InfoHub Logo

Qazaqstandyq OnlineMektep.org qashyqtan oqý plaftormasyna birneshe kún qatarynan Qazaqstannan tys aýmaqtan joıqyn DDoS shabýyldar jasalýda. Platformany ázirleýshilerdiń pikirinshe, bul shabýyldar paıdalanýshylardyń senimin buzýdy kózdep qasaqana uıymdastyrylǵan.

Joba jetekshisi Sanjar Kenjehanulynyń aıtýynsha, búgin OnlineMektep Ulttyq qaýipsizdik komıtetiniń Memlekettik tehnıkalyq qyzmetiniń qorǵaýy arqasynda shabýylǵa tótep berdi. Búgingi syrtqy DDoS shabýyl platformaǵa on ese artyq salmaq túsirdi. Bul – Qaznet tarıhyndaǵy eń úlken sıfrlyq shabýyldyń biri.  

Sonymen qatar, jelide platforma qoldanýshylarynyń jeke akkaýntaryn buzýdy usynatyn qaskúnemder paıda boldy. Mundaı qylmystyq áreket týraly aqparat quqyq  qorǵaý organdaryna beriledi.  

OnlineMektep.org karantın kezeńinde qazaqstandyq oqýshylar bilim alatyn negizgi resýrs. OnlineMektep negizinde 3,5 myńnan asa mekteptiń oqý prosesi uıymdastyrylǵan. 1 qyrkúıekten beri platformada kún saıyn 1,5 mıllıonnan asa oqýshy sabaq oqıdy. Oqý jylynyń basynan beri muǵalimder platforma resýrstary negizinde 3 mıllıonnan asa onlaın-sabaq ótkizdi, 160 mıllıondaı paraqsha qaralyp, 500 mıllıonǵa jýyq jattyǵýlar oryndaldy. Platformany ár sekýnd saıyn  bir mezgilde 70 myńnan 80 myńǵa deıin biregeı qoldanýshylar paıdalanady.
Bul platformany Bilim Media Group kompanıasy men «Nazarbaev zıatkerlik mektepteri» derbes bilim berý uıymy birlese daıyndaǵan. Qazirgi kezde resýrsta birinshi toqsannyń oqý baǵdarlamasyn qamtıtyn 5700 sıfrlyq sabaq, 140 myń jattyǵý júktelgen.

Kontent adaptıvti, derbes bilim berýdiń ozyq ádistemesin eskere otyryp ázirlengen. Platforma negizinde oqýshylarǵa vırtýaldy synyp pen jeke sabaq kestesin ázirleýge, synyptaǵy ár balamen jekeleı, nemese jalpy synyppen chat arqylýy baılanysýǵa, vıdeokonferensıa rejıminde sabaq ótkizýge, úı tapsyrmasyn berip, ony tekserýge, baǵalaýǵa, sondaı-aq arnaıy konstrýktormen óziniń sabaqtaryn qurastyrýǵa múmkindik jasalǵan.

Platformany ázirleýshiler paıdalanýshylardan shabýyl saldarynan bolýy múmkin aqaýlarǵa  túsinistikpen qaraýdy ótinedi jáne kompanıa men QR Ulttyq qaýipsizdik komıtetiniń tehnıkalyq qyzmeti mamandarynyń birlesken jumysy nátıjıesinde mundaı shabýyldardy boldyrmaýdyń barlyq sharalary qabyldanyp jatqanyn habarlaıdy. Sonymen qatar, OnlineMektep platformasy QR Sıfrlyq damý, ınovasıa jáne aeroǵarysh ónerkásibi mınıstrligine, QR Bilim jáne ǵylym mınıstrligine máselege shuǵyl aralasyp, qoldaý kórsetkeni úshin alǵys bildiredi.

800-ge  jýyq mamannan turatyn platforma qyzmetkerleri muǵalimder, oqýshylar men olardyń ata-analaryn karantın kezinde qoldaý úshin qoldan kelgenniń bárin jasap jatyr.

Platforma jumysy baılanysty kez kelgen suraq boıynsha qoldaý kórsetý ortalyǵyna habarlasýyńyzǵa bolady +7 (707) 944 95 95 ([email protected])

---