InfoHub Logo

"Lenınshil jas" gazetiniń redaktory Ábdisattar Bóldekbaevtan birde Alakól aýdandyq gazetinde qyzmet istep júrgen jıyrma bir jasar Sáken Imanasov: "Sizdi gazetimizge qyzmetke shaqyramyz. Kelisimińizdi berseńiz, tez habarlańyz" degen mazmunda jazylǵan jedelhat alyp, tóbesi kókke jetkendeı qýanyshqa bólenedi. Dereý Almatyǵa jetedi. Sóıtip, jastardyń súıikti gazetine qyzmetke turady. "Jurt "Lenınshil jasqa" ınstıtýtta oqyp, ýnıversıtetti bitirip qyzmetke turýshy edi, qarshadaı myna Sáken qatarynan ozyp qaıda barady, eı"... deýshiler de bolmaı qalǵan joq. Al Sáken bolsa, burqyratyp maqalasyn jazdy, jarqyratyp óleńderin jarıalady.

Birde aqyn aǵamyz Ádilbek Abaıdildanov brıgadır týraly jazylǵan ocherkimdi úsh ret qadaǵalap qarap. túzetip, úsh ret ózime qaıt kóshirtkizip, "endi jaqsy boldy" dep "Jetisý" gazetine jarıalatqan edi. Sondaǵy Ádiekeńniń "Jazǵan soń' sózdi sóıletip, oıdy oınatyp, jyr týdyrǵan aqyn sıaqty, ózimizdiń Sáken sıaqty jazý kerek" degeni ǵumyr boıy jadymnan shyqpaı-aq keledi.

Sol Sákenmen keıin Taldyqorǵan oblystyq "Oktábr týy" gazetinde birge qyzmet istedik. Bul kez onyń gazettiń qara jazýynan qashqaqtap, jyr jazýǵa bútindeı bet burǵan qyzýly, qyzyqty shaǵy edi. Sáken óleńderin oqıtyn. Pikirińdi bilýge yńǵaı berip, yqylas tanytatyn. "Ótirik aıtpa, ótirik maqtama?" deıtin. Kólgirsigendi kózshe aıtatyn. Janyn uǵar jaqsy joldas, ónerdi, óleńdi súıetin ónerpaz izdeıtin. Bul kúnde esimderi elge tanymal bolǵan belgili aqyn Ǵusman Jandybaev pen Áben Dáýrenbekovti aýylda júrgen jerinen gazetke súırep, qyzmetke ákelgen de osy Sáken edi.

Aqsý óńirinde tirliginde ádebıetke tik turyp qyzmet etken marqum aqyn, óri dramatýrg Qudash Muqashevtiń 60 jyldyq músheltoıy bolyp ótti. Aqynǵa eskertkish ornatyldy, aýyldyń aty berildi. Toıǵa respýblıkaǵa belgili aqyn, jazýshylar qatysyp, arnaý óleńder oqyldy. Osy toıdyń ótýine uıtqy bolyp, uıymdastyrýshylyq is atqarǵan, aýdan, oblys, odaq basshylaryn bátýaǵa keltirip, batasyn alǵan Sáken Imanasov edi.

Qysqa jipti kúrmeýge keltire almaı júrgen myna bir zaýal shaqtyń ózinde aqyn Sáken:

"...Álide
Bir jaqsylyq jasaǵym-aq keledi, eldiń bárine,
Rıza bolyp júrse deımin, kúlse deımin máz bolyp,
Eńbektegen balasy da, eńkeńdegen kári de", —

deıdi aǵynan aqtarylyp. Aqyn aǵalary Ǵalı Ormanov pen Ádilbek Abaıdildanovtyń eńbekteriniń ataýsyz qalyp bara jatqanyna da eń aldymen sonyń qabyrǵasy qaıysatyn sıaqty.

Áste de Sáken jalǵyz júre almaıdy. Saparǵa shyǵyp, jol júrer bolsa, joldas izdeıdi. Jaı jumysta júrip te, túski asqa: "Júr, bizdiń úıge baraıyqshy" dep, ótinish jasap júrgeni. Al erteli-kesh úıine bara qalsań, aqyn jary aq jarqyn Marıamnyń ózi bastap, balalary Gaýhar men Oljas qostap, quraq ushyp, kópten kútken, Qyrymnan kelgen qonaqtaryndaı qýana qarsy alady. Bul úıge jatsyný men jatyrqaý múlde jat.

Bul kúńde Alakólden shyqqan alashtyń aqsuńqar aqyny atalyp, abyroı-ataǵy shartarapqa tarap jatqan Imanastyń Sákeni, mine, asqaraly asýly alpysqa da kep qapty. Táıiri, aqyn úshin alpys jas — tal tús jas emes pe?! Ardaqty aqyn dosqa "júrekten shyqqan jyrlaryń júrekterge jete bersin, óleń-ómiriń uzaq bolsyn!" degim keledi de turady.

Oktábr týy" gazetinen, 1998 jyl

---