InfoHub Logo

Tıisti dıplomy bardyń bári muǵalim bola almaıdy. Bilim jáne ǵylym mınıstrligi engizgen táýelsiz testileý ádisi JOO túlekterin irikteý arqyly ǵana bilim oshaqtaryna jiberýge baǵyttalǵan. Mınıstr Ashat Aımaǵambetov Facebook paraqshasynda osy sharanyń alǵashqy nátıjeleri týraly pikir bildirdi.

Vedomstvo basshysynyń aıtýynsha, pedagogıkalyq baǵytta bilim beretin joǵary oqý oryndarynyń túlekteri úshin mindetti testileý engizilip otyr.

Iaǵnı, endi daıyndyǵy nashar úmitkerler qolynda dıplomy bolsa da, muǵalim bolyp jumysqa ornalasa almaıdy.

«Balalarmen jumys isteı bilý óte mańyzdy jáne jaýapty mindet bolǵandyqtan, aldymen táýelsiz testileýden ótý kerek. Mundaı syrtqy emtıhandy 2021 jyly shamamen 40 myń túlek tapsyrdy. Olardyń ishinde shekti bal jınaǵandar ǵana mektepte jumys isteýge múmkindik aldy. Engizilgen bul jańashyldyq joǵary oqý oryndary jumysynyń sapasyn da kórsetti. 36 ýnıversıtet osy mamandyq boıynsha daıyndaý boıynsha lısenzıasynan aıyryldy», - dep eske aldy mınıstr.

Sondaı-aq, ol byltyr Prezıdenttiń qoldaýynyń arqasynda joǵary oqý oryndaryndaǵy muǵalimderdiń aılyǵy da kóterilgenin aıtady.

«Pedagog mártebesi týraly» zań joǵary oqý oryndarynyń oqytýshylaryna qoldanylmaýyna baılanysty olardyń jalaqysy kóterilmedi. Sol sebepti mınıstrlikke baǵynyshty JOO-larda 2021 jyldyń 1 qyrkúıeginen bastap profesorlyq-oqytýshylyq quramnyń jalaqysyn kóterý týraly arnaıy buıryq qabyldadyq. Qatardaǵy oqytýshylar úshin eń tómengi jalaqy 200 myń teńgeni, al profesorlar úshin – 350-400 myń teńgeni quraıdy. Bul rette 1 stavkanyń maksımaldy kólemi jylyna 680 saǵattan aspaýy tıis. Mundaı múmkindik Prezıdenttiń qoldaýynyń arqasynda jáne 2011 jyldan bastap alǵash ret osyndaı kólemde grant qunyn arttyrýdyń nátıjesinde paıda boldy», -dep jazdy Ashat Aımaǵambetov.

---