InfoHub Logo

Bul materıalda aspazdyq jáne Mıshlen juldyzdary týraly tolyq málimetter aıtylady.

Mıshlen juldyzdary degenimiz ne?

Túrli elderge saıahattap, sapaly meıramhana taǵamdaryn baǵalaıtyn árbir tamaq talǵaǵyshtar Mıshlenniń jáne Mıshlen juldyzynyń ne ekenin jaqsy bilýi kerek. Bul uǵymdar 1900 jyly Andre Mıshlenniń jasap shyǵarǵan anyqtamalyǵynan bastaý alǵan. Ol óziniń esimimen atalatyn (qazirgi tańda tanymaldylyqqa ıe bolǵan) kompanıany basqara otyryp, naryqta avtomobıl shınasyn ǵana emes, sondaı-aq avtomobılge qatysy bar barlyq qural-jabdyqtardy ilgeri jyljytqan.

Bul anyqtamalyqta jolda avtomobıl júrgizýshilerine qajet bolatyn oryndardyń tizimi ǵana usynylǵan. Olardyń arasynda meıramhanalar da bolǵan. Anyqtamalyqty jasaýshylar meıramhanalardyń keıbirin juldyzshamen belgilep, taǵamdardyń qymbat ekendigin kórsetip otyrǵan. Andre Mıshlen fransýzdardyń neni qalaıtyndaryn - avtomobılder men dámdi tamaqty unatatyndaryn jaqsy bilgen.

«Mıshlen gıdi» HH ǵasyrdyń 20-jyldary asa úlken suranysqa ıe boldy. Onyń basty sebebi – bul anyqtamalyqta túrli meıramhanalardyń taǵamdary men bas aspazshylardyń jumystaryna úsh juldyzdan quralǵan shkala boıynsha baǵa berilgen. Sonymen, Mıshlen juldyzy degenimiz ne?

- Bir juldyz meıramhanadaǵy taǵamnyń óte dámdi ekendigin bildirgen.

- Eki juldyz – sizdiń baǵytyńyzdyń boıynda jol-jónekeı ornalasqan meıramhananyń taǵamdarynyń tamasha ekendigin jáne ol jerden tamaqtanýǵa turarlyq ekendigin kórsetken.

- Úsh juldyz – bas aspazdyń jumysy keremet, taǵamy – óner týyndysy sanalǵan. Mundaı meıramhanalardan 2-3 aı buryn oryn alyp jáne saıahat josparyna engizip, arnaıy atbasyn burǵan.

Sol ýaqyttan beri Mıshlen juldyzy bar meıramhanalar joǵary sapa men aspazdyq ónerdiń egiz uǵymy sanalady. Al, «Mıshlenniń qyzyl gıdi» - álemdegi eń úzdik meıramhanalardyń jol kórsetkishi. Qandaı elge sapar shekseńiz de qaıdan tamaqtanýǵa bolatynyn biletin bolasyz. Óte yńǵaıly!

«Mıshlen gıdi» nelikten qyzyl tústi?

Óte ońaı... Mıshlen eki túrli jolnusqa – «qyzyl» tústisi meıramhanalar men qonaqúılerge, al «jasyl» tústisi ár eldiń tabıǵı jáne tarıhı mańyzy bar kórikti jerlerine arnalyp shyǵarylady. Ár kitaptyń kólemi aýqymdy jáne as máziri jazylǵan egjeı-tegjeıli aqparattardy qamtıdy.

Aıtpaqshy, Mıshlen Eýropa elderi boıynsha barlyǵy 12 «qyzyl» gıd shyǵarady. Fransıa, Germanıa, Italıa, Ispanıa, Nıderlandy, Belgıa, Lúksembýrg, Ulybrıtanıa meıramhanalary boıynsha jeke jolnusqalar jasap shyǵarýda. Mıshlen juldyzy bar Fransıadaǵy meıramhanalar sany Eýropadaǵy basqa elderge qaraǵanda arta túsýde.

Alaıda, juldyzy bar meıramhanalar sany kóp el Fransıa emes. Bul – Tokıo, munda 3 juldyzy bar 9, eki juldyzy bar 25 jáne bir juldyzy bar 117 meıramhana ornalasqan.  Ókinishke oraı, Mıshlen meıramhanalarynyń tiziminde osy ýaqytqa deıin Qazaqstannyń bir de bir tamaqtaný oryndary kirmegen. Sarapshylar áli Qazaqstanǵa kele qoımaǵan sıaqty.

Mıshlen meıramhanasy degenimiz ne?

Mıshlen meıramhanalary birneshe onjyldyqtar boıy avtorlyq taǵamdarymen, joǵary deńgeıdegi qyzmet kórsetýlerimen jáne mańǵaz ıntererlerimen erekshelenip keledi. Shyntýaıtynda, bul túsiniktiń máni áldeqaıda tereńde jatyr, al Mıshlen tizimdemesine kiretin meıramhanalar alýan túrli jáne jaılylyǵy boıynsha bir-birinde úlken aıyrmashylyq joq. Mysaly, sizder Sıngapýrdaǵy fast-fýd ázirleıtin dúkenniń jaqynda ǵana Mıshlen juldyzyn alǵanyn bilesizder me?

Álemde alǵash ret kóshe taǵamyn ázirleıtin aspaz osyndaı mártebege ıe boldy. Chan Hon Men soıa soýsymen tuzdyqtalǵan kespe, kúrish jáne taýyq etin usynady. Bir qaraǵanda erekshe eshteńesi joq sıaqty, biraq Mıshlen sarapshylary onyń aspazdyq ónerine laıyqty baǵa berdi. Saltanatty meıramhanalyq ıntererdiń ornyna kóshe dúkeniniń ornalasýyna baılanysty sarapshylar, eń aldymen, tamaqtanatyn oryndy emes, taǵamdy baǵalaıtyndaryn málimdedi.

Aıtpaqshy, biz oqyrmandarǵa Mıshlen juldyzyn ıelený úshin qoıylatyn basty talaptardyń naqty tizimin usyna almaımyz, sebebi bul – kompanıanyń komersıalyq qupıasy bolyp tabylady. Sarapshylar «Mıshlenniń qyzyl gıdine» avtorlyq taǵamdar arqyly kirýge bolatynyn ǵana jasyrmaıdy. Olardyń pikirinshe, avtorlyq taǵamdary joq jerdi baǵalaýdyń qajeti joq. Mine, sondyqtan tamaq talǵaǵyshtar Mıshlen meıramhanalaryn tańdaý barysynda dámhananyń bas aspazy men onyń qonaqtarǵa usynatyn taǵamy týraly bile alady.

Mıshlen juldyzy – máńgilik emes

Meıramhanaǵa Mıshlen juldyzyn berý - qandaı da bir maǵynasynda sport sıaqty. Ony ıelenýge de bolady, sondaı-aq joǵaltyp alý da ǵajap emes. Ekinshisin isteý ońaıyraq. Fransıada kóptegen tamaq talǵaýshylar qaı meıramhananyń juldyzyn joǵaltatynyn boljap, bás tigedi. Mıshlen bas aspazy – joǵary deńgeıdegi kásipqoılar, biraq keıbireýler juldyzdyń joǵalýyn jeke qaıǵymen ushtastyrady.

Bas aspaz Bernard Loızeo úsh juldyzdyń bireýin joǵaltýy múmkin ekendigi týraly qaýeset shyqqanda depressıaǵa túsip, óz-ózine qol jumsaıdy. Bul oqıǵa 2003 jyly bolǵan, bul - aspazdar úshin Mıshlen juldyzynyń qanshalyqty mańyzdy ekendigin kórsetedi. Shyndyǵynda, Bernard bosqa zardap shekti – onyń meıramhanasyndaǵy juldyz alynǵan joq. Bul «juldyz» úshin jasalǵan birinshi ózin-ózi mert qylý oqıǵasy emes. Qaıǵyly tizimdi 1966 jyly bas aspaz Alen Zık bastady – onyń meıramhanasy rasynda juldyzyn joǵaltqan edi.

Alaıda, «juldyzyna qol suǵylmaıtyn» bas aspazshylardyń tizimi de joq emes. Sarapshylar úsh juldyzdyń bireýin de ala almaıtyn bas aspazdar mynalar: Mıshel Jerar, Pol Bokúz, Alan Senderan, Mıshel Trýagro, Jorj Blan. Olar qolynan óneri tamǵan óz isiniń sheberleri sanalady.

Mıshlen juldyzy barlar qalaı ómir súrýde?

Este qalarlyǵy, Mıshlen juldyzy bar meıramhanalar bul mártebeni ózine-ózi jarnama retinde qoldana almaıdy. Siz kez kelgen dámhanaǵa baryp, onyń «qyzyl» gıdke kiretinin bilmeı ketýińiz ǵajap emes. Ereje boıynsha, meıramhananyń Mıshlen juldyzyn ıelengeni týraly eskertpeni tek jolnusqadan ǵana bile alasyz. Sondyqtan, aldyn ala gıdti oqı júrińiz.

Sonymen qatar, juldyzdy mártebege ıe bolǵannan keıin kelýshilerdiń bolmaýy saldarynan jabylyp qalǵan meıramhanalar da bar. Ondaǵy taǵamdardyń til úıirerlik bolǵany anyq... Mysaly, Casa Julio ıspan meıramhanasynyń ıesi Hýlıo Bıoska Mıshlen gıdi redaksıasynan onyń dámhanasynan juldyzdy alyp tastaýyn ótingen, sebebi tabys pen kelýshiler sany aıtarlyqtaı tómendegen...

Eger siz Mıshlen juldyzynyń dámin tatý kóp qarjyny talap etedi dep oılasańyz, qatelesesiz. Iá, kóptegen meıramhanalar 100-250 eýro aralyǵyndaǵy shotty berýi múmkin, biraq qoljetimdi nusqalary da bar. Gonkongte bas aspaz Mak Pý Gor Add Good Luck atty dámhana ashty. Onda quny 1 eýrony quraıtyn taǵamdarǵa tapsyrys berýge bolady. Jáne onyń taǵamdary Mıshlen juldyzyna ıe bolǵan!

Gıdti kim jasaıdy jáne onyń redaksıasy qalaı jumys isteıdi?

Jolnusqanyń redaktory bar, al ondaǵy aqparattardy arnaıy ınspektorlar – 90-ǵa jýyq sarapshy tolyqtyryp otyrady, onyń ishinde 70 sarapshy eýropalyq elderde jumys isteıdi. Bul – túrli elderdegi meıramhanalarǵa aıyna úsh aptadan jáne jylyna 150 táýlikke deıin saıahat jasaıtyn biregeı tulǵalar. Osy ýaqyt ishinde árbir ınspektor shamamen 800 meıramhanaǵa barady. Olar meıramhanalarǵa kim ekendikterin aıtpaı barady, sondyqtan ınspektorlardyń túrin eshkim tanymaıdy. Olardyń qaısysy qaı meıramhanaǵa baratynyn boljaý múmkin emes.

Qalaı Mıshlen ınspektory atanýǵa bolady? Ol úshin:

- «qonaqúı bıznesi» mamandyǵy boıynsha joǵary oqý ornyn bitirý kerek;

- qyzmet kórsetý salasynda jumys istep, 5-10 jyl tájirıbe jınaý qajet;

- birneshe suhbattasýdan ótý tıis;

- aǵa ınspektormen birge tamaqtanyp, taǵamdar týraly esep berý kerek;

- jarty jyl boıy taǵamdarǵa baǵa berýdi úırený qajet.

Inspektor saıahatty aıaqtaǵannan keıin esep jazady, onyń negizinde Mıshlen keńsesinde juldyz taǵaıyndaý týraly sheshim qabyldanady. Jyl saıyn gıdtiń redaksıasy 45 myń restorannyń jumysyn saraptaıdy jáne sonyń negizinde 18 aıda bir ret kezekti jolnusqany shyǵarady.

Aıtpaqshy, eger demalysta saıahatqa shyqsańyz, Eýropada Mıshlen gıdin alýdy umytpańyz. Ókinishke oraı, bizde ondaı qyzmet kórsetilmeıdi.

---