InfoHub Logo

Byltyrdan bastap pedagogıkalyq mamandyqtar boıynsha oqýǵa túsý talaptary qatańdatylyp, mejelik bal kóterildi. Degenmen, osy qatań talaptan súrinbeı ótken talapkerler stýdent atanǵannan keıin eń joǵary shákirtaqy almaq. QR Bilim jáne ǵylym mınıstri Ashat Aımaǵambetov Facebook paraqshasynda ustazdyq mamandyqtyń jastar arasyndaǵy bedelin kóterý úshin osyndaı qadamdar jasalǵanyn jazdy.

«2021 jyly biz pedagog bolyp jumys istegisi keletinderge jumysqa ornalasý kezinde de qoıylatyn talaptardy qatańdattyq. Osylaısha, endi bul mamandyqqa kez kelgen mektep túlegi túse almaıdy, óıtkeni pedagogıkalyq baǵytqa daıyndyqtyń barlyq baǵyttaryna UBT-nyń eń joǵary shekti baly belgilendi. Sondaı-aq pedagogıkalyq mamandyqtar boıynsha bilim alýshylar alatyn shákirtaqylardyń kólemi de qazir eń joǵary», - dep jazdy mınıstr.

Onyń aıtýyna qaraǵanda, jalaqyny kóterý, júktemeni azaıtý, eseptilikti qysqartý, pedagogterdi ózine tán emes fýnksıalarǵa tartýǵa jol bermeý sharalary mamandyqtyń mártebesin arttyrýda sheshýshi ról atqarǵan.

«Sonyń arqasynda qazir muǵalim mamandyǵyna úzdik túlekter ǵana túsip jatqanyn kórip otyrmyz. Osy mamandyqqa túsýshilerdiń ortasha baly aıtarlyqtaı artty, pedagog mamandyǵyn tańdaǵan «Altyn belgi» ıegerleriniń sany eki ese kóbeıdi», -deıdi vedomstvo basshysy.

---