InfoHub Logo

Erte, erte, ertede bir hanzada bolǵan eken, onyń qaıtsem de hanshaǵa úılenem degen asyl armany bar kórinedi, tek naǵyz hanshaǵa. Mine, ol sol sebepti dúnıeniń tórt buryshyn túgel kezip shyǵady, alaıda ózi oılaǵandaı eshkim ushyraspaıdy. Hansha degenderiń tolyp jatyr, biraq naǵyz hansha ma eken solar?! Osy arasyn bile almaı, ol aryp-ashyp eline oralady, – naǵyz hansha qolǵa ustatpas asyldaı yntyqtyra túsedi.

Birde ińirde kún raıy kilt ózgerip, taý-tasty jańǵyryqtyryp kún kúrkirep, naızaǵaı oınap, jańbyr shelektep quıdy. Bul netken sumdyq!

Kenet qalanyń qaqpasy sart-sart qaǵyldy, kári koróldiń ózi shyqty.

Qaqpa aldynda beıtanys hansha tur edi. Qudaıym-aý, onyń sıqy ne bolyp ketken! Jalbyraǵan shashynan, malmandaı kóıleginen sorǵalaǵan sý kebisine quıylyp, asyp tógilip jatyr, sol túrine qaramaı, naǵyz hanshamyn dep qoımaıdy ózi.

«Ony biz áli bile jatarmyz!» dep oılady da kári hanym lám demesten jatar bólmege bettedi. Barǵan boıda bar tósenishter men kórpe-jastyqty alyp tastap, tósektiń taqtaıyn jalańashtap, oǵan bir túıir burshaq dánin qoıyp, osynyń ústine qabattap jıyrma kórpe, jıyrma qus tósek saldy.

Osy salynǵan tósekke hanshany jatqyzdy.

Ertesine odan qalaı uıyqtap turdyń dep surady.

– Ah, aıta kórmeńiz óte nashar! – dep hansha bezek qaqty. Tipti kóz ilmedim dese de bolar! Bul neǵylǵan tósek ekenin bir qudaıdyń ózi bilsin! Áıteýir, bir qatty zattyń ústinde jatyp shyqtym, óne boıym kókpeńbek bolyp qalǵan shyǵar! Qyrsyq dep osyny aıt!

Mine, osy arada onyń naǵyz hansha ekenine eshkimniń shúbási qalmady. Qyryq qabat kórpe astyndaǵy burshaq dániniń qattylyǵyn sezý – tek asyl týǵan tekti bekzattarǵa ǵana tán bolsa kerek.

Qalyńdyq izdep sharq urǵan hanzadamyz oǵan úılendi. Endi ol óziniń naǵyz hanshaǵa úılengenine senimdi. Al bir túıir burshaqty mýzeıge jiberdi, áldekim urlap ketpese ol áli sonda jatqan bolý kerek.

Hanzadanyń úılený tarıhy, mine, osyndaı!

Aýdarǵan Sh.Beısenova

---