InfoHub Logo

Quralaıdyń qýyrshaǵy jeterlik. Olardyń kóbin qurbylary týǵan kúnine syılaǵan. Qýyrshaqtaryn bir-birimen shatystyryp almaý úshin Quralaı olarǵa at qoıdy. Biri — Ásem, biri — Zıada, biri — Saltanat, osylaı jalǵasa beredi.

Quralaı qaı qýyrshaǵynyń neshe jasta ekenin, qandaı kóılek kıýdi unatatynyn, qandaı tamaq qalaıtynyn biledi. Tipti qýyrshaqtarynyń minezine deıin aıtyp bere alady.

Bir kúni Quralaı Ásem deıtin qýyrshaǵyn sheshindire bastady. Muny kórgen sheshesi:

— Janym-aý, jalańashtap qaıtesiń? — dep surady.

— Kóılegi kirlegen‚ jýyp beremin!— dedi Quralaı.

— Onyń durys qoı. Biraq, jýǵan soń tarylyp, kóılegi syımaı qalyp júrmesin!

— Syımasa, basqa kóılek tigip beremin!

Quralaı Áseminiń kóılegin jyly sýǵa salyp, asyqpaı jýdy. Kiri ketkesin, sýyn syǵyp, jipke jaıyp keptirdi. Endi ony útikteý ǵana qaldy. Quralaı soǵan kirisken. Sol boıda, qaryny ashqan mysyǵy sút surap, mazalamasy bar ma. «Shydaı tur, qazir quıyp beremin» degenine qaramastan, qaıta-qaıta súıkenip, mıaýlaı berdi. Quralaı mysyǵyna alańdap otyryp Ásemniń kóılegin kúıdirip alǵanyn bir-aq bildi.

Ol muny mamasyna aıtpastan syrtqa shyǵyp ketti. Aýlada oınap, úıge qaıta oralǵan. Qarasa, Ásem ornynda joq.

— Mama, Ásemdi kórdiń be? — dep surady ol.

— Ásem saǵan renjip qaldy! Kóılegin kúıdirip tastapsyń ǵoı! — dedi sheshesi.

— Kúıdirgen men emes, útik qoı!

— Qyzym-aý, útikti qyzdyrǵan da, kóılekti útiktegen de óziń emes pe? Ony nege ózgeden kóresiń? Munyń jaramaıdy! Kemshilikti moıyndaý kerek!

— Jaraıdy, onda Ásemdi taýyp alyp, keshirim suraımyn! — dedi Quralaı.

— Ásem eshqaıda ketken joq. Jalańash bolǵasyn uıalyp, dıvannyń qýysynda jasyrynyp jatyr!— dedi sheshesi.

Quralaı qýyrshaǵyn dıvannyń qýysynan taýyp aldy da, jas baladaı, taza oramalmen qundaqtatty. Sodan soń:

— Ásem, sen maǵan renjime! Búgin ózińe jańa kóılek tigip beremin! — dep ony keýdesine basty.

---