InfoHub Logo

Kúıeýi kórshi bólmede telefon betine qarap, arasynda «tyrq-tyrq» kúlip qoıady. Keshki tamaq qamyna kiriseıin dese, jasynan asqan balasy eteginen jabysyp mazasyn qashyryp qoımady. Ulyn qolyna alyp jarynyń qasyna jyndana keldi.

— Eń bolmasa balańa qarap tursańshy. Basqa esh nárse surap jatqan joqpyn. Kúnde osy jaǵdaı! Ne durystap tamaq ishe almaısyń, ne uıqy joq. Ne degen adamsyń?!

— Men Ártispin!

— Ártis bolsań ózińe. Jurttyń baıy kórermenderden gúl shoqtaryn jınap áıelderine alyp kelýshi edi. Sende ol da joq! Seniń ártistigińdi mennen basqa bireý biledi me?!

— Oı, áli meniń juldyzdy sátimdi kórgen joqsyń!

— Ony kórýge ómirim jetpeı qalady dep qorqamyn. Myna rıtm meni óltiretin shyǵar. Jumysqa bar, kel. Balany qara, emiz, uıyqtat, shomyldyr. Ol jetpegendeı seniń qas qabaǵyńa qaraý kerek! Úı jumystary jaıly jaq ashpaı-aq qoıaıyn.

— Kúshti emes, ósek aıtýǵa ýaqytyń joq — dep, ishek silesi qatyp kúldi. Oǵan shydaı almaǵan ol perzenttin kıeýiniń qolyna ustatyp:

— Men de jurttyń qatyny uqsap ómir súrgim keledi — dep, ashýǵa býlyǵa dárethanaǵa kirip ketti. Artynan kıeýi:

— Onda saǵan jurtqa baıǵa shyǵý kerek edi... — dedi de úndemeı qaldy. Úıde shybynnyń yzyńy ǵana estiletin tynyshtyq ornady. Ol bárin ádeıi istep otyr dep, qaltasynan telefonyn shyǵaryp shuqyp otyryp aldy. Qolyndaǵysy túrli álemderge esik ashatyn sekildi. İshinde joqtyń bári bar. Bir kezde syrtqy esik «tars» ete qalǵanda uıqydan shoshyp turǵandaı selk ete qaldy. Ne bolǵanyn bilýge shyqty.

Týra bir basqa úıge kirgen tárizdi. Jańa ǵana qabyrǵaǵa ilýli turǵan sýret joq. Orynynda kishkentaı kilemshe ilýli tur. Qoldanys zattary sol qalpy bolsa da, oryndary ózgergen. Kórshi bólmede kúıeýi otyr. Biraq, túri ózgeshe. Iaǵnı, biraz qartaıǵan. Túkke túsinbeı del-sal.

— Shyqtyń ba, kempir?! Má, nemereńdi ustaı tur! Sen shyqansha qysylyp qaldym — dep, birge de tolmaǵan balany ustatyp dárethanaǵa kirip ketti. Basy aınalyp dıvanǵa jaıǵasty. Qolyndaǵy nemeresiniń túrine qaraıdy, ulyna biraz uqsaıdy. Sonda da óz kózine ózi sener emes. «Ómirim dárethanada ótip ketti me?» degen oı mazalaı bastady.

— Áı, baı-aý?! Ne bop ketti tegi?

Únsizdik. Ol áli basty bólmeden shyqpaǵan kórinedi.

— Ómir qysqa degeni osy shyǵar... — dedi sybyrlap, kıeýiniń qarasyn kórip: — Áı, sen osy juldyzdy sátińe jettiń be? Esime salyp jibershi...

— Ne aıtyp tursyń?! Men ártistikten ketkeli qaı zaman?

— Oıba-a-aı-aý, nege?

— Óziń emes pe jurttyń baıyna qyzyǵyp: «anaý mynandaı, mynaý anandaı» deıtin. Sodan keıin pensıaǵa mebel shyǵaratyn fábrıkádan shyqtym ǵoı.

— Bizdiń neshe balamyz bar?

— Sen kempir ábden esiń aýysqannan saýmysyń?! Óziń bir baladan soń «Týmaımyn, pıgýram buzylady. Epteı almaımyn» dep, zarlap qoımadyń emes pe?! Nemene esińde joq pa?! — degen sózi, ózińe jat ekenin, bul jerde bir gáp baryn sezgen ol:

— Áı, shal-aý myna bólmedegi aına qaıda?!

— Joq. Satyp jiberdim — dep kúlip, keıin tamaǵy qyshyp jótelip ketti. Sol sátte jatyn bólmeden balasynyń kúlgen daýysy estildi.

— Esittiń be? Men qazir — dep, orynynan turmaqshy edi. Zorǵa kele jatqan shaly qasyna oqtaı ushyp jetti. Biraq eki metrdeı qashyqtyq saqtap toqtady.

— Ne deısiń? Qulaq úırenip qalǵan. Men de balamyzdyń kishkentaı kezin saǵynǵanda osyndaı daýystar estımin.

— Káne, beri jaqyndashy...

— Oı, baıaǵy kúsh joq. Qoısańshy, kelinińmen talasyp...

— Kúıdirgi, adamnyń júregin shyǵara jazdadyń ǵoı. Bar betińdegi grımińdi jý. Ártis dese ártissiń! — degen, áıeliniń nalasyna qumary qanǵansha jatyp alyp kúldi. — Juldyzdy sátiń qutty bolsyn! Aıtpaqshy, myna bala kimdiki?

— Jigitter qyzdar, shyǵa berińder bárin bilip qoıdy! Ýaqyt ta boldy.

As jáne jatyn bólmelerden qyz-jigitter túrli sharlar men ádemi bezendirilgen tort kóterip «Týǵan kúnińmen» dep, án shyrqap kirip kele jatty. Qalǵany gúl shoqtaryn kóterip syrtqy esikten kirdi. Sóıtse, kúndelikti kúıbeńmen júrip, óz týǵan kúnin umytyp ketipti. Tez dastarhan jaılyp, bári jaıǵasty. Ol balasynyń mańdaıynan ıiskep, jurttyń ómirinsiz de baqytty ekenin sezindi.

---