InfoHub Logo

Almatydaǵy SmaArt.Point ǵımaratynda «Dınastıa» jobasynyń qatysýshylaryn marapattaý sharasy ótti. Qazaqstan Otbasylyq bıznes asosıasıasy seriktesterimen birlese otyryp,  «Dınastıa» jobasy otbasylyq kásipkerlik pen qarjylaı saýattylyqty damytý jáne qoldaýdy júzege asyrdy. Nátıjesinde, Qazaqstanda jańadan 4 kompanıa ashylyp, 4 seriktestik joba quryldy. Oǵan qosa bas demeýshi «Hoým Kredıt Bank» jeńimpazdarǵa úsh qarjylaı grant berdi. Jalpy, jobaǵa qatysýshylar kásipker retinde zańdy mártebesin aldy.

Jobaǵa Qazaqstannyń 12 aýdany men 8 qalasy boıynsha 300-den asa adam qatysty. Onyń basym kópshiligi 25-55 jas aralyǵyndaǵy qyz-kelinshekter. Úsh aılyq oqý baǵdarlamasynda bilim berýge arnalǵan 8 master-klass jáne qosymsha 4 ekspert mamandarmen kezdesý ótkizildi.

Bul jobanyń basty maqsaty — Qazaqstannyń barlyq aımaǵy boıynsha kásipkerlikpen aınalysa bastaǵandar men qandaıda bir kásippen aınalysqysy keletinderge otbasylyq resýrsti qoldana otyryp, óz isin ashýǵa, jańa múmkindikter tabýǵa úıretý. Oqý kýrsyn tolyǵymen ótkender óz kompanıasynyń qarjylaı negizimen tanysyp, kúndelikti tirshilikte marketıńtik quraldardy paıdalanýdy, jańa seriktester men tutynýshylar tabýǵa múmkindik aldy.

— Jalpy, statısıka boıynsha otbasylyq bıznes – tabysty bıznestiń biri. Bul meniń ashqan jańalyǵym emes, ol álem boıynsha zerttelip, anyqtalyp, dáleldengen nárse. «Otbasylyq bıznes ashý múmkin emes» degen stereotıpti múldem joıý kerek. Ásirese bizdiń elde ulttyq, otbasylyq qundylyqtardy joǵary qoıamyz. Sondyqtan da bul otbasylyq is bastaýǵa jaqsy negiz. Ekinshiden, qandaıda bir ıdeıa bolsa, ony birinshi kimge aıtasyz, kimnen kómek suraısyz jáne sizdi kim qoldaıdy. Árıne, jaqyndaryńyz. Biz solardy bir birimen jumys isteýdi, ózara berik seriktestik ornatýdy, isiniń damýyna, alǵa jyljýyna kómektesemiz», – deıdi Qazaqstan Otbasylyq bıznes asosıasıanyń tóraıymy Iana Isakova.

Onyń aıtýynsha, jobaǵa kez kelgen adam qatysa alady, tek tirkelse bolǵany. Bir ǵana talap – jobaǵa qatysýshy týys adamymen kelýi kerek. Qatysýshylardyń kópshiligi jobaǵa kelgen soń otbasynyń qoldaýyn alyp, óz isterin ashqan. Osy arqyly ár qatysýshy óziniń ǵana emes, jaqyndarynyń da ómirin jaqsartýǵa tyrysýda. Tipti, joba nátıjesinde otbasylyq kásipkerlikti damytatyn ortalyq ashylmaq.

«Shyny kerek, eń basynda bul joba jaıynda bilgenimiz aıtarlyqtaı az bolatyn. Birde Qazaqstan Otbasylyq bıznes asosıasıasynyń tóraıymy Iana Isakova habarlasty. Ol Almaty ǵana emes, jalpy Qazaqstan boıynsha «kásipker bolamyn» degen adamdardy jınap, bıznes ashýdyń joldaryn kórsetkisi keletinin jetkizdi. Sol kezde eń aldymen bizden qarjylaı emes, jańadan bıznes ashamyn degen adamdardyń qarjylyq saýattylyǵyn ashýǵa kómek berýimizdi surady. Bizdiń Bank bes jyl boıy qarjylyq saýat ashý jaǵynan kóptegen jobalar uıymdastyrǵan bolatyn. Sondyqtan Iananyń bastamasy oıymyzdan shyqty. 3 aı boıy biz otbasylyq kásipkerlermen tájirıbemizben bólisýge tyrystyq» deıdi «Bank Hoým Kredıttiń» qoǵammen baılanys menejeri Elvıra Nurbaeva.

Jobaǵa qatysýshy Almatydaǵy 80-ge jýyq otbasylyq jup úsh aı boıy ár apta saıyn master-klasqa qatysty. Sonda Bank qyzmetkerleri bolashaq kásipkerge qajetti negizgi qarjylyq quraldardy aıtyp, ekonomıka men qarjy jaǵyn bastan aıaq oqytyp shyqty. Onyń ústine qandaı da bir kásipti bastamas buryn qandaı nárselerge basa nazar aýdarý kerektigin kórsetip, aqyl-keńesterin bergen eken.

— Jalpy, barlyq kezdesýler óte qyzyqty ótti. Onyń ishinde resmı ǵana emes, beıresmı kezdesýler de boldy. Sol aralyqta barlyq qatysýshy ózara dostasyp, bir-birine baýyr basyp ketkenderine kýá boldyq. Oǵan qosa osy joba bankimizdiń «Ǵajaıyp ómir úshin» degen uranymyzdy qoldaǵan boldy, – dedi Elvıra Nurbaeva.

Bul jobaǵa demeýshilik kórsetken «Atameken» Qazaqstan respýblıkasynyń ulttyq kásipkerler palatasy, İsker áıelder keńesi men Almaty Menejment ýnıversıteti bolatyn. Sonymen birge, bas demeýshi «Bank Hoým Kredıt» úsh qatysýshyǵa grant berdi. Óz kásibin taýyp, isin endi júrgizgeli turǵan otbasylyq kásipkerler úshin ol árıne qomaqy kómek. Otbasynyń búkil múshelerimen jobaǵa birge qatysyp, óz isin ashqan Arharovtar áýletine 250 myń teńge berildi. 150 myń teńge granty eki balanyń anasy, dekrettik demalysta otyrǵan Janar Baıbolovaǵa buıyrdy. Kásibin odan ary damytýǵa múmkindik alǵan jas Sın otbasyna 100 myń teńge berildi.

Sáýle ARHAROVA:

Joba arqasynda shyǵarmashylyq sheberhanamyz ashyldy

— Osynda kelgenimde tipti bıznes-jobany qalaı jazý kerektigin de bilgen joqpyn. Ózimiz óner adamdary bolǵan soń, negizgi tabysty toıdan tabamyz. Sol toıdy atqaryp shyǵyp, aqshany alamyz da shyǵyndarymyzdy jaýyp, ekinshi bir tapsyrysqa ketemiz. Mine, kúnimiz osylaı ótetin. Al myna jerde ár sabaq saıyn úı tapsyrmasyn oryndaı otyryp, biraz nárseni bildik. Úsh aı boıy ár apta saıyn kezdesip turǵannyń ózi bir-birimizdi qoldaýǵa, kómektesýge úıretti. Máselen, kásipkerler palatasy bıznes júrgizý boıynsha trenıń ótkizedi. Biraq odan góri, osy jobadan kóp suraǵyma jaýap aldym. Munda 80-ge jýyq otbasy qatysyp, ózara jarysyp qana qoımaı, dostasyp, bir-birimizge jaqyn bolyp kettik.

Buryn merekelik keshterdi uıymdastyrýmen aınalysatynmyn. Basynda bul jobanyń paıdasy bolatynyn otbasym senbedi. Sabaqqa qatysqan soń, olardyń oılary ózgerdi. Búginde ulym, qyzym, joldasymmen birge «Arharovtar shyǵarmashylyq sheberhanasyn» qurdyq. Ony ashý ıdeıasy da, aty da osy jerde týdy. Endigi maqsat – aqsha tabý emes, adamdarǵa jaqsy kóńil-kúı syılaý.

Janar BAIBOLOVA:

Paıdama jaraıtyn bilim aldym

— Joba jaıynda dostarymnan bilip, tirkeýden óttim. Negizi qandaıda bir utys úshin kelgenim joq. Bastysy — paıdama jaraıtyn bilim alý. Jalpy, jobanyń uıymdastyrýshysy Iana Isakovany buryn syrttaı biletinmin. Buryn Astanada ákimdikte zańger bolyp istegenmin. Búginde eki balanyń anasymyn. Kıim-keshek dızaıneri kóptigin baıqap, áıelderge arnalǵan sýmkany jasaý jolyn tańdadym. Apam da, anam da qol ónerge jaqyn adamdar. Mine solarmen birge endi otbasylyq bıznes ashtyq.

Dıana SIN:

Balamnyń arqasynda isimdi ashtym

— Bul jobaǵa meni kúıeýim shaqyrdy. Árıne, basynda kúmánmen qaradym. Qandaıda da bir nárse tegin bolady dese «nege?», «ne úshin?» degen suraqtar týyndaıtyny belgili ǵoı. Biraq qazir kelgenime ókinbeımin. Óıtkeni osy jerde kóp nárse úırendim. Bastysy, bul biz úshin jaqsy bastama boldy. Sebebi, buǵan deıin «nemen aınalyssam bolady» dep oılanyp, úıde otyratynmyn. Bizdiń aınalyspaǵan nársemiz qalmady. Qytaıdan áshekeı-buıymdar aldyryp, satyp ta kórdik. Biraq odan eshteńe tappadym. Balamen úıde otyrǵan soń artyq esh jerge shyǵa da almaısyń. Buǵan qosa balamyzdyń qantqa da, konservige de alergıasy boldy. Oǵan ne beretinimizdi bilmedik. Sodan jemis-jıdekterdi qospasyz keptirý oıǵa keldi. Búginde jemis-jıdek chıpsy men úı pastılasyn shyǵaramyz. Bul ónimniń balaǵa zıany joq. Ony óz balamyzǵa da berip júrmiz. Allegrıamen aýyratyn balalar úshin taptyrmas ónimge aınaldy. Ári densaýlyqqa da paıdaly.

Foto Kursiv.kz

---