde ózindik qalpynan ózgermeı, adaldyq pen ańqyldaǵan aq júrek peıilinen aınymaǵan qaısar qyz Zıash Tuzaqbaıqyzy. Bala kúninen ádebı kitaptarǵa ańsary aýyp, taýyp sóıleıtin sózsheńdigimen el qulaǵyn eleń etkizgen esti qyz altyn uıa mektebinen túlep ushyp arman qýyp qazaqı ulttyq qundylyqtardyń qaımaǵy buzylmaǵan shyraıly Shymkenttiń pedagogıkalyq ınstıtýtynyń fılologıa fakúltetine oqýǵa túsip ony oıdaǵydaı támamdaıdy. Birge oqyǵan kýrstas qurby qyzdary Zıashpen ýnıversıtet qabyrǵasynda jáne jataqhanada ótken ár kúnderin tátti ertegideı erekshe eske alyp otyrady. 

Ol kezderi jańadan oqý bitirgen jas mamandardy qolyna bir japyraq qaǵazyn ustatyp ustazdyqtyń uly isine belsene atsalysýǵa baǵyt berip, shalǵaı aýyldarǵa jiberetin bolǵan. Mashaqaty mol mamandyqty bir kisideı ıgerip, ıgilikti isti ıirýge ıkemdilik tanytqan ınabatty boıjetken Komýnar mektebi ıaǵnı qazirgi Shoqaı datqa atyndaǵy orta mektepke  joldanady.

Alty Alashtyń basy qosylsa, tórdegi oryn-ustazdiki dep Maǵjan taýyp aıtqan ǵoı. Mártebeli mamandyqty mereıli mindetim dep uǵynǵan Zıash Tuzaqbaıqyzy 1987 jyldan beri attaı 32 jyl bir bilim ordasynda abyroıly, jemisti eńbek etti. Tepse temir úzetin orda buzar jastaǵy er azamattyń bir ǵumyryndaı bolǵan osy jyldarda qanshama shákirtterge baǵyt-baǵdar berip, tárbıe men tálimin tel emdirgen ulaǵatty ustazdyń aldyn kórgen, qazirgi tańda ár salada alǵyrlyǵymen tanylyp júrgen, maqtanarlyq izbasarlary barshylyq. Árqashanda izdeniste júretin shyǵarmashyl tulǵanyń aýyz toltyryp aıtarlyqtaı jetistikteri de jeterlik.

Bilim salasynda etken eńbegi men tókken teri eleýsiz qalmaı ár jyldarda aýdan, oblys, respýblıka kólemindegi marapattardyń minberinen boı kórsetip, laıyqty deńgeıde elenip júrgeni, jyl saıynǵy ustazdardyń tamyz konferensıasynda baıandama jasaýy da nátıjeli eńbeginiń óteýi dep bilemin. Turaqtylyǵy men tabandylyǵynyń arqasynda mektep dırektorynyń oqý isi jónindegi orynbasary qyzmetin de qaltqysyz atqara bildi. Oǵan qosa mektep janyndaǵy Gúlderaı shaǵyn ortalyǵynyń meńgerýshisi mindetin de  oıdaǵydaı júıeli túrde júrgize bildi.
Jomart jigit baımen teń demeı me qazekem... Zıashtyń kóńili túsken adamǵa qolyndaǵy baryn ustata salatyn, tipti qulaǵynda syrǵasy, ádemi oramaly bolsa da syıǵa tarta salatyn Atymtaı jomarttyǵy da bar. Qashanda tynymsyz tirlik pen myzǵymas birliktiń janynda júretin, adal eńbegimen eliniń qadirli de qasıetti azamaty dárejesine kóterilgen jany jaz, júregi taza Zıash Tuzaqbaıqyzyn tanıtyn adamdardyń qaı-qaısysy bolmasyn tek jaǵymdy pikir, áserli estelik aıtady.

"Ulyq bolsań kishik bol, halyq úshin báıek bol" degen ataly sóz Zıashqa arnalǵandaı. Qashanda qonaq dese quraq ushyp, qonaqjaı dastarhanyn darhan kóńilimen jaınatyp, ózi elgezektigimen el aldyna tóselip, jıǵan-tergenim tórimdegi meımanyma shashylsyn dep shýaq shashyp júretin kóldeı shalqyǵan kóńili kóptiń kókeıinde kópke deıin saqtalary sózsiz. Byltyrǵy jyly aýdannyń abyroıyn asyryp júrgen betke ustar azamattary "sózi iri,  nar tulǵaly azamattyń biri, maqtanyp aıta júrer tileýles inim" dep marqaıyp júretin Maraltaı Raıymbekulyn, Sáýle Janpeıisova syndy syılylarǵa tórinen oryn berip, bar jaqsysyn aýzyna tosyp kútýi-kishipeıildiliktiń kórinisi.
 "Syılasarlyq tektiniń kim tanymas nusqasyn" dep burynǵylar beker aıtpaǵan ǵoı. Amal ne, kózden ketse de kóńilden ketpeıtin jan jalǵan ómirde joq degenge boıusyna almaı shermende kúıdemiz. 

"Ólmesti Qudaı jaratpaıdy, synbasty, tozbasty usta soqpaıdy" degen bar emes pe. Jaqsylardan bata alyp, aqylymen jol tapqan, bes eli baǵym dep sanaıtyn bes balapanyna minsiz ana bola alǵan, Rymbekteı ómirlik serigine rıasyz sezimin arnap, senimine selkeý túsirmeı, sergeldeń ómirde sertine berik bolǵan, baýyrlaryna meıirban júregimen janashyrlyq tanytyp, qushaǵyna basqan, dos-jaranǵa, quda-jegjatqa, aýyldasqa, aǵaıyn-týysqa, kórshi-qolańǵa syılastyq tanytqan turpatty tulǵa jarqyraǵan juldyzdaı mezgilsiz aǵyp tústi, kúzge jetpeı soldy, tal túste dúnıe kerýeni toqtady.

Asqarbek Aıǵanym

---